Ntshikilelo Wa Tintangha Ni Lunghelo Ra Wena Ra Ku Chumayela
1 Ntshikilelo wa tintangha i nkucetelo lowukulu—wa leswinene kumbe swo biha. Malandza-kulorhi ya Yehovha ma ni nsusumeto lowunene lowu hi khutazaka emintirhweni leyinene ya Vukreste. (Hev. 10:24) Kambe, swirho swa ndyangu leswi nga riki Timbhoni, vatirhi-kulorhi, vana lava hi nghenaka na vona xikolo, vaakelani kumbe vanhu lava hi va toloveleke va nga hi kucetela ku famba endleleni leyi nga pfumelelaniki ni misinya ya milawu ya Vukreste. Va nga ha ‘sola ku tikhoma ka hina lokunene mayelana na Kreste.’ (1 Pet. 3:16) Xana hi nga ku hlayisa njhani ku tiyimisela ka hina ku hambeta hi chumayela hambiloko hi langutana ni ntshikilelo wo biha wa tintangha?
2 Swirho Swa Ndyangu: Minkarhi yin’wana, swi nga ha endleka leswaku nuna tlhelo tatana la nga riki Mbhoni ya Yehovha a nga swi lavi leswaku nsati wakwe ni vana va hlanganyela evutirhelini bya le rivaleni. Sweswo swi ve tano endyangwini wun’wana wa le Mexico. Nsati wa nuna un’wana ni vana vakwe va nkombo va kume ntiyiso. Eku sunguleni nuna loyi a a va kaneta hikuva a a nga swi lavi leswaku ndyangu wakwe wu chumayela ni ku fambisa tibuku ta Bibele hi yindlu ni yindlu. Ntirho lowu a a wu teka wu va yisa ehansi swinene. Kambe, nsati wakwe ni vana va yime va tiyile eka xiboho xa vona xa ku tirhela Yehovha ni ku hlanganyela minkarhi hinkwayo evutirhelini. Hi ku famba ka nkarhi, nuna loyi u sungule ku vona ntikelo wa ku amukela lunghiselelo ra Xikwembu ra ntirho wa ku chumayela, kutani na yena a tinyiketela eka Yehovha. Swi n’wi teke malembe ya 15 ku amukela ntiyiso, kambe, xana a a ta va a wu amukerile loko ndyangu wakwe a wu nga tiyiselanga wu tirhisa lunghelo ra wona ro chumayela?—Luka 1:74; 1 Kor. 7:16.
3 Vatirhi-kulorhi: Swi nga ha endleka leswaku vatirhi-kuloni van’wana va nga ma tsakeli matshalatshala lama u ma endlaka ya ku va chumayela. Makwerhu un’wana wa xisati u vule leswaku loko ku pfuke bulo hi ta ku hela ka misava ehofisini, u hlekuriwile hileswi a ringanyeteke leswaku ku hlayiwa Matewu ndzima 24. Kambe, masiku ma nga ri mangani endzhaku ka sweswo, un’wana wa vatirhi-kulobye u n’wi byele leswaku u yi hlayile ndzima yoleyo naswona yi n’wi tsakisile. Ku fambisiwe buku ku tlhela ku endliwa malunghiselelo ya ku sungula dyondzo ya Bibele na yena ni nuna wakwe. Dyondzo yo sungula yi hele hi awara ya mbirhi ya matakuxa. Endzhaku ka dyondzo ya vunharhu, va sungule ku va kona eminhlanganweni naswona hi ku hatlisa endzhaku ka sweswo va tshike ku dzaha fole kutani va sungula ku hlanganyela evutirhelini. Xana leswi a swi ta humelela loko makwerhu loyi a a nga tekanga goza ra ku vulavula ni van’wana hi ntshembo wa yena?
4 Lava Hi Nghenaka Na Vona Xikolo: Swi tolovelekile leswaku vantshwa lava nga Timbhoni va langutana ni ntshikilelo wa tintangha exikolweni ni ku chava leswaku vantshwa van’wana va ta va tekela ehansi loko va chumayela. Muntshwa un’wana wa kondlo-a-ndzi-dyi le United States, la nga Mukreste u te: “A ndzi chava ku chumayela vantshwa van’wana hikuva a ndzi chava leswaku va ta ndzi hlekula.” Hikwalaho u papalate malunghelo ya ku nyikela vumbhoni eka tintangha-kulobye exikolweni ni le ndhawini ya ka vona. Xana u nga xi hlakulela njhani xivindzi xa ku langutana ni ntshikilelo wa tintangha? Tshemba Yehovha, u lava ku amukeriwa hi yena. (Swiv. 29:25) Tinyungubyise hi vuswikoti lebyi u nga na byona bya ku tirhisa Rito ra Xikwembu evutirhelini bya wena. (2 Tim. 2:15) Muntshwa loyi ha ha ku vulavulaka hi yena u sungule ku khongela eka Yehovha, a kombela leswaku a n’wi pfuna ku hlakulela ku navela ku vulavula ni vana-kulobye exikolweni. U sungule ku nyikela vumbhoni hi xitshuketa exikolweni, ku ve ni vuyelo lebyinene kutani ku nga ri khale a a burisana ni munhu un’wana ni un’wana loyi a n’wi tivaka. U gimete hi ku: “Vantshwa volavo va lava ntshembo hi vumundzuku naswona Yehovha u tirhisa hina leswaku hi va pfuna.”
5 Vaakelani: Hi nga ha va hi ri ni vaakelani kumbe vanhu lava hi va toloveleke, lava va nga hi rhandziki hikwalaho ka leswi hi nga swona kumbe leswi hi swi pfumelaka. Loko u chavisiwa hi leswi va swi ehleketaka, tivutise: ‘Xana va wu tiva ntiyiso lowu yisaka evuton’wini lebyi nga heriki? I yini lexi ndzi nga xi endlaka ku fikelela timbilu ta vona?’ Mulanguteri wa xifundzha u xiye leswaku ku va ni vuyelo lebyinene loko vumbhoni byi nyikeriwa hi ku ringanisela eka vaakelani. Kombela Yehovha leswaku a ku nyika matimba ni vutlhari leswi lavekaka leswaku u hambeta u lava vanhu va timbilu to tshembeka.—Filp 4:13.
6 Ku pfumelela ku lawuriwa hi ntshikilelo wa tintangha ku nga ha tsakisa lava hi kanetaka, kambe xana sweswo swi ta va pfuna ha yini—kumbe hina swi ta hi pfuna ha yini? Yesu u kanetiwe hi vanhu lava a a hanya na vona. U tlhele a tiyiselela ku holoveriwa hi vamakwavo hi manana. Kambe a a swi tiva leswaku a va ta vuyeriwa loko a tiyisela endleleni leyi Xikwembu xi n’wi vekeleke yona. Xisweswo, Yesu u “[tiyiselele] mavulavulelo yo tano yo kaneta ya vadyohi hi ku lwisana ni leswi vuyerisaka vona ntsena.” (Hev. 12:2, 3) Na hina hi fanele ku endla tano. Tiyimisele ku ri tirhisa swinene lunghelo ra wena ra ku chumayela rungula ra Mfumo. Hi ku endla tano, “u ta tiponisa wena swin’we ni lava va ku yingisaka.”—1 Tim. 4:16.