U “Xihlekiso”!

¹ Muapostola Pawulo u tsale a ku: “Hi ve xihlekiso endlwini ya mintlango emisaveni, ni le ka tintsumi ni le vanhwini.” (1 Kor. 4:9) Xana sweswo swi vula yini, naswona swi fanele swi hi khumbisa ku yini evutirhelini bya hina namuntlha?

² Eka munhu wa le Korinto, swi nga ha endleka leswaku xiga lexi nge “xihlekiso endlwini ya mitlangu” xi n’wi tsundzuxe ku koriseriwa ka mphikizano wa le Rhoma wo nyanyula vahlaleri hi ku dlaya vabohiwa, lava a ku rhanga ku tlangiwa hi vona emahlweni ka magidi ya vahlaleri, va nga si dlayiwa hi ndlela ya tihanyi. Hilaha ku fanaka, ntshungu lowukulu—vavanuna ni vavasati—a wu hlalela loko Vakreste va lembe-xidzana ro sungula va xanisiwa hi leswi va nyikeleke vumbhoni hi Mfumo. (Hev. 10:32, 33) Ku tshama ka vona va tshembekile ku khumbe vanhu vo tala, ku fana ni leswi ku tiyisela ka hina namuntlha ku khumbaka vanhu vo tala. Hi xihlekiso eka vamani?

³ Eka Misava Ni Vanhu: Minkarhi yin’wana vahaxi va mahungu va humesa swiviko leswi vulavulaka hi mintirho ya vanhu va Yehovha. Hambileswi hi swi tlangelaka swiviko leswi nga ntiyiso ni leswi lulameke malunghana ni ntirho wa hina, hi langutele leswaku minkarhi yin’wana valala va hina va ta hangalasa swiviko swo biha ha hina. Nilokoswiritano, hi fanele ku hambeta hi tibumabumela tanihi vatirheli va Xikwembu hambiloko ku ri ni ‘xiviko xo biha kumbe lexinene.’ (2 Kor. 6:4, 8) Eka vanhu vo tshembeka lava va hi vonaka, swi va erivaleni leswaku hi vadyondzisiwa va ntiyiso va Yesu Kreste.

⁴ Eka Tintsumi: Swivumbiwa swa moya na swona swa hi vona. Diyavulosi ni madimona ya yena va hlalerile—kambe va hlalela va “hlundzukile swinene,” va lava ku yimisa “ntirho wa ku nyikela vumbhoni mayelana na Yesu.” (Nhlav. 12:9, 12, 17) Tintsumi to tshembeka ta Xikwembu ti hlalela ti tsakile loko mudyohi un’we a hundzuka. (Luka 15:10) Swi fanele swi hi tiyisa nhlana ku tiva leswaku tintsumi ti teka vutirheli bya hina byi ri bya xihatla swinene, byi ri ntirho lowu vuyerisaka lowu endliwaka emisaveni namuntlha!—Nhlav. 14:6, 7.

⁵ Loko u langutana ni ku kanetiwa kumbe u anakanya leswaku vutirheli bya wena a byi veki mihandzu, tsundzuka leswaku u langutiwe hi mahlo yo tala evuakweni hinkwabyo. Ku tiyisela ka wena hi vutshembeki ku vula swo tala hi vutshembeki bya wena. Eku heteleleni, ‘nyimpi ya wena leyinene ya ripfumelo’ yi ta ku pfuna leswaku u “khomelela swinene evuton’wini lebyi nga heriki.”—1 Tim. 6:12.