Mpfuno Lowu Kumekaka Hi Ku Hatlisa
1. Xana swi nga endlekisa ku yini leswaku munhu a tsana emoyeni?
1 Anna, makwerhu wa xisati loyi nuna wa yena a nga riki Mbhoni, ntirho wa yena a wu nga n’wi nyiki nkarhi wo ya eminhlanganweni minkarhi hinkwayo, naswona a a nga koti ku ya ensin’wini ni ku dyondza Rito ra Xikwembu. Hambileswi a a n’wi rhandza Yehovha kambe u hetelele a horile emoyeni. Nkateko wa kona, vakulu va n’wi pfunile hi tlhelo ra moya.
2. Hi yihi ndlela leyi Vakreste hinkwavo va nga vaka mpfuno lowu kumekaka hi ku hatlisa?
2 Ku amukela mpfuno wa moya lowu humaka evandlheni swi komba leswaku ha n’wi tshemba Yehovha. Vakulukumba va vandlha va tekelela nkhathalelo wa rirhandzu wa Yesu Kreste hi ku lava tindlela to khutaza ni ku pfuna lava kokaka ku tika hi tlhelo ra moya. (1 Tes. 5:14) Ko tala, lexi lavekaka i marito ya musa lama khutazaka, lama sekeriweke eMatsalweni. Vakreste hinkwavo va fanele va navela ku pfuna lava tsaneke, hikuva a hi ntirho wa vakulu ntsena. A swi kanakanisi leswaku un’wana ni un’wana wa hina u pfuniwe hi marito lamanene lama “vuriweke hi nkarhi wa kona.”—Swiv. 25:11; Esa. 35:3, 4.
3, 4. I yini lexi lavekaka leswaku hi pfuna van’wana naswona hi nga swi endlisa ku yini?
3 Teka Goza: Loko hi lava ku pfuna lava lavaka mpfuno swi lava leswaku hi teka goza, hi va ni ntwela-vusiwana naswona hi endla sweswo hi mbilu hinkwayo. Loko Yonathani a xiya leswaku Davhida u khome nyarhi hi timhondzo, u ‘suke a yima a ya eka Davhida eHorexe, leswaku a tiyisa voko rakwe.’ (1 Sam. 23:15, 16) Vulavula hi ndlela ya musa loko u pfuna van’wana. Marito lama humaka embilwini ma fikelela mbilu. Ku tlula kwalaho, Yesu u endle xikombiso lexi xi swi vekaka erivaleni leswaku ku pfuna makwerhu swi lava ku gingiriteka ni ku endla tano hi xikongomelo xo fikelela mbilu yakwe. (Luka 15:4) Ku navela ku pfuna makwerhu hi mbilu hinkwayo swi ta hi pfuna leswaku hi nga heli mbilu loko hi ri karhi hi n’wi pfuna, hambiloko a hlwela ku amukela mpfuno wa hina.
4 Mawaku ndlela leyi swi khutazaka ha yona loko hi teka goza ro pfuna van’wana, vo fana ni lava hi hlanganyelaka na vona edyondzweni ya buku leswaku va famba na hina ensin’wini! Loko hi ri karhi hi pfuna mupfumeri-kulorhi leswaku a huma nsimu, hi nga ha tirhisa nkarhi wolowo ku n’wi khutaza. Minkarhi yo tano leyi tsakisaka leyi hi yi hetaka hi ri swin’we entirhweni wa Yehovha ya khutaza, ngopfu-ngopfu eka lava va ringetaka ku tlhela va tserhama hi tlhelo ra moya.
5. Eka swiyimo swin’wana, hi yihi ndlela leyi vakulu va nga pfunaka ha yona?
5 Lunghiselelo Ra Rirhandzu: Lava se ku hundzeke nkarhinyana va nga yi ensin’wini kumbe va nga hlanganyeli ni vandlha va lava mpfuno lowu engetelekeke leswaku va aka ripfumelo ra vona. Swi nga endleka va pfuneka loko va fambiseriwa dyondzo ya Bibele hi buku leyi nge Gandzela Xikwembu Xi Ri Xin’we Xa Ntiyiso kumbe leyi nge Tshinela Eka Yehovha. Tanihi leswi se a khuvuriweke, dyondzo ya kona a yi fanelanga yi teka nkarhi wo leha. Komiti ya Ntirho ya Vandlha yi fanele yi tiva leswaku i vamani lava nga pfuniwaka hi lunghiselelo leri.—Vona Bokisi Ra Swivutiso eka Vutirheli Bya Hina Bya Mfumo bya November 1998 ni bya November 2000.
6. Xana swi tise ku yini leswaku makwerhu un’wana wa xisati a hlakarhela emoyeni?
6 Anna, la boxiweke eka ndzimana yo sungula u wu amukele hi mandla mambirhi mpfuno lowu vakulu va n’wi nyikeke wona, hi ku kombela makwerhu wa xisati la wupfeke leswaku a dyondza na yena Bibele. Va dyondze ka mune ntsena ava se a tserhamile hi tlhelo ra moya. U sungule ku va kona eminhlanganweni kutani a ya emahlweni a dzunisa Yehovha Xikwembu erivaleni. Makwerhu wa xisati la dyondzeke na yena u tlhele a n’wi pfuna ni le nsin’wini hi ku famba na yena loko a ya eku fambiseni ka tidyondzo ta Bibele ku fikela loko na yena a va ni xivindzi xo chumayela hi yindlu ni yindlu. A a lava ntsena ku pfuniwa hi musa leswaku a tlhela a tiya emoyeni.
7. Hi byihi vuyelo lebyi vaka kona loko hi pfuna van’wana leswaku va tiya emoyeni?
7 Ku tiyisa lava lavaka mpfuno swi tisa mikateko eka hinkwavo. Loyi a pfuniwaka u kuma ntsako loko a tshinela eka Yehovha kutani a hlanganyela emintirhweni ya nhlengeletano ya Yena. Vakulu va tsakela ku vona nhluvuko wolowo wa moya. (Luka 15:5, 6) Vandlha ri va ni vun’we hikuva swirho hinkwaswo swa khathalelana. (Kol. 3:12-14) Hakunene hi ni swivangelo leswinene swo tekelela Yehovha, tanihi leswi a nga—mupfuni la kumekaka hi ku hatlisa!—Efe. 5:1.