Vatswari—Nghenisani Mikhuva Leyinene Eka Vana Va N’wina
1 Munhu a nga velekiwi a ri ni mikhuva leyinene naswona a nga yi kumi hi xiwelo. Hikwalaho, swi teka nkarhi ku nghenisa mikhuva leyinene eka vana. Ku “nghenisa” swi vula “ku nyika hakatsongo-tsongo” kumbe “ku endla leswaku nchumu wu nghena hi mathonsi.” Ku laveka leswaku vatswari va phikelela, leswaku va ‘hambeta va kurisa vana hi ku tshinya ni nkongomiso wa mianakanyo ya Yehovha.’—Efe. 6:4.
2 Sungula Loko Va Ha Ri Tincece: Bya hlamarisa vuswikoti lebyi tincece ti nga na byona bya ku dyondza ni ku endla swilo leswintshwa. Hambileswi hakanyingi vanhu lava kuleke swi va tikelaka ku dyondza ririmi lerintshwa, vana lava ha riki exikolweni xa tindzumulo va swi kota ku dyondza tindzimi timbirhi kumbe tinharhu hi nkarhi wun’we. U nga teriwi hi mianakanyo ya leswaku n’wana wa wena wa ha ri ntsongo ku va a nga dyondza mikhuva leyinene. Loko n’wana a sungula ku dyondzisiwa ndzetelo wa Bibele a ha ri ricece kutani a kula na wona, loko a sungula ku tlhariha, mianakanyo ya yena yi ta va yi tele hi vutivi lebyi nga ta n’wi “tlharihisa leswaku [a] ta pona.”—2 Tim. 3:15.
3 Endla Ntirho Wa Le Nsin’wini Wu Va Mukhuva: Mukhuva lowunene lowu nga nghenisiwaka evutsongwanini bya n’wana i ku chumayela mahungu lamanene ya Mfumo wa Xikwembu minkarhi hinkwayo. Vatswari vo tala va sungula ku endla tano hi ku famba ni vana va vona entirhweni wa yindlu ni yindlu loko va ha ri tincece. Loko vatswari va hambeta va hlanganyela entirhweni wa ku nyikela vumbhoni swi pfuna vana va vona ku hlakulela ku tlangela ni ku hisekela vutirheli. Vatswari va nga kombisa vana ndlela yo nyikela vumbhoni eka xiyimo xin’wana ni xin’wana xa ntirho wa le nsin’wini.
4 Ku tsarisa eXikolweni xa Vutirheli bya le Tilweni na kona ka va pfuna vana. Ku va dyondzisa mikhuva leyinene ya ku dyondza ni ku hlaya va twisisa. Va dyondza ku bula hi Bibele, ku endla maendzo yo vuyela ni ku fambisa tidyondzo ta Bibele. Ndzetelo wo tano wu nga ha va susumetela ku phayona ni ku lwela ku fikelela malunghelo yo hlawuleka. Vunyingi bya lava nga eBethele ni lava nga varhumiwa va tsaka loko va tsundzuka masiku lawa va sunguleke ku nyikela tinkulumo ha wona exikolweni lexi, naswona va xi teka tanihi lunghiselelo leri va pfuneke ku hlakulela mikhuva leyinene.
5 Hinkwerhu hi fana ni vumba emavokweni ya Muvumbi Lonkulu, Yehovha. (Esa. 64:8) Loko vumba bya ha tsakama swa olova ku vumba ha byona. Loko byi ya byi tiya, swi ya swi tika ku tirha ha byona. Swi tano ni hi vanhu. Loko va ha ri vantshwa, va vumbeka hi ku olova—naswona ku va ni vuyelo lebyinene loko n’wana a ha ri ntsongo. Malembe ya vona ya vuntshwa i nkarhi lowu va vumbekaka hi ku olova, leswaku va va vanhu lavanene kumbe vo biha. Tanihi mutswari la khathalelaka, songa rigogo ra ha tsakama u nghenisa mikhuva leyinene ya vutirheli bya Vukreste eka vana va wena.