Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w25 May matl. 2-7
  • Tekelela Tintsumi To Tshembeka

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Tekelela Tintsumi To Tshembeka
  • Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2025
  • Swihloko
  • Tinhlokomhaka Tin'wana Leti Yelana Na Yona
  • TINTSUMI TA TITSONGAHATA
  • TINTSUMI TI RHANDZA VANHU
  • TINTSUMI TA TIYISELA
  • TINTSUMI TA PFUNETA LESWAKU VANDLHA RI TSHAMA RI BASILE
  • Tintsumi I “Mimoya Ya Ntirho Wa Le Rivaleni”
    Xihondzo xo Rindza Xi Huwelela Mfumo Wa Yehovha
  • Tintsumi—Xana Ti Khumba Vutomi Bya Hena?
    Xihondzo xo Rindza Xi Huwelela Mfumo Wa Yehovha—1987
  • Ndlela Leyi Tintsumi Ti Nga Ku Pfunaka Ha Yona
    Xihondzo xo Rindza Xi Huwelela Mfumo Wa Yehovha—1998
  • Tintsumi—Ndlela Leyi Ti Hi Pfunaka Ha Yona
    Xihondzo xo Rindza Xi Huwelela Mfumo Wa Yehovha—2006
Vona Swo Tala
Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2025
w25 May matl. 2-7

NHLOKOMHAKA LEYI DYONDZIWAKA YA VU 19

RISIMU 6 Matilo Ma Vangamisa Xikwembu

Tekelela Tintsumi To Tshembeka

“Dzunisani Yehovha, n’wina tintsumi takwe hinkwato.”—PS. 103:20.

LESWI HI NGA TA SWI DYONDZA

Hi ta xiya swilo leswi hi swi dyondzaka eka tintsumi to tshembeka.

1-2. (a) Hi hambane njhani ni tintsumi? (b) I yini leswi hi fanaka ni tintsumi ha swona?

LOKO Yehovha a ku kokela entiyisweni, u ku rhambele endyangwini lowu nga ni vagandzeri vo hambanahambana lava nga ni rirhandzu, lava katsaka ni tintsumi to tshembeka ta timiliyoni. (Dan. 7:​9, 10) Loko hi ehleketa hi tintsumi, hi nga ha vona ntsena ndlela leyi ti hambaneke hayona na hina. Hi xikombiso, tintsumi ti ni malembe yo tala ti ri kona ku tlula hina. (Yobo 38:​4, 7) Ti ni matimba ku hi tlula. Ta kwetsima naswona ti lulame ku hi tlula, lerova hina vanhu lava nga ni xidyoho hi nge swi koti ku fana na tona.—Luka 9:26.

2 Hambiswiritano, hambileswi hi hambaneke ni tintsumi kambe ku ni swilo swo tala leswi hi fanaka na tona ha swona. Hi xikombiso, ku fana ni tintsumi ha swi kota ku kombisa vumunhu bya Yehovha. Ku fana na tona, ha swi kota ku tihlawulela, hi ni mavito, vumunhu lebyi nga faniki ni vutihlamuleri byo hambanahambana naswona hi endliwe hi ri ni ku navela ku gandzela Muvumbi wa hina.—1 Pet. 1:12.

3. Hi dyondza yini eka tintsumi to tshembeka?

3 Leswi hi fanaka ni tintsumi hi tindlela to tala, xikombiso xa tona lexinene xa hi khutaza ni ku hi dyondzisa. Entiyisweni, hi nga dyondza swilo swo tala leswinene eka tona. Eka nhlokomhaka leyi, hi ta xiya ndlela leyi hi nga tekelelaka hayona ku titsongahata ka tintsumi to tshembeka, ndlela leyi ti rhandzaka vanhu hayona, ku tiyisela ka tona ni matshalatshala lawa ti ma endlaka leswaku vandlha ri tshama ri basile.

TINTSUMI TA TITSONGAHATA

4. (a) Tintsumi ti swi kombisa njhani leswaku ta titsongahata? (b) Hikwalahokayini tintsumi ti titsongahata? (Pisalema 89:7)

4 Tintsumi to tshembeka ta titsongahata. Hambileswi ti nga ni ntokoto, matimba naswona ti tlhariheke, ti yingisa swiletelo swa Yehovha. (Ps. 103:20) Loko ti ri karhi ti endla mitirho ya tona, a ti bombisi matimba kumbe leswi ti swi endleke. Ti endla ku rhandza ka Xikwembu ti tsakile hambiloko vanhu va nga swi tivi leswi ti swi endleke.a (Gen. 32:​24, 29; 2 Tih. 19:35) A ti ku amukeli ku dzunisiwa loku faneleke Yehovha. Hikwalahokayini tintsumi ti titsongahata hi ndlela leyi? Hikuva ti rhandza Yehovha ni ku n’wi xixima swinene.—Hlaya Pisalema 89:7.

5. Ntsumi yin’wana yi swi kombise njhani leswaku ya titsongahata loko yi lulamisa muapostola Yohane? (Nakambe vona xifaniso.)

5 Ehleketa ndlela leyi rungula leri landzelaka ri kombisaka ndlela leyi ntsumi yi titsongahateke hayona. Kwalomu ka 96 C.E., ntsumi leyi vito ra yona ri nga boxiwangiki yi kombe muapostola Yohane xivono xo hlamarisa. (Nhlav. 1:1) Yohane u endle yini endzhaku ko vona xivono? U ringete ku khinsamela ntsumi leswaku a yi gandzela. Hambiswiritano, ntsumi yoleyo yo tshembeka yi hatle yi n’wi tshikisa yi ku: “U nga swi endli sweswo! Na mina ndzo va nandza ku fana na wena ni vamakwenu. . . . Gandzela Xikwembu!” (Nhlav. 19:10) Mawaku ku titsongahata ko tano! Ntsumi a yi nga lavi ku dzunisiwa kumbe ku tekeriwa enhlokweni. Yi hatle yi byela Yohane leswaku a yisa ku dzuneka eka Yehovha Xikwembu. Hi hala tlhelo, ntsumi a yi n’wi tekelanga hansi Yohane. Hi ku titsongahata yi byele Yohane leswaku yo va nandza ku fana na yena hambileswi yi tirheleke Yehovha malembe yo tala naswona a yi ri ni matimba lamakulu ku n’wi tlula. Hambileswi ntsumi a yi fanele yi lulamisa Yohane, a yi n’wi holovelanga kumbe yi n’wi khomisa tingana. Ematshan’weni ya sweswo, yi vulavule na yena hi ndlela ya musa. Yi swi twisisile leswaku Yohane a a hlamarisiwe hileswi a swi voneke.

Ntsumi yi arisa muapostola Yohane loko a lava ku yi khinsamela leswaku a yi gandzela.

Ntsumi yi kombise leswaku ya titsongahata loko yi lulamisa Yohane (Vona ndzimana 5)


6. Hi nga swi kombisa njhani leswaku ha titsongahata ku fana ni tintsumi?

6 Hi nga swi kombisa njhani leswaku ha titsongahata ku fana ni tintsumi? Na hina hi nga endla swiavelo leswi hi nyikiweke swona hi nga tikukumuxi kumbe ku lava ku khensiwa hikwalaho ka swilo leswi hi nga tshama hi swi endla. (1 Kor. 4:7) Ku engetela kwalaho, a hi fanelanga hi tivona hi antswa ku tlula van’wana hikwalaho ka malembe lawa hi ma heteke hi ri karhi hi tirhela Yehovha kumbe hileswi hi endlaka mitirho yin’wana yo hlawuleka enhlanganweni wakwe. Entiyisweni, loko hi ya hi va ni vutihlamuleri byo tala, hi fanele hi ya hi titsongahata. (Luka 9:48) Ku fana ni tintsumi, hi lava ku tirhela vamakwerhu. A hi lavi ku tekiwa hi ri va nkoka ku tlula van’wana.

7. Hi nga swi kombisa njhani leswaku ha titsongahata loko hi fanele hi tshinya munhu un’wana?

7 Hi nga kombisa leswaku ha titsongahata loko hi fanele hi tshinya munhu un’wana, ku nga ha va makwerhu kumbe n’wana wa hina. Loko hi n’wi tshinya, swi nga ha lava hi tiyisa voko. Kambe ku fana ni ntsumi leyi lulamiseke Yohane hi musa, na hina hi nga tiyisa voko handle ko endla munhu loyi hi n’wi tshinyaka a titwa a nga pfuni nchumu. Loko hi nga titeki hi tlakukile, hi ta nyika van’wana ndzayo leyi humaka eBibeleni hi ndlela ya rirhandzu ni leyi nga ta va siya va ri ni xindzhuti.—Kol. 4:6.

TINTSUMI TI RHANDZA VANHU

8. (a) Hi ku ya hi Luka 15:​10, tintsumi ti swi kombisa njhani leswaku ti rhandza vanhu? (b) Tintsumi ti hi pfuna njhani entirhweni wo chumayela? (Nakambe vona xifaniso.)

8 Tintsumi ti ni mhaka ni vanhu. Kahlekahle ta va rhandza. Ta tsaka loko mudyohi a hundzuka kutani a vuyela eka Yehovha kumbe loko munhu a cinca mahanyelo yakwe kutani a hanya hi ntiyiso. (Hlaya Luka 15:10.) Tintsumi ta katseka swinene entirhweni wo chumayela. (Nhlav. 14:6) Hambileswi ti nga chumayeliki vanhu hi ku kongoma kambe ti nga kongomisa muhuweleri eka munhu loyi a lavaka ku dyondza hi Yehovha. A hi nge vuli leswaku tintsumi ti hi yise eka vanhu vo karhi hi ku kongoma. Phela, Yehovha a nga ha tirhisa tindlela tin’wana to fana ni ku tirhisa moya wo kwetsima ku pfuna vanhu kumbe malandza yakwe. (Mit. 16:​6, 7) Kambe wa ha ti tirhisa hi ndlela leyikulu tintsumi takwe. Kutani, loko hi chumayela mahungu lamanene, hi nga tiyiseka leswaku tintsumi ti ta hi seketela.—Vona bokisi leri nge, “Swikhongelo Swa Vona Swi Hlamuriwile.”b

Vatekani va chovha xigolonyana edorobeni. Tintsumi ti kongomisa makwerhu wa xisati leswaku a xiya sesi loyi a tshameke ebencini a tshikilelekile.

Vatekani va ha ku heta ku chumayela endhawini ya mani na mani. Loko va muka, makwerhu wa xisati u vona wansati loyi a vonakaka onge u karhatekile. Makwerhu wa xisati u tsundzuka leswaku tintsumi ti nga hi kongomisa eka lava kumbexana va nga eku laveni ka Xikwembu. Kutani u ya a ya vulavula na yena hi ndlela ya musa (Vona ndzimana 8)


Swikhongelo Swa Vona Swi Hlamuriwile

Xana swi nga endleka tintsumi ti katsekile eka yin’wana ya mitokoto leyi landzelaka?

  • Loko va ri karhi va chumayela hi foni, muhuweleri loyi a nga ni malembe ya 12 ni mana wakwe lava tshamaka ePeru va vulavule ni wansati loyi a a kombele Xikwembu leswaku xi rhumela munhu loyi a nga ta n’wi pfuna. Loko muhuweleri a heta ku fona, wansati yoloye u teke sweswo tanihi nhlamulo ya swikhongelo swa yena kutani u pfumele ku dyondza Bibele. Endzhaku ka sweswo, u sungule ku ya etinhlengeletanweni ta vandlha.

  • Wansati un’wana eRomania u dyondze Bibele swa nkarhinyana ivi a tshika. Hi ku famba ka nkarhi loko a tirha emakhixini eItaly, u navele ku tlhela a dyondza Bibele. Leswi a a nga ti tivi Timbhoni ta le ndhawini yoleyo, u khongele eka Yehovha leswaku a n’wi pfuna. Endzhaku ka sweswo, ndyangu lowu a a tirha eka wona wu n’wi kombele leswaku a ya wu xavela swo karhi exitolo. Wu n’wi byele leswaku a papalata ku vulavula ni n’wini wa xitolo. Wu te, “I Mbhoni ya Yehovha naswona u rhandza ku vulavula ni vaxavi vakwe hi Bibele.” Swi ve hi ndlela yoleyo, makwerhu u n’wi chumayerile naswona wansati u swi teke ku ri nhlamulo ya swikhongelo swakwe. U tlhele a sungula ku dyondza Bibele naswona u endle nhluvuko lowukulu. Hikwalaho ka xikombiso xa yena lexinene, un’wana wa vana va yena va majaha u sungule ku dyondza Bibele ni ku tlhela a ya etidyondzweni.

  • Vatekani lava nga Timbhoni va endle xiboho xo xavisa movha wa vona. Loko vatekani vo karhi va tele ku ta vona movha, vatekani lava nga Timbhoni va va hlamusele xivangelo lexi endlaka va hunguta swilo leswi va nga na swona hileswi va lavaka ku heta nkarhi wo tala entirhweni wo chumayela. Nuna wa kona u te: “Tolo ndzi khongele ndzi ku: ‘Xikwembu ndzi kombela u ndzi hlanganisa ni munhu loyi a nga ta ndzi pfuna. Ndzi titwa ku ri ni leswi kayivelaka, ndzi lava ku tiva ntiyiso.’” U teke ku hlangana ni vamakwerhu lava tanihi nhlamulo ya xikhongelo xakwe. Yena ni nsati wakwe va pfumele ku dyondzeriwa Bibele naswona vana va vona vambirhi va vanhwanyana na vona va sungule ku dyondza. Sweswi ndyangu lowu wu va kona etinhlengeletanweni ta vandlha.

9. Hi nga swi kombisa njhani leswaku hi rhandza vanhu ku fana ni tintsumi?

9 Hi nga swi kombisa njhani leswaku hi rhandza vanhu ku fana ni tintsumi? Loko hi twa xitiviso xa leswaku makwerhu wo karhi u vuyiseriwile, ha tsaka ku fana ni tintsumi. Hi nga endla swo tala ku hoyozela makwerhu loyi a vuyeke ni ku tlhela hi n’wi tiyisekisa leswaku ha n’wi rhandza. (Luka 15:​4-7; 2 Kor. 2:​6-8) Hi nga tlhela hi tekelela tintsumi hi ku endla hinkwaswo leswi hi nga swi kotaka entirhweni wo chumayela. (Ekl. 11:6) Ku fana ni leswi tintsumi ti hi seketelaka entirhweni wo chumayela mahungu lamanene, na hina hi nga lava tindlela to seketela vamakwerhu entirhweni wo chumayela. Hi xikombiso, xana hi nga hlela ku tirha nsimu ni muhuweleri loyi a nga riki ni ntokoto? Xana hi nga seketela vamakwerhu lava dyuhaleke kumbe lava lamaleke leswaku na vona va kota ku chumayela?

10. Hi dyondza yini eka mhaka ya Sara?

10 Ku vuriwa yini loko swiyimo swa hina swi nga hi pfumeleli ku endla swo tala? Hi nga kuma tindlela tin’wana to tirha swin’we ni tintsumi entirhweni wo chumayela. Xiya leswi endlekeleke makwerhu wa xisati Sara,c wa le India. Endzhaku ko phayona malembe ya kwalomu ka 20, Sara u sungule ku vabya naswona a a nga ha koti ku famba. A swi kanakanisi leswaku leswi swi n’wi tshikilerile swinene. Hakatsongotsongo, Sara u tlhele a sungula ku va ni langutelo lerinene hikwalaho ko hlaya Bibele ni nseketelo lowu a wu kumeke eka vamakwerhu evandlheni. I ntiyiso leswaku a a fanele a cinca ndlela leyi a a chumayela hayona yi fambisana ni swiyimo swakwe leswintshwa. Leswi a a nga ha swi koti ku tshama leswaku a tsala mapapila, a a chumayela hi foni ntsena. Kutani u fonele lava kombiseke ku tsakela naswona vona va n’wi byele hi van’wana lava na vona a va tsakela ku dyondza Bibele. Xana ku endleke yini? Eka tin’hweti ti nga ri tingani, Sara se a a ri ni vanhu va 70 lava a a dyondza na vona Bibele naswona a va tele lerova a a nga ha koti na ku dyondza na vona hinkwavo! U kombele vamakwerhu evandlheni leswaku va n’wi pfuna. Vo tala va vanhu volavo va va kona etinhlengeletanweni ta vandlha. Tintsumi ta tsaka swinene ku tirha ni vamakwerhu vo tanihi Sara lava endlaka hinkwaswo leswi va nga swi kotaka entirhweni wo chumayela!

TINTSUMI TA TIYISELA

11. Tintsumi to tshembeka ti swi kombise njhani leswaku ta tiyisela swinene?

11 Tintsumi to tshembeka i swikombiso leswinene loko swi ta emhakeni ya ku tiyisela. Ti tiyisele swilo swo biha ku ringana malembe ya magidi. Ti vone Sathana ni tintsumi tin’wana to tala leti a ti tirha swin’we ti xandzukela Yehovha. (Gen. 3:1; 6:​1, 2; Yuda 6) Bibele yi hi byela hi ntsumi yin’wana yo tshembeka leyi siveriweke hi dimona leri nga ni matimba swinene. (Dan. 10:13) Ku engetela kwalaho, ku sukela loko vanhu va ve kona, tintsumi ti lo vona nhlayo leyitsongo ya vanhu lava seketelaka vugandzeri bya ntiyiso. Hambiloko ku endleka swilo leswi hinkwaswo, tintsumi leti to tshembeka ti ya emahlweni ti tirhela Yehovha hi ku hiseka naswona ti tsakile. Ta swi tiva leswaku hi nkarhi lowu faneleke, Xikwembu xi ta susa vubihi hinkwabyo.

12. I yini leswi nga hi pfunaka hi tiyisela?

12 I yini leswi nga hi pfunaka hi tiyisela ku fana ni tintsumi? Ku fana na tona, hi nga ha khomiwa ku biha kumbe hi kanetiwa. Kambe ku fana ni tintsumi, ha tiyiseka leswaku hi nkarhi lowu faneleke, Xikwembu xi ta herisa swilo hinkwaswo swo biha. Kutani ku fana ni tintsumi to tshembeka, a hi “tshiki ku endla leswinene.” (Gal. 6:9) Nakambe Xikwembu xi tshembisa ku hi pfuna hi tiyisela. (1 Kor. 10:13) Hi nga khongela eka Yehovha leswaku a hi nyika moya wakwe lowu hi pfunaka ku lehisa mbilu hi tlhela hi va ni ntsako. (Gal. 5:22; Kol. 1:11) Ku vuriwa yini loko u kanetiwa? U nga chuhi kambe tshemba Yehovha hilaha ku heleleke. Mikarhi hinkwayo Yehovha u ta ku seketela ni ku ku tiyisa.—Hev. 13:6.

TINTSUMI TA PFUNETA LESWAKU VANDLHA RI TSHAMA RI BASILE

13. I ntirho wihi wo hlawuleka lowu tintsumi ti wu endlaka emasikwini lawa yo hetelela? (Matewu 13:​47-49)

13 Emasikwini lawa yo hetelela, Yehovha u nyike tintsumi ntirho wo hlawuleka. (Hlaya Matewu 13:​47-49.) Vanhu va timiliyoni emisaveni hinkwayo va tsakisiwa hi mahungu lamanene. Van’wana va vona va hetelela va ve Vakreste va ntiyiso kasi van’wana a va teki goza. Tintsumi ti nyikiwe ntirho wo “hambanisa lavo homboloka eka lavo lulama.” Leswi swi vula leswaku ti nyikiwe ntirho wo sirhelela vandlha leswaku ri tshama ri basile. Leswi a swi vuli swona leswaku un’wana ni un’wana loyi a tshikaka ku tihlanganisa na hina hikwalaho ka swivangelo swo karhi, a nge he tlheli a vuya kumbe leswaku a ku nge pfuki ku ve ni swiphiqo evandlheni. Kambe ha tiyiseka leswaku tintsumi ti tirha hi matimba leswaku mavandlha ma tshama ma basile.

14-15. Ku fana ni tintsumi, hi nga swi kombisa njhani leswaku hi lava vandlha ri tshama ri basile? (Nakambe vona swifaniso.)

14 Ku fana ni tintsumi, hi nga swi kombisa njhani leswaku hi lava vandlha ri tshama ri basile? Hi ku hoxa xandla leswaku ri tshama ri basile. Hi endla tano hi ku va hi tirha hi matimba ku hlayisa timbilu ta hina hi ku hlawula vanghana lavanene ni ku tlhela hi bakanya mikucetelo leyi nga riki yinene leyi nga onhaka vuxaka bya hina na Yehovha. (Ps. 101:3) Hi nga tlhela hi pfuna vamakwerhu leswaku va tshama va tshembekile eka Yehovha. Hi xikombiso, hi fanele hi endla yini loko hi tiva leswaku makwerhu u endle xidyoho lexikulu? Leswi hi n’wi rhandzaka, hi ta n’wi byela leswaku a ya vulavula ni vakulu. Loko a nga yi eka vakulu, hina hi boheka ku va byela. Hi lava leswaku makwerhu loyi a nga ha riki na vuxaka lebyinene na Yehovha a hatla a kuma mpfuno!—Yak. 5:​14, 15.

15 Lexi twisaka ku vava, van’wana lava endlaka swidyoho leswikulu va susiwa evandlheni. Eka swiyimo swo tano, hi “tshika ku tihlanganisa” na vona.d (1 Kor. 5:​9-13) Lunghiselelo leri ri pfuna leswaku vandlha ri tshama ri basile. Ku engetela kwalaho, loko hi hlawula ku nga tihlanganisi ni lava susiweke, hi va kombisa rirhandzu. Loko hi nga tihlanganisi na vona, swi nga va pfuna va tiehleketa kutani va endla leswi faneleke. Loko va endla tano, ha tsaka swin’we na Yehovha ni tintsumi takwe.—Luka 15:7.

Swifaniso: 1. Vamakwerhu vambirhi vaxisati va tshame ebencini leri nga ephakeni va ri karhi va n’wa kofi. Loko loyi un’wana a ri karhi a vulavula loyi un’wana u langute etlhelo. 2. Endzhaku, makwerhu wa xisati loyi a a ri eku vulavuleni u yime ni vakulu vambirhi eHolweni ya Mfumo.

Hi fanele hi endla yini loko hi twa leswaku makwerhu u endle xidyoho lexikulu? (Vona ndzimana 14)e


16. Xana u ta tikarhatela ku tekelela tintsumi hi tindlela tihi?

16 I nkateko lowukulu swinene ku va Yehovha a hi pfumelela hi dyondza hi tintsumi ni ku va hi tirha swin’we na tona! A hi tekeleleni ku titsongahata ka tintsumi, ndlela leyi ti rhandzaka vanhu hayona, ku tiyisela ka tona ni ndlela leyi ti tirhaka hayona hi matimba leswaku vandlha ri tshama ri basile. Loko hi tekelela tintsumi to tshembeka, hi ta va xiphemu xa ndyangu lowu gandzelaka Yehovha hilaha ku nga heriki.

HI NGA TI TEKELELA NJHANI TINTSUMI . . .

  • loko swi ta emhakeni ya ku titsongahata?

  • loko swi ta eka ku rhandza vanhu?

  • loko swi ta eka ku tikarhatela ku hlayisa vandlha ri tshama ri basile?

RISIMU 123 Ku Titsongahatela Nkongomiso Wa Yehovha

a Eka tintsumi hinkwato ta timiliyoni leti nga kona, Bibele yi boxa timbirhi ntsena hi mavito, ku nga Mikayele na Gabriyele.—Dan. 12:1; Luka 1:19.

b U nga kuma mitokoto leyi engetelekeke eka Watch Tower Publications Index ehansi ka nhlokomhaka leyi nge, “Angels” kutani u ya eka xihlokwana lexi nge “angelic direction (examples).”

c Mavito man’wana ma cinciwile.

d Hilaha swi hlamuseriweke hakona eka Xiviko Xa Huvo Leyi Fumaka xa 2024 #2, loko munhu loyi a susiweke evandlheni a ya etidyondzweni, muhuweleri u ta tirhisa ripfalo rakwe leri leteriweke hi Bibele leswaku a endla xiboho xa loko a ta n’wi xeweta ni ku n’wi amukela.

e NHLAMUSELO YA XIFANISO: Makwerhu wa xisati u tsundzuxa munghana wa yena leswaku a ya vulavula ni vakulu. Endzhaku ka nkarhinyana, loko munghana wa yena a nga yanga eka vona, makwerhu wa xisati u byela vakulu hi mhaka yakwe.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela