“Ku Voninga Ka N’wina A Ku Vonakale”

¹ Misava leyi hi rhendzeleke yi le munyameni hi tlhelo ra mahanyelo ni ra moya. Rivoningo ra ntiyiso ri paluxa ‘mintirho leyi nga vekiki mihandzu’ ya munyama leswaku swihinga leswi nga ni khombo swi ta papalateka. Xisweswo, muapostola Pawulo u khutaze Vakreste a ku: “Hambetani mi famba tanihi vana va ku vonakala.”—Efe. 5:8, 11.

² “Mihandzu ya ku vonakala” yi hambane ngopfu ni munyama wa misava. (Efe. 5:9) Leswaku hi veka mihandzu leyi hi fanele ku va swikombiso leswinene ngopfu swa mahanyelo ya Vukreste, hi va muxaka wa vanhu lava Yesu a va amukelaka. Hi fanele ku tlhela hi kombisa timfanelo to fana ni ku tirha hi mbilu hinkwayo, ku tshembeka ni ku hisekela ntiyiso. Mihandzu leyi yi fanele ku kombisiwa evuton’wini bya hina bya siku ni siku ni le vutirhelini bya hina.

³ Voninga Nkarhi Wun’wana Ni Wun’wana: Yesu u byele vadyondzisiwa vakwe a ku: “Ku voninga ka n’wina a ku vonakale emahlweni ka vanhu.” (Mat. 5:16) Hi ku tekelela Yesu, hi kombisa ku vonakala ka Yehovha hi ku chumayela hi Mfumo wa Xikwembu ni hi swikongomelo swa xona. Hi voninga kukota mavoningo loko hi endzela makaya ya vanhu ni loko hi hangalasa ntiyiso entirhweni, exikolweni, eka vaakelani va hina kumbe kun’wana ni kun’wana laha hi kumaka lunghelo ro endla tano.—Filp. 2:15.

⁴ Yesu u vule leswaku van’wana va ta ku venga ku vonakala. (Yoh. 3:20) Hikwalaho a hi heli matimba loko vanhu vo tala va ala ku voningeriwa hi “ku voninga ka mahungu lamanene lama vangamaka malunghana na Kreste.” (2 Kor. 4:4) Yehovha u kota ku vona leswi nga etimbilwini ta vanhu kutani a nga lavi leswaku vaendli va leswo biha va tihlanganisa ni vanhu va yena.

⁵ Loko hi landzela tindlela ta Yehovha ni ku tsakela ku voningeriwa hi moya, hi ta tikomba eka van’wana. Loko va xiya leswaku hi ni “ku vonakala ka vutomi” emahanyelweni ya hina, na vona va ta susumeteleka ku cinca leswaku va va vabyari va ku vonakala.—Yoh. 8:12.

⁶ Hi ku endla leswaku ku vonakala ka hina ku voninga, hi yisa ku dzuneka eka Muvumbi wa hina naswona hi pfuna vanhu va timbilu letinene leswaku va n’wi tiva kutani va va ni ntshembo wa vutomi lebyi nga heriki. (1 Pet. 2:12) Leswi hi nga ni ku vonakala, a hi ku tirhiseni ku voningela van’wana ndlela leswaku va huma emunyameni wa moya kutani va veka mihandzu ya ku vonakala.