Hlanganyela Hi Xitalo eNtshovelweni
1 Vaprofeta va Yehovha va khale ku katsa na Yesu Kreste hi byakwe va vulavule hi ntirho wa ku hlengeleta vanhu. (Esa. 56:8; Ezek. 34:11; Yoh. 10:16) Sweswi ntirho lowu wa hetisisiwa tanihi leswi mahungu lamanene ya Mfumo ma chumayeriwaka emisaveni hinkwayo. (Mat. 24:14) Ku hambana exikarhi ka lava tirhelaka Xikwembu ni lava nga xi tirheliki ku ya ku vonaka swinene. (Mal. 3:18) Xana leswi swi vula yini eka hina?
2 Vutihlamuleri Bya Munhu Hi Xiyexe: Hi nga dyondza exikombisweni xa Pawulo, loyi a a tinyiketele hi ku helela eku pfuleni ka ndlela ya vutirheli bya Vukreste. A a titwa a ri ni vutihlamuleri bya ku chumayela, leswaku vanhu hinkwavo va kota ku yingisa mahungu lamanene ivi va ponisiwa. Sweswo swi n’wi susumetele ku tirha hi matimba nkarhi hinkwawo leswaku a va pfuna. (Rhom. 1:14-17) Hikwalaho ka khombo leri vanhu va langutaneke na rona namuntlha, xana a hi titwi hi ri ni vutihlamuleri lebyikulu bya ku chumayela vanhu lava nga ensin’wini ya hina?—1 Kor. 9:16.
3 Nkarhi Wa Ku Teka Goza Hi Xihatla: Ntirho wa ku chumayela wu nga fanisiwa ni tsima ra ku lava ni ku ponisa vanhu lava weriweke hi mhangu. Vanhu va fanele ku laviwa hi ku hatlisa kutani va pfuniwa ku ya endhawini leyi hlayisekeke. Nkarhi wu pimiwile. Vutomi byi le khombyeni! Hi yona mhaka leyi Yesu a khongoteleke vadyondzisiwa va yena leswaku va ‘kombela N’wini wa ntshovelo leswaku a rhumela vatirhi entshovelweni wakwe.’—Mat. 9:38.
4 Hikwalaho ko xiya leswaku ntirho wa namuntlha wu fanele ku endliwa hi xihatla, vatirhi vo tala va Mfumo va antswise ndlela leyi va hlanganyelaka ha yona entirhweni lowu, lowu ponisaka vutomi. N’wana wa kondlo-a-ndzi-dyi, loyi vito rakwe ku nga Hirohisa, a a tshama ni vamakwavo lavatsongo va mune ni mana wa vona ntsena. A a wundla ndyangu wa ka vona hi ku pfuka hi awara ya nharhu nimixo a yisa maphepha-hungu etindhawini to hambana-hambana. Nilokoswiritano, Hirohisa a a lava ku endla leswi engetelekeke evutirhelini, hiloko a sungula ku va phayona ra nkarhi hinkwawo. Xana ku ni tindlela leti wena u nga hlanganyelaka ha tona hi xitalo entirhweni lowu, lowu nga ta ka wu nga ha engetiwi?
5 “Nkarhi lowu seleke wu komile.” (1 Kor. 7:29) Hikwalaho, onge hi nga endla hinkwaswo leswi hi nga swi kotaka leswaku hi hlanganyela entirhweni lowu wa nkoka swinene, lowu endliwaka emisaveni namuntlha—ku nga ku chumayela mahungu lamanene ya Mfumo ni ku endla vadyondzisiwa. Yesu u fanise vutirheli lebyi ni ntirho wa ku tshovela. (Mat. 9:35-38) Hi ku hlanganyela hi xitalo entshovelweni, ntirho wa hina wu nga veka mihandzu leyi katsaka ku pfuna van’wana va va xiphemu xa ntshungu lowukulu wa vagandzeri lava hlamuseriweke eka Nhlavutelo 7:9, 10.