Xana U Dya U Xurha Hi Tlhelo Ra Moya?

¹ Ku ni xivulavulelo lexi nge ‘munhu u n’wi vona hi leswi a dyaka swona.’ Hakunene, ndlela leyi hi dyaka ha yona yi khumba matimba ni rihanyo ra hina. Tanihi leswi Yesu a nga te: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha,” hilaha ku fanaka ndlela leyi hi dyaka ha yona hi tlhelo ra moya yi nga endla leswaku hi hanya kahle kumbe hi vabya emoyeni. (Mat. 4:4) Hikwalaho, xana u dya u xurha hi tlhelo ra moya? Xana u munhu la hlawula-hlawulaka loko swi ta eku dyeni? Xana u dya u ri karhi u ya hala ni hala? Kumbe, u tsakela ku kuma nkarhi wa ku dya swakudya leswinene swa moya ni leswi akaka minkarhi hinkwayo?

² Kambisisa Swakudya Swa Wena: Yehovha u tirhisa “hlonga ro tshembeka ni ro tlhariha” ku lunghiselela swakudya “hi nkarhi lowu faneleke” ni “nkhuvo wa swakudya swo nona.” (Mat. 24:45; Esa. 25:6) Leswaku hi vuyeriwa swinene eka malunghiselelo lawa ya rirhandzu, hi fanele ku endla matshalatshala ya leswaku hi dya hi xurha hi tlhelo ra moya.

³ Tivutise: ‘Xana siku rin’wana ni rin’wana ndza yi hlaya ndzimana ya siku ni tinhlamuselo ta yona? Xana siku rin’wana ni rin’wana ndzi hlaya Bibele ndzi tlhela ndzi anakanyisisa hi leswi ndzi swi hlayaka? Xana ndzi lunghiselela minhlangano ya vandlha hi ku dyondza rungula ra kona ka ha ri ni nkarhi? Xana se ndzi yi hlayile minkandziyiso ya hina leya ha ku humaka, ku katsa ni buku leyi nge Vuprofeta Bya Esaya—I Rivoningo Eka Vanhu Hinkwavo I?

⁴ Yesu u tshembisile: “Va tsaka lava khathalaka hi xilaveko xa vona xa moya . . . Va tsaka lava nga ni ndlala ni torha ra leswo lulama, hikuva va ta xurha.” (Mat. 5:3, 6) Hikwalaho, dyana u xurha hi tlhelo ra moya, hi ku tata mianakanyo ni mbilu ya wena hi vutivi bya Xikwembu.