Xiyenge 8: Ku Kongomisa Swichudeni eNhlengeletanweni
Ku Fambisa Tidyondzo Ta Bibele Leti Endlaka Nhluvuko
1. Ha yini swi pfuna ku hlamusela xichudeni xa Bibele yinhla yo karhi hi ta nhlengeletano ya Yehovha, kan’we hi vhiki?
1 Pakani ya hina loko hi fambisa tidyondzo ta Bibele a hi ku dyondzisa hi ta ripfumelo ra hina ntsena kambe i ku pfuna swichudeni leswaku swi va swirho swa vandlha ra Vukreste. (Zak. 8:23) Broxara leyi nge Timbhoni Ta Yehovha—I Vamani Xana? Ti Pfumela Yini Ke? yi nga hi pfuna ku endla tano. Yi nyike xichudeni xa Bibele lexintshwa, kutani u xi khutaza ku yi hlaya. Ku engetela kwalaho, xi hlamusele yinhla yo karhi hi ta nhlengeletano ya Yehovha kan’we hi vhiki.
2. Hi nga swi khutaza njhani swichudeni swa Bibele leswaku swi va kona eminhlanganweni ya vandlha?
2 Minhlangano Ya Vandlha: Ndlela ya nkoka ngopfu leyi nga pfunaka swichudeni swa Bibele leswaku swi tlangela nhlengeletano ya Xikwembu i ku va swi hlanganyela na hina eminhlanganweni. (1 Kor. 14:24, 25) Hikwalaho, u nga ha sungula ku swi toloveta yona hi ku swi hlamusela minhlangano ya ntlhanu leyi hi vaka na yona vhiki na vhiki ha wun’we-wun’we. Swi byele nhloko-mhaka ya nkulumo ya le rivaleni leyi nga ta nyikeriwa. Swi kombe xihloko leyi nga ta dyondziwa eka Dyondzo ya Xihondzo xo Rindza ni le ka Dyondzo ya Buku ya Vandlha. Hlamusela leswi endlekaka eka Xikolo xa Vutirheli bya le Tilweni ni le ka Nhlangano wa Ntirho. Loko u ri na nkulumo exikolweni, kumbexana u nga ha swi rungulela yona. Swi rungulele tinhla leti tsakisaka leti u ti kumeke eminhlanganweni. Tirhisa swifaniso leswi nga etibukwini ta hina leswaku u pfuna swichudeni swi vona leswaku ku humelela yini. Swi rhambe ma ha ku sungula ku dyondza.
3. Hi swihi swiyenge swa nhlengeletano leswi hi nga ha bulaka ha swona?
3 Loko nkarhi wa Xitsundzuxo, wa tinhlengeletano ni wa ku ta ka mulanguteri wa xifundzha wu tshinela, swi hlamusele swiendlakalo leswi, u endla leswaku swi navela ku va kona. Hambeta u swi hlamusela tinhlamulo ta swivutiso swo tanihi leswi nge: Ha yini hi vitaniwa Timbhoni ta Yehovha? Ha yini tindhawu leti hi hlanganyelaka eka tona hi ti vitana Tiholo ta Mfumo? Hi yihi mintirho ya vakulu ni malandza ya vutirheli? Ntirho wo chumayela ni nsimu swi hleriwa njhani? Tibuku ta hina ti kandziyisiwa njhani? Xana nhlengeletano yi yi kuma njhani mali ya kona? Rhavi ri tirha yini naswona Huvo leyi Fumaka yi wu langutela njhani ntirho?
4, 5. Xana tivhidiyo ta hina ti nga n’wi pfuna njhani munhu leswaku a twisisa nhlengeletano ni ku yi tlangela?
4 Tivhidiyo Leti Dyondzisaka: Ndlela yin’wana leyi swichudeni swa Bibele swi nga yi vonaka ha yona nhlengeletano ya Yehovha leyi hlamarisaka i ku tirhisa tivhidiyo ta hina. Vhidiyo leyi nge To the Ends of the Earth yi ta swi komba ntirho lowu endliwaka ku ya fika emakumu ya misava, ivi leyi nge Our Whole Association of Brothers, yi swi toloveta vamakwerhu hinkwavo, kasi leyi nge United by Divine Teaching yi ta swi komba ndlela leyi dyondzo ya Xikwembu yi endlaka leswaku hi va ni vun’we ha yona. Wansati un’wana loyi a a tshama a ri karhi a kuma timagazini ni tibuku tin’wana ta hina ku ringana malembe ya ntlhanu u khapa-khape mihloti loko a hlalela vhidiyo leyi nge Jehovah’s Witnesses—The Organization Behind the Name. Enkarhini wolowo se a a sungule ku tshemba Timbhoni leti a ti n’wi endzela, kambe endzhaku ko hlalela vhidiyo leyi, u swi vonile leswaku nhlengeletano na yona a nga yi tshemba. U sungule ku dyondzeriwa, kutani vhiki leri tlhandlamaka, u ye eminhlanganweni eHolweni ya Mfumo.
5 Loko hi tirhisa timinete ti nga ri tingani vhiki na vhiki, hi bula ni swichudeni swa hina naswona hi tirhisa tibuku ni tivhidiyo leti nga kona, hi nga hambeta hi kongomisa swichudeni enhlengeletanweni yin’we ya ntiyiso leyi ku nga yona ntsena leyi Yehovha a yi tirhisaka namuntlha.