Ku Kongomisa Swichudeni Swa Bibele Enhlengeletanweni Ya Yehova

1 Swichudeni swa Bibele swi fanele ku tolovelana ni nhlengeletano ya “ntlhambi wun’we” lowu Yesu a vulavuleke ha wona eka Yohane 10:16. Swi fanele ku twisisa leswaku ku tixaxameta ni nhlengeletano ya Yehova i swa nkoka eku ponisiweni ka swona. (Nhlav. 7:9, 10, 15) Hikwalaho, hi fanele hi sungula ku kongomisa swichudeni swa hina swa Bibele enhlengeletanweni hi xihatla loko dyondzo ya Bibele yi simekiwa.

2 Pfuna swichudeni swa wena swa Bibele ku tolovelana ni swivumbeko swo tala swa nhlengeletano ya Yehova ya laha misaveni. Hi ku landzela ntila wa lembe xidzana ro sungula, hinkwavo vanhu va Yehova va le hansi ka mabandlha lama vumbiweke hi vakulu, malandza ya vutirheli ni vahuweleri. Namuntlha, swirho swa mabandlha swi tsakela ku va kona eka minhlangano ya ntlhanu hi vhiki. Ku na tinhlengeletano ni mintsombano ya nkarhi na nkarhi leyi yimisiweke exikarhi ka lembe naswona leswi swi nyikela ndzayo yo hlawuleka kun’we ni minkarhi yo hlangana ni Timbhoni-kulorhi leti humaka etindhawini to hambana-hambana. Nakambe, ku na maphayona, varhumiwa ni valanguteri lava famba-fambaka, kun’we ni Huvo leyi Fumaka leyi kongomisaka ntirho wa misava hinkwayo. U nga swi tolovelanisa njhani swichudeni swa wena swa Bibele ni swivumbeko swo hambana-hambana swa nhlengeletano ya Yehova? U nga swi pfuna njhani ku vona leswaku xivumbeko xa nhlengeletano xi sekeriwe eBibeleni?

TIRHISA BROXARA LEYI NGE TI ENDLA KU RHANDZA KA XIKWEMBU

3 Broxara leyi nge Ti Endla Ku Rhandza Ka Xikwembu yi ni rungula leri twisisekaka malunghana ni nhlengeletano ya Yehova. Ha yona u nga tolovelanisa swichudeni swa Bibele ni nhlengeletano hi laha ku humelelaka ni ku swi pfuna ku twisisa tirhelo ra yona. Ndlela leyinene yo sungula ha yona i ku bula hi leswi humelelaka eHolweni ya Mfumo. Leswi swi ta khutaza xichudeni ku va kona eminhlanganweni ya bandlha. U nga si n’wi rhambela eka nkulumo ya le rivaleni ro sungula, pfuxeta rungula leri nga eka matluka 14 na 15. Kokela nyingiso wa yena eswifanisweni. Hlamusela ndhawu ni xivumbeko xa Holo ya Mfumo ya kwalaho. U nga ha n’wi komba xifaniso xa Holo ya Mfumo leyi u nga ka yona.

4 Loko riendzo ra mulanguteri wa xifundza ri tivisiwa ebandlheni, xiya kun’we ni xichudeni xa wena xa Bibele matluka 20 na 21. Tirhisa swivutiso leswi nga emakumu ka tluka 21 ku endlela leswaku tinhla-nkulu ti twisiseka. Xiya na yena masungulo ya Matsalwa ya lunghiselelo ra hina ra sweswi hi ku tirhisa ndzimana yo sungula eka tluka 20. Rungula leri ri ta endla riendzo ra xichudeni xa wena eHolweni ya Mfumo ri va ra nkoka.

5 Hi ku fanana, emahlweni ka ntsombano wa n’wina wa muganga, nhlengeletano ya xifundza kumbe nhlengeletano ya siku ro hlawuleka, hlanganisa leswi kandziyisiweke eka tluka 19. Kokela nyingiso wa yena eka leswi katsekaka eka ntsombano lowukulu naswona kombisa nxanxamelo wa swivono wa matiko hinkwawo lowu kombisiweke eswifanisweni eka tluka 18. Loko u hlamusela xifaniso lexi kombisaka ku humesiwa ka buku leyintshwa, u nga ha n’wi lunghiselela bulo leri engetelekeke eka matluka 24 na 25. Ku hlamusela vuphayona, hlanganisa tinhla leti nga eka matluka 22 na 23.

FAMBISANA NI XILAVEKO

6 Hi laha u nga swi vonaka ha kona, a swi bohi ku sungula eku sunguleni ka broxara leyi nge Ti Endla Ku Rhandza Ka Xikwembu. Ematshan’wini ya sweswo, loko nkarhi ni xilaveko swi humelela, xiya tinhla to karhi eka broxara, leti nga ta pfuna xichudeni ku twisisa nhlengeletano ya Yehova ni ku xi pfuna ku hlanganyela ni bandlha ra kwalaho.

7 Ku vulavula hi ku tiyiseka loko mi bula hi timhaka leti swi ta endla leswaku ti dzika swinene eka xichudeni xa wena. Hiseka emoyeni. (Mintirho 18:25) Nakambe, tiyiseka leswaku wena, “la dyondzisaka van’wana,” u veka xikombiso lexinene hi ku kombisa ku tlangela nhlengeletano ya Yehova. (Varhoma 2:21) Hi ku endla tano, u nga ha pfuna van’wana ku joyina ntlhambi wun’we lowu Yesu a wu kongomisaka evuton’wini lebyi nga heriki.