“Ku Voninga Ka N’wina A Ku Vonakale”
1. Hi rihi lunghelo leri hi nga na rona?
1 Ku sukela hi mahlamba-ndlopfu kukondza ri phumela, ku vonakala ko saseka loku hi ku vonaka ku tisa ku dzuneka eka Yehovha Xikwembu. Kambe, a ku ri muxaka wun’wana wa ku vonakala loku Yesu a rhambeke vadyondzisiwa vakwe leswaku va ku kuma, ku nga ku “vonakala ka vutomi.” (Yoh. 8:12) Ku voningeriwa loku ka moya i lunghelo ro hlawuleka leri katsaka vutihlamuleri lebyikulu. Yesu u te: “Ku voninga ka n’wina a ku vonakale emahlweni ka vanhu,” leswaku van’wana va vuyeriwa. (Mat. 5:16) Leswi ku vonakala ku endleriweke ku susa munyama wa moya lowu nga kona namuntlha, ku fanele ku voningela vanhu hinkwavo naswona leswi i swa nkoka swinene enkarhini lowu hi hanyaka eka wona! Ku fana na Kreste, hi nga endla njhani leswaku ku voninga ka hina ku vonakala?
2. Yesu u wu kombise njhani nkoka wo dyondzisa hi ku vonakala ka ntiyiso?
2 Hi Ku Chumayela: Yesu u tirhise nkarhi wakwe, matimba yakwe ni swilo swakwe a endla leswaku ku vonakala ka ntiyiso ku tiviwa hi vanhu emakaya ya vona, emintsendzeleni, etinhlohlorhini ta tintshava—laha vanhu a va kumeka kona. U xiye nkoka wa ku va dyondzisa swilo swa moya. (Yoh. 12:46) Leswaku a fikelela vanhu vo tala, u lunghiselele vadyondzisiwa vakwe leswaku va va “ku vonakala ka misava.” (Mat. 5:14) Va endle leswaku ku voninga ka vona ku vonakala hi ku endlela vaakelani va vona leswinene ni ku va dyondzisa ntiyiso hi tlhelo ra moya.
3. Hi nga ku kombisa njhani ku tlangela ka xiviri ka ku vonakala ka ntiyiso?
3 Vanhu va Xikwembu va byi tekela enhlokweni vutihlamuleri bya ku ‘hambeta va famba tanihi vana va ku vonakala’ ni ku chumayela laha vanhu va kumekaka kona. (Efe. 5:8) Hi ku hlaya Bibele kumbe minkandziyiso yin’wana ya Vukreste endhawini leyi ku nga ni vanhu loko u ri entirhweni kumbe hi nkarhi wo wisa exikolweni, swi nga ku pfulela ndlela yo bula hi Matsalwa. Makwerhu un’wana wa xisati loyi a ha riki muntshwa u sungule dyondzo ya Bibele hi ndlela yoleyo naswona u fambise tibuku ta 12 eka vadyondzi-kulobye!
4. Ha yini ‘ku endla leswaku ku voninga ka hina ku vonakala’ swi katsa ku va ni mahanyelo lamanene?
4 Hi Mintirho Leyinene: Leswaku ku voninga ka hina ku vonakala swi katsa ndlela leyi hi tikhomaka ha yona siku ni siku. (Efe. 5:9) Loko hi ri entirhweni, exikolweni ni le tindhawini tin’wana ta mani na mani, vanhu va ma xiya mahanyelo ya hina ya Vukreste naswona sweswo swi hi pfulela tindlela to chumayela hi ntiyiso wa le Bibeleni. (1 Pet. 2:12) Hi xikombiso, mahanyelo lamanene ya xifanyetana xin’wana xa malembe ya ntlhanu ma susumetele mudyondzisi wa xona leswaku a vitana vatswari va xona. U te: “A ndzi si tshama ndzi vona n’wana loyi a nga ni mahanyelo yo fana ni lawa!” Ina, ntirho wa hina wo chumayela ni mahanyelo ya hina swi kokela vanhu eka ku “vonakala ka vutomi” naswona swi yisa ku dzuneka eka Xikwembu.