Pfuna Van’wana Leswaku Va Ta eMinhlanganweni

¹ “Munhu un’wana ni un’wana la tshamaka kwala kusuhi . . . la tsakelaka ku va kona eminhlanganweni, wa rhambiwa hi malwandla leswaku a va kona.” Ku sukela loko xitiviso lexi xi tsariwile enkandziyisweni wa Zion’s Watch Tower ya November 1880, Timbhoni ta Yehovha ti hisekele ku rhamba vanhu leswaku va hlengeletana va ta yingisela ndzetelo wa Bibele. (Nhlav. 22:17) Lexi i xiphemu xa nkoka xa vugandzeri bya ntiyiso.

² I Swa Nkoka Ku Va Kona: Hi kuma mikateko loko hi hlanganyela ni vandlha. Hi ya hi n’wi tiva ku antswa Yehovha, Xikwembu xa hina lexi tlakukeke. Evandlheni, hi hlangana leswaku hi ta ‘dyondzisiwa hi Yehovha.’ (Esa. 54:13) Nhlengeletano ya yena yi hi hlavutelela nongonoko wa ndzetelo wa Bibele lowu hi tshinetaka eka yena ni ku hi nyika mpfuno lowu tirhaka leswaku hi tirhisa “ndzayo hinkwayo ya Xikwembu.” (Mint. 20:27; Luka 12:42) Minhlangano yi nyika munhu ha un’we ndzetelo wo kuma vutshila bya ku dyondzisa Rito ra Xikwembu. Switsundzuxo leswi humaka eMatsalweni swi hi pfuna leswaku hi va ni vuxaka lebyinene ni van’wana na Yehovha hi byakwe. Ku tihlanganisa ni vanhu lava rhandzaka Xikwembu swi tiyisa ripfumelo ra hina.—Rhom. 1:11, 12.

³ Va Rhambe Hi Ku Kongoma: Edyondzweni yo sungula, rhambela xichudeni ha xin’we xa Bibele eminhlanganweni. Xi nyike xirhambo. Pfuxa ku tsakela ka xona hi ku xi rungulela tinhla ti nga ri tingani leti ku khutazeke eka nhlangano lowu hundzeke ni hi ku xi luma ndleve hi swo karhi leswi ku nga ta buriwa ha swona eka nhlangano lowu tlhandlamaka. Hlamusela ndlela leyi Holo ya Mfumo yi nga xiswona u tlhela u tiyiseka leswaku xa yi tiva ndlela yo ya kona.

⁴ Loko xichudeni xi nga ti hi nkarhi wolowo, u nga heli mbilu ku xi rhamba. Vhiki rin’wana ni rin’wana tirhisa timinete ti nga ri tingani ku xi kombisa ndlela leyi nhlengeletano ya hina yi tirhaka ha yona. Tirhisa broxara leyi nge Ti Endla Ku Rhandza Ka Xikwembu ni vhidiyo leyi nge Jehovah’s Witnesses—The Organization Behind the Name leswaku xi tolovelana na hina ni minhlangano ya hina. Yana ni vahuweleri van’wana leswaku xichudeni xi ta tolovelana na vona. Loko u khongela, nkhensa Yehovha hikwalaho ka nhlengeletano ya yena naswona u boxa xilaveko xa leswaku xichudeni xi tihlanganisa na yona.

⁵ U nga koki milenge loko ku tiwa emhakeni yo pfuna lava ha ku tsakelaka leswaku va sungula ku hlanganyela na hina. Loko ku tlangela ka vona Yehovha ku ri karhi ku kula, va ta susumeteleka ku tirhisa leswi va swi dyondzaka ni ku va xiphemu xa nhlengeletano ya Xikwembu leyi nga ni vun’we.—1 Kor. 14:25.