Ku Kongomisa Swichudeni Eka Nhlengeletano Leyi Vitaniwaka Hi Vito Ra Hina
1 “Rungula leri ri kumeka hi tindzimi to tlula 200. I rungula leri twiweke ematikweni yo tlula 210. I rungula leri yiseriwaka vanhu hinkwako-nkwako lomu va kumekaka kona. Ri endla xiphemu lexikulu xa tsima lerikulu ra ku chumayela leri misava yi nga si ri tivaka, rungula leri hlanganisaka vanhu va timiliyoni emisaveni hinkwayo. Timbhoni ta Yehovha ti hleleriwe ku hetisisa ntirho lowu ku tlula dzana ra malembe!”
2 Rungula ra vhidiyo leyi nge Jehovah’s Witnesses—The Organization Behind the Name ri sungurisa sweswo. Loko yi ya emahlweni yi hlamula ni swivutiso leswi nge: Kahle-kahle Timbhoni ta Yehovha i vamani? Xana ntirho wa vona wu hleriwe njhani? Xana wu kongomisiwa njhani? Xana wu hakeleriwa njhani? Yi endla leswaku vahlaleri va vona leswaku “Timbhoni ta Yehovha emisaveni hinkwayo ti leteriwile tanihi nhlengeletano leswaku ti pfuna vaakelani va tona leswaku va aka ripfumelo eBibeleni,” naswona yi va pfuna leswaku va tivonela hi voxe nhlengeletano leyi vitaniwaka hi vito ra hina. Endzhaku ka loko a vone vhidiyo leyi, wansati loyi a dyondzisiwa u khapa-khape mihloti ya ntsako ni ku tlangela kutani a ku: “Swi nga endlekisa ku yini leswaku munhu a tsandzeka ku vona leswaku leyi i nhlengeletano ya Xikwembu xa ntiyiso, Yehovha?”—Ringanisa 1 Vakorinto 14:24, 25.
3 Wansati un’wana u dyondze Bibele a pfa a tshika ku ringana nkarhi wo leha, kambe a nga pfumeli leswaku Vunharhu-un’we i dyondzo ya mavunwa. Kutani yena ni nuna wakwe va kombisiwe vhidiyo ya hina. Nkombiso lowu wu va tsakise ngopfu lerova va wu hlalela kambirhi hi vusiku byin’we. Edyondzweni ya vona leyi landzeleke, nsati loyi u phofule ku navela kakwe ka ku va Mbhoni. U vule leswaku a khumbeka ngopfu hi dyondzo yakwe ya Vunharhu-un’we lerova a tsandzeka ku languta nhlengeletano ya hina ni vanhu va yona. Hi ku languta vhidiyo leyi u kote ku vona leswaku u kume nhlengeletano ya Xikwembu ya ntiyiso. Xikan’we-kan’we u lave ku sungula ku chumayela hi yindlu na yindlu. Endzhaku ka loko a hlamuseriwe magoza lama lavekaka leswaku a va muhuweleri la nga khuvuriwangiki, u te: “Ndzi fanele ndzi teka magoza lama faneleke.” U tshike kereke ya yena, a sungula ni ntirho wa nsimu, ivi a va ni vutshila eku lwisaneni ni Vunharhu-un’we.
4 Ku xiyiwe leswaku swichudeni swa Bibele swi endla nhluvuko lowunene emoyeni ni ku hatlisa swi vupfa loko swi vona nhlengeletano ya Yehovha ni ku hlanganyela na yona. Hilaha ku xiyekaka, endzhaku ka loko vanhu vo ringana 3000 va khuvuriwile hi Pentekosta, “a va chivirikela ku dyondzisiwa hi vaapostola, ni ku hlengeletana.” (Mint. 2:42) Swi fanerile leswaku hi pfuna swichudeni leswaku swi endla leswi fanaka namuntlha. Xana hi nga swi endlisa ku yini?
5 Byarha Vutihlamuleri: Muendli un’wana ni un’wana wa vadyondzisiwa u fanele a tiva leswaku i vutihlamuleri byakwe ku kongomisa xichudeni xa Bibele enhlengeletanweni ya Xikwembu. (1 Tim. 4:16) Dyondzo yin’wana ni yin’wana yi fanele yi langutiwa tanihi goza ro ya eka siku ro tsakisa loko munhu lontshwa a kombisa ku tinyiketela ka yena eka Yehovha hi nkhuvulo wa mati. Xin’wana xa swivutiso leswi a nga ta vutisiwa swona hi nkarhi wa nkhuvulo hi lexi nge: “Xana wa swi twisisa leswaku ku tinyiketela ka wena ni nkhuvulo swi ku hlawula tanihi un’wana wa Timbhoni ta Yehovha la hlanganyelaka ni nhlengeletano ya Xikwembu leyi kongomisiwaka hi moya?” Hikwalaho, i swa nkoka leswaku xi tiva leswaku a xi nge swi koti ku tirhela Xikwembu handle ko hlanganyela hi ku hiseka ni vandlha ra Vakreste va ntiyiso.—Mt. 24:45-47; Yoh. 6:68; 2 Kor. 5:20.
6 Hambeta u dyondzisa xichudeni malunghana ni vandlha ra ka n’wina ni nhlengeletano ya misava hinkwayo leyi vitaniwaka Timbhoni ta Yehovha. Endla leswi eka nongonoko wun’wana ni wun’wana wa dyondzo ya Bibele, u sungula eka leyo sungula. Loko wa ha ku sungula, rhambela xichudeni eminhlanganweni, ivi u hambeta u xi rhamba.—Nhlav. 22:17.
7 Tirhisa Switirho Leswi Kumekaka: Minkandziyiso ya hina leyinene yo yi tirhisa eku fambiseni ka tidyondzo ta Bibele i broxara leyi nge I Yini Leswi Xikwembu Xi Swi Languteleke Eka Hina? ni buku leyi nge Vutivi Lebyi Yisaka eVuton’wini Lebyi Nga Heriki. Hinkwato ti kandziyisa xilaveko xo hlanganyela ni vandlha. Loko dyondzo 5 ya broxara leyi nge Leswi Xi Swi Languteleke yi ya eku heleni yi ri: “U fanele ku hambeta u dyondza hi ta Yehovha ni ku yingisa swileriso swa yena. Ku va kona eminhlanganweni eHolweni ya Mfumo ya Timbhoni ta Yehovha ya le ndhawini ya ka n’wina swi ta ku pfuna ku endla tano.” Hi ku phindha-phindha buku leyi nge Vutivi yi khutaza xichudeni leswaku xi va kona eminhlanganweni. Ndzima 5, ndzimana 22, yi ni xirhambo lexi nge: “Timbhoni ta Yehovha . . . ti ku khutaza swinene leswaku u hlanganyela na tona eku gandzeleni ka Xikwembu ‘hi moya ni ntiyiso.’ (Yohane 4:24)” Ndzima 12, ndzimana 16, yi ri: “Loko u ya emahlweni ni dyondzo leyi u tlhela u swi endla mukhuva wa wena ku va kona eminhlanganweni ya Timbhoni ta Yehovha, ripfumelo ra wena ri ta tiya swinene.” Ndzima 16, ndzimana 20, yi ri: “Tiendlele mukhuva wa ku va kona eminhlanganweni ya Timbhoni ta Yehovha.” Ya engetela: “Leswi swi ta ku pfuna leswaku u twisisa kutani u tirhisa vutivi bya Xikwembu evuton’wini bya wena naswona swi ta ku nyika ntsako. Ku va xiphemu xa vumakwerhu bya Vukreste bya misava hinkwayo swi ta ku pfuna leswaku u tshama u ri ekusuhi na Yehovha.” Ndzima 17 yi yi hlamusela hi vuenti ndlela leyi munhu a kumaka nsirhelelo wa ntiyiso ha yona exikarhi ka vanhu va Xikwembu. Loko hi ri karhi hi dyondza ni van’wana, i vutihlamuleri bya hina leswaku hi kandziyisa swiphemu leswi swa dyondzo.
8 Broxara leyi nge Timbhoni Ta Yehovha—Ti Endla Ku Rhandza Ka Xikwembu Hi Vun’we eMisaveni Hinkwayo i xitirho lexinene lexi humeseriweke ku tolovetisa vanhu nhlengeletano leyi nga yoxe leyi vonakaka leyi Yehovha a yi tirhisaka ku hetisisa ku rhandza ka yena. Rungula ra yona leri nyikeriweke hi vuxokoxoko malunghana ni vutirheli bya hina, minhlangano ni nhlengeletano ri ta khutaza muhlayi leswaku a hlanganyela na hina eku gandzeleni ka Xikwembu. Loko ku kala ku simekiwa dyondzo ya Bibele, ku bumabumeriwa leswaku hi nyika xichudeni kopi ya broxara leyi leswaku xi tihlayela yona hi xoxe. A swi bohi leswaku hi yi dyondza na xona hilaha a swi ri hakona eku sunguleni.
9 Tin’wana ta tivhidiyo leti Sosayiti yi ti humeseke i switirho leswinene leswi kongomisaka swichudeni enhlengeletanweni leyi vitaniwaka hi vito ra hina. Swi ta va swinene loko swo hlalela (1) The New World Society in Action, leyi ku nga mpfuxeto wa bayisikopo ya 1954 leyi kombisaka ndlela leyi nhlengeletano ya Yehovha yi tirhaka ha yona hi ndlela leyi olovaka, leyi humelelaka ni ya rirhandzu; (2) United by Divine Teaching, leyi kombisaka vun’we byo rhula lebyi voniweke emintsombanweni ya hina ya matiko hinkwawo eYuropa Vuxa, Amerika Dzonga, Afrika ni le Asia; (3) To the Ends of the Earth, leyi funghaka lembe ra vu-50 ra Xikolo xa Bibele xa Gilead xa Watchtower ni ku kombisa ndlela leyi varhumiwa va humeleleke ha yona entirhweni wo chumayela emisaveni hinkwayo; (4) Jehovah’s Witnesses Stand Firm Against Nazi Assault, leyi vulavulaka hi mhaka leyi nyanyulaka ya xivindzi xa Timbhoni ni ku hlula ka tona loko Hitler a ti xanisa hi tihanyi; ku katsa ni leyi nge (5) Jehovah’s Witnesses—The Organization Behind the Name.
10 Tivekele Tipakani To Va Kona eMinhlanganweni Nkarhi Na Nkarhi: Swichudeni swi fanele swi hlamuseriwa leswaku hi lava dyondzo ya Bibele leyi nyikeriwaka ekaya ni mabulo lama nga eminhlanganweni ya vandlha. (Yoh. 6:45) Munhu lontshwa u fanele a endla nhluvuko lowu fanaka eku twisiseni ka yena Matsalwa ni nhlengeletano hi yoxe. Leswaku leswi swi ta koteka, hi fanele hi nga xwi eminhlanganweni. (Hev. 10:23-25) Sungula ku rhambela munhu eminhlanganweni ya vandlha xikan’we-kan’we. Vanhu van’wana lava ha ku tsakelaka va sungula ku va kona eminhlanganweni hambiloko dyondzo ya le kaya ya Bibele ya nkarhi na nkarhi yi nga si va kona. Kavula, hina hi hexe hi fanele hi veka xikombiso lexinene hi ku va kona eminhlanganweni nkarhi na nkarhi.—Lk. 6:40; Flp. 3:17.
11 Xi nyike rungula leri eneleke malunghana ni minhlangano ni ndlela leyi yi fambisiwaka ha yona leswaku xichudeni xi ta titwa xi ntshunxekile loko xi va kona eminhlanganweni ro sungula. Tanihi leswi vanhu van’wana va titwaka va nga ntshunxekanga loko va ya ro sungula etindhawini leti va nga ti tiviki, swi nga ha pfuna ku famba ni xichudeni eHolweni ya Mfumo loko xi ya eminhlanganweni ro sungula. Xi ta titwa xi ntshunxekile swinene loko u ri na xona loko xi hlangana ni swirho swa vandlha. Ku tlula hinkwaswo, vana muamukeri lonene wa muendzi wa wena, u n’wi endla a titwa a amukelekile ni ku ntshunxeka.—Mt. 7:12; Flp. 2:1-4.
12 Khutaza xichudeni leswaku xi va kona ro sungula enhlengeletanweni yo hlawuleka ya siku rin’we, enhlengeletanweni ya xifundzha kumbe entsombanweni wa muganga. Kumbexana u nga xi katsa loko u ri karhi u lunghiselela xo famba.
13 Nghenisa Ku Tlangela Loku Humaka eMbilwini: Buku leyi nge Ku Hleleriwa Ku Hetisisa Vutirheli Bya Hina, eka tluka 92, ya hlamusela: “Loko ku tlangela ka wena loku enteke ka nhlengeletano ya Yehovha ku kombisiwa hi mabulo ya wena eka vanhu lava tsakelaka, swi ta va olovela ku yi tlangela naswona swi ta va susumetela ku endla nhluvuko lowukulu wo tiva Yehovha.” Nkarhi na nkarhi vulavula leswinene malunghana ni vandlha ra ka n’wina, u nga tshuki u vulavula hi leswo biha. (Ps. 84:10; 133:1, 3b) Eswikhongelweni leswi u swi endlaka eka dyondzo ya Bibele, boxa vandlha ni xilaveko xa leswaku xichudeni xi hlanganyela na rona nkarhi na nkarhi.—Ef. 1:15-17.
14 Entiyisweni hi lava leswaku vanhu lavantshwa va va ni ku tlangela loku humaka embilwini ka vunghana ni nsirhelelo wa moya lowu kumekaka exikarhi ka vanhu va Xikwembu. (1 Tim. 3:15; 1 Pet. 2:17; 5:9) Tanihi Timbhoni ta Yehovha, a hi endleni hinkwaswo leswi hi nga swi kotaka leswaku hi kongomisa swichudeni swa Rito ra Xikwembu enhlengeletanweni leyi vitaniwaka hi vito ra hina.
[Blurb on page 3]
Swichudeni swi hatlisa swi kula emoyeni loko swi tivonela nhlengeletano hi swoxe
[Blurb on page 4]
U nga hlweli ku rhambela swichudeni eminhlanganweni