Nongonoko Lowuntshwa Wa Siku Ra Nhlengeletano Yo Hlawuleka
Nhloko-mhaka ya nongonoko wa siku ra nhlengeletano yo hlawuleka ya lembe lerintshwa ra ntirho yi sekeriwe exisekelweni lexi tiyeke xa Matsalwa lexi nge: “Tivekeni eHansi Ka Xikwembu—Mi Kaneta Diyavulosi.” (Yak. 4:7) Lowu i nkongomiso lowunene eminkarhini leyi yo nonon’hwa! Ku yingisela ka hina swileriso swa Xikwembu swi endla leswaku hi lwa na Sathana hi ku kongoma. Nongonoko lowu wu ta hi dyondzisa ndlela leyi hi nga yimaka hi tiyile ha yona loko hi lwa ni marhengu yo biha ya Diyavulosi lama lovisaka ripfumelo. Hi tihi tindzalama tin’wana ta moya leti hi nga ta ti kuma enhlengeletanweni leyi?
Mulanguteri wa xifundzha u ta hi kombisa ndlela leyi “Ku Kombisa Ku Titsongahata Eka Xikwembu Tanihi Swirho Swa Ndyangu” ku nga tiyisaka mindyangu ha yona leswaku yi kota ku langutana ni mintshikilelo ya misava. Nkulumo yo sungula ya xivulavuri xa muendzi leyi nge, “Leswi Ku Kaneta Diyavulosi Swi Vulaka Swona,” yi ta hlamusela leswaku ha yini hi fanele ku teka goza leri tiyeke ra ku kaneta swikongomelo swa Sathana swa ku dlaya vumoya bya hina ni ndlela leyi hi nga swi endlisaka xiswona. Ku ni tinkulumo timbirhi leti kongomisiweke eka vantshwa, lava na vona va faneleke va xalamukela marhengu ya Diyavulosi. Vakreste vo tala lava sweswi va kuleke va papalate ku fambisana ni ku navela ka misava loko va ha ri vantshwa. Hi ta tsakela ku twa yin’wana ya mintokoto ya vona.
Ku titsongahatela vulawuri ka laveka eka vanhu hinkwavo. Xisweswo, nkulumo yo gimeta ya xivulavuri xa muendzi yi ta kandziyisa tindhawu ta mune leti ku titsongahata ka hina eka Xikwembu ku faneleke ku kombisiwa eka tona: (1) eka tihulumendhe, (2) evandlheni, (3) emintirhweni ya ku tihanyisa ni le (4) ndyangwini. Hakunene lowu i nongonoko lowu pfunaka!
Lava navelaka ku khuvuriwa hi siku leri ra nhlengeletano yo hlawuleka va fanele va tivisa mulanguteri la ungamelaka hi ku hatlisa hilaha swi nga kotekaka hakona. Hinkwerhu hi fanele ku fungha siku leri eka khalendara ya hina ivi hi kunguhata ku va kona eka nongonoko hinkwawo wa nhlengeletano. Mikateko leyi hi nga ta yi kuma yi ta va leyi nga heriki loko hi ri karhi hi titsongahata eka Yehovha hilaha ku heleleke.