“Eka Xikwembu Swilo Hinkwaswo Swa Koteka”
1 Ntirho lowukulu lowu vandlha ra Vukreste ri wu endlaka i ku chumayela rungula ra Mfumo emisaveni hinkwayo. (Mat. 24:14) Ntirho wolowo a hi matlangwana. Eka vanhu vo tala, wu vonaka onge wu koxa swilo leswi hi nga riki na swona. Eka van’wana, xiavelo lexi xi vonaka xi nge koteki ku xi hetisisa hikwalaho ka leswi hi tshamelaka ku hlekuriwa, ku kanetiwa ni ku xanisiwa. (Mat. 24:9; 2 Tim. 3:12) Vaxopaxopi va khorwisekile leswaku ntirho lowu wu nge hetiseki nikatsongo. Hambiswiritano, Yesu u te: “Eka Xikwembu swilo hinkwaswo swa koteka.”—Mat. 19:26.
2 Swikombiso Leswinene Leswi Nga Tekeleriwaka: Loko Yesu a sungula vutirheli bya yena a a kanetiwa hi vanhu vo tala. Vakaneti va yena va tirhise ndlela yin’wana ni yin’wana leyi kotekaka leswaku va n’wi kavanyeta, eku heteleleni va n’wi dlaya hi ndlela yo vava ngopfu. Nilokoswiritano, eku heteleleni Yesu u vule hi ku tiyiseka a ku: “Misava ndzi yi hlurile.” (Yoh. 16:33) Kunene koloko a ku ri ku hlula loku hlamarisaka!
3 Vadyondzisiwa va Yesu va kombise moya lowu fanaka wa ku va ni xivindzi ni ku hiseka evutirhelini bya Vukreste. Vo tala va bukuteriwile, va mbeyiwa, va hoxiwa ekhotsweni hambi ku ri ku dlayiwa kunene. Nilokoswiritano, a “va tsakile hikuva va hlayiwe lava faneriwaka hi ku khomisiwa tingana hikwalaho ka vito ra yena.” (Mint. 5:41) Hambileswi va langutaneke ni swiyimo sweswo, va hetisise ntirho lowu a wu vonaka wu nge koteki wa ku chumayela mahungu lamanene “ku ya fika endhawini ya le kule swinene ya misava.”—Mint. 1:8; Kol. 1:23.
4 Ndlela Leyi Hi Nga Humelelaka Ha Yona Namuntlha: Na hina hi hisekela ku chumayela hi Mfumo, hambileswi hi langutaneke ni swiyimo leswi vonakaka swi nga ta papalateka. Ku nga khathariseki ku yirisiwa, ku xanisiwa, ku khotsiwa ni matshalatshala man’wana ya tihanyi yo ringeta ku hi sivela, hi hambeta hi humelela. Xana hi swi kotisa ku yini? “‘Ku nga ri hi vandla ra nyimpi, kumbe hi matimba, kambe hi moya wa mina,’ Yehovha wa mavuthu u vurile.” (Zak. 4:6) Leswi Yehovha a hi nyikaka matimba, a xi kona lexi nga ta sivela ntirho wa hina!—Rhom. 8:31.
5 Loko hi chumayela, a xi kona xivangelo xa leswaku hi chava kumbe hi hela matimba kumbe hi titwa hi nga faneleki. (2 Kor. 2:16, 17) Hi ni swivangelo leswinene swa leswaku hi ya emahlweni ni ku chumayela mahungu lamanene ya Mfumo. Hi mpfuno wa Yehovha, hi ta kota ku endla leswi nga ‘kotekiki’!—Luka 18:27.