I Yini Lexi Nga Hi Pfunaka Leswaku Hi Tshama Hi Tiyile eRipfumelweni?
1 Ku sukela loko hi sungule ku tihlanganisa ni nhlengeletano ya Yehovha, nhluvuko wa hina wa moya wu ve xihlovo xa ntsako. Hambiswiritano, ku hambeta hi kula hi tlhelo ra moya i swa nkoka leswaku hi ya emahlweni hi ‘dzima timitsu, hi akiwa ni ku tiyisiwa eripfumelweni.’ (Kol. 2:6, 7) Hambiloko van’wana va endle nhluvuko lowukulu hi tlhelo ra moya, van’wana va hambukile hikwalaho ka leswi a va nga ‘tiyanga eripfumelweni.’ (1 Kor. 16:13) Leswi hi nga swi sivela leswaku swi nga humeleli eka hina. Hi ndlela yihi?
2 Ku Endla Ntirho Wa Moya Nkarhi Ni Nkarhi: Hlakulela ku endla swilo leswinene swa moya enhlengeletanweni ya Yehovha. Hi yona leyi khathalelaka swilaveko swa hina swa moya hi xitalo. Minhlangano ya vandlha, tinhlengeletano ni mintsombano swa hi pfuna leswaku hi kula ni ku hi tiyisa hi tlhelo ra moya, ntsena loko hi va kona nkarhi ni nkarhi. (Hev. 10:24, 25) Ku hlaya Bibele nkarhi ni nkarhi, timagazini ta Xihondzo xo Rindza ni Xalamuka!, ni tibuku leti tlhuvutsaka Rito ra Xikwembu swi ta endla leswaku timitsu ta hina ta moya ti dzima ti tlhela ti tiya swinene. (Hev. 5:14) Ku tivekela tipakani ta moya ta munhu hi xiyexe ni ku tikarhatela ku ti fikelela, swi ta ku vuyerisa hi ndlela leyi hlamarisaka.—Filp. 3:16.
3 Ku Pfuniwa Hi Lava Wupfeke: Tikarhatele ku hlakulela vuxaka ni lava wupfeke hi tlhelo ra moya, lava nga kona evandlheni. Tolovelana ni vakulu, tanihi leswi entiyisweni, ku nga vona lava nga hi tiyisaka. (1 Tes. 2:11, 12) Amukela switsundzuxo kumbe swiringanyeto leswi va ku nyikaka swona. (Efe. 4:11-16) Nakambe malandza ya vutirheli ma swi tsakela ku pfuna van’wana leswaku va tiya eripfumelweni, hikwalaho titshege hi vamakwerhu lava leswaku u kuma xikhutazo.
4 Xana u lava mpfuno evutirhelini? Vulavula ni vakulu ivi u va kombela leswaku va ku pfuna. Kumbexana va nga ku katsa eka nongonoko wa Maphayona Ma Pfuna Van’wana. Xana wa ha ku khuvuriwa? Ku dyondza buku leyi nge Vutirheli Bya Hina ivi u tirhisa leswi u swi dyondzaka, swi ta ku pfuna leswaku u endla nhluvuko lowu yisaka eku wupfeni hi tlhelo ra moya. Xana u mutswari? Hambeta u tiyisa vana hi tlhelo ra moya.—Efe. 6:4.
5 Hi ku dzima timitsu ni ku tiya eripfumelweni, ha tiphina hi ku va ni vuxaka lebyikulu na Yehovha ni xinakulobye lexinene ni vamakwerhu. Leswi swi hi pfuna ku langutana ni minhlaselo ya Sathana, naswona swi tiyisa ntshembo wa hina wa vumundzuku lebyi nga heriki.—1 Pet. 5:9, 10.