Bokisi Ra Swivutiso

◼ Ntlawa lowuntshwa wa Dyondzo ya Buku ya Vandlha wu nga sunguriwa loko swi te yini?

Ku sungula ntlawa lowuntshwa ku fanele ku anakanyeriwa loko swi fanerile leswaku nhlayo ya lava vaka kona eka wona yi ta va kwalomu ka 15 kumbe ehansinyana entlaweni ha wun’we wa dyondzo ya buku, ku katsa ni lowu tirhisaka Holo ya Mfumo. Ha yini ku bumabumeriwa leswi?

Loko mintlawa ya Dyondzo ya Buku ya Vandlha yi tshama yi ri yitsongo, mufambisi u kota ku nyikela nyingiso eka un’wana ni un’wana la vaka kona. Tlhandlakambirhi, vanhu hinkwavo va pfulekeriwa hi lunghelo lerinene ra leswaku va nyikela tinhlamuselo leti swi phofulaka kahle leswi va swi pfumelaka. (Hev. 10:23; 13:15) Ku va ni mintlawa leyitsongo etindhawini to hambana-hambana ensin’wini ya vandlha, swi endla leswaku swi nga tiki ku ya eDyondzweni ya Buku ya Vandlha ni le minhlanganweni ya ntirho wa nsimu. Mavandlha lama nga ni swivandla swo hlayanyana swo khomela dyondzo ya buku, ma kume leswaku nhlayo hinkwayo ya lava vaka kona ya tlakuka na yona.

Ku nga va ni swiyimo swo hlawuleka leswi nga endlaka leswaku ku sunguriwa ntlawa lowuntshwa, hambiloko wu ta va ni vanhu vatsongo. Sweswo swi nga tirha endhawini leyi nga ekule kumbe laha tindhawu leti tirhisiwaka ti nga ni vanhu vo tala kumbe ti kayivelaka vutshamo. Loko ku ri ni xilaveko, ku nga sunguriwa ntlawa lowu nga ta khomiwa ninhlikanhi, leswaku ku ta vuyeriwa lava kuleke, lava tirhaka ni vusiku kumbe vamakwerhu va xisati lava vanuna va vona va nga riki Timbhoni.

Ntlawa ha wun’we wu fanele wu va ni vahuweleri vo hlayanyana lava tiyeke emoyeni ni lava hisekaka swin’we ni mufambisi la fanelekaka ni muhlayi wa tindzimana la fanelekaka. Vamakwerhu va fanele ku tirha hi matimba leswaku va fanelekela mintirho leyi evandlheni.

Vakulu va nga hoxa xandla eku kuleni ka vandlha hi ku tiyiseka leswaku mintlawa ya dyondzo ya buku ya vandlha yi kule hilaha ku ringaneke nileswaku vumoya bya yona byi khathaleriwa kahle, naswona yi hlangana etindhawini leti faneleke. Kun’wana ni kun’wana laha swi faneleke kona, mintlawa leyintshwa yi nga sunguriwa leswaku vanhu hinkwavo va ta vuyeriwa hi ku helela hi lunghiselelo leri ro hlawuleka ra moya. Xana u nga pfula kaya ra wena leswaku dyondzo ya buku yi khomeriwa eka rona? Vo tala lava endleke tano va katekisiwile hi tlhelo ra moya.