Kurisa Matimba Ya Wena Ya Ku Twisisa

¹ Masiku lawa ya makumu ya maxangu, lawa hi hanyaka eka wona sweswi, ma tise mintshikilelo leyi engetelekeke ni miringo yo hambana-hambana emisaveni hinkwayo, eka vanhu va Xikwembu. (2 Tim. 3:1-5) Hinkwerhu hi lava xikhutazo leswaku hi ta yima hi tiyile eripfumelweni. (1 Kor. 16:13) Hi mpfuno wa Yehovha hi nga swi kota loko hi hambeta hi tiwundla hi Rito ra yena, hi titshega hi moya wa yena ni ku namarhela nhlengeletano ya yena.—Ps. 37:28; Rhom. 8:38, 39; Nhlav. 2:10.

² Swa twisiseka leswaku ha yini ku ndlandlamuxiwe nhloko-mhaka leyi nge “Mi Va Lava Kuleke Hi Ku Helela eMatimbeni Ya Ku Twisisa” eka siku ra nhlengeletano yo hlawuleka ya n’wexemu. A yi sekeriwe eka 1 Vakorinto 14:20 laha hi hlayaka marito ya muapostola Pawulo lama nge: “Vamakwerhu, mi nga vi vana lavatsongo ematimbeni ya ku twisisa, kambe mi va swihlangi evubihini; ntsena mi va lava kuleke hi ku helela ematimbeni ya ku twisisa.” Xana u titwe njhani hi nongonoko lowu?

³ “A wu khutaza hakunene!” “Leswi hi swona a hi swi pfumala!” Leti i tin’wana ta tindlela leti van’wana va titweke ha yona. Hambi ku ri munhu la nga riki Mbhoni la teke eka siku ra nhlengeletano yo hlawuleka ku ta vona n’wana wa yena wa 12 wa malembe hi vukhale a khuvuriwa, u vule leswaku nongonoko lowu wu n’wi tsakise ngopfu naswona u swi vonile leswaku wu ta vuyerisa ndyangu wa yena. Xana hi yona ndlela leyi u titwaka ha yona? A hi pfuxeteni tin’wana ta tinhla-nkulu ta nongonoko.

⁴ Ku Laveka Vutivi Lebyi Kongomeke Leswaku U Kurisa Matimba Ya Ku Twisisa: Eka nkulumo yo sungula leyi a yi ku, Kurisa Matimba Ya Wena Ya Ku Twisisa Sweswi,” xana xivulavuri xi vule leswaku i yini lexi lavekaka leswaku hi langutana ni mintlhontlho ya namuntlha? Xi vule leswaku ku laveka leswi tlulaka vuswikoti bya mianakanyo ya hina. Hi fanele hi hlakulela matimba ya hina ya ku twisisa Bibele hi tlhela hi ma kurisa, swi nga ri tano vubihi lebyi hi langutaneke na byona byi ta hi veka ehansi. Ku twisisa ko tano ku lava leswaku hi kuma nkongomiso wa Xikwembu. Ku fana ni Mupisalema, hi fanele hi khongela Yehovha hi mbilu hinkwayo leswaku a hi endla hi twisisa milawu ni switsundzuxo swa yena, leswaku hi ta kota ku n’wi tirhela hilaha ku heleleke.—Ps. 119:1, 2, 34.

⁵ Eka xihloko lexi landzeleke, mulanguteri wa xifundzha u kombise leswaku Yehovha u tirhisa Rito ni nhlengeletano ya yena ku hi nyika “Leswi Nga Hi Pfunaka Leswaku Hi Va Lava Kuleke Hi Ku Helela Eku Twisiseni Ka Bibele.” Ku twisisa ku hlamuseriwe tanihi “ku kota ku xiyisisa mhaka ivi u kuma ntiyiso wa yona hi ku lemuka swilo swo hambana-hambana leswi fambisanaka na yona, hi ndlela yoleyo u kuma mongo wa yona.” I mani la nga hi pfunaka ku kurisa vuswikoti lebyi? Yehovha u hi nyike tinyiko leti nga vavanuna leswaku hi kota ku hluvuka hi tlhelo ra moya. (Efe. 4:11, 12) Nhlengeletano ya yena ya la misaveni yi hi khutaza ku hlaya Rito ra Xikwembu siku rin’wana ni rin’wana ni ku va kona nkarhi ni nkarhi eminhlanganweni hinkwayo ya vandlha. (Ps. 1:2) Hi dyondzisiwa ndlela yo tirhisa Bibele ni minkandziyiso ya hina ya Vukreste, loko hi endla dyondzo ya munhu hi yexe niloko hi dyondza tanihi ndyangu ku katsa ni loko hi lunghiselela minhlangano ni vutirheli bya nsimu. Xana ma ku vuyerisile malunghiselelo lawa hinkwawo? Xana u namarhele xiyimiso xa nkarhi hinkwawo xa ku hlaya Bibele? Leswi i swa nkoka loko hi lava ku tshama hi sirheleriwile eku phasiweni hi mimboyamelo ya misava, tifexeni, tifilosofi ni minkucetelo leyi xisaka.—Kol. 2:6-8.

⁶ Matimba Ya Hina Ya Ku Twisisa Ma Fanele Ku Leteriwa: Eka nkulumo ya xona yo sungula leyi a yi ku, “Sirhelela Vumoya Hi Ku Letela Matimba Ya Wena Ya Ku Twisisa,” xivulavuri lexi endzeke xi hlamusele leswaku vanhu va misava a va swi koti ku hambanisa leswinene eka leswo biha. (Esa. 5:20, 21) Sweswo swi vangiwa hi leswi va alaka ku amukela ni ku landzela milawu ya Xikwembu leyi lulameke. Ku hambana na vona, hina lava nhlengeletano ya Yehovha yi hi leteleke hi tlhelo ra moya ha yi amukela milawu ya Xikwembu, ku nga yona yi kongomisaka leswi hi swi endlaka ni mahanyelo ya hina. Kutani hi nga swi kota ku kombisa leswaku hi swihi leswi nga swinene ni leswi amukelekaka ematihlweni ya Yehovha ni leswi pfumelelanaka ni ku rhandza ka yena loku hetisekeke.—Rhom. 12:2.

⁷ Leswaku hi papalata mavonelo ya misava lama soholotekeke ni vuyelo bya kona, ku nga mihandzu yo biha, hi fanele ku hambeta hi letela matimba ya hina ya ku twisisa. Sweswo hi nga swi endlisa ku yini? Hilaha swi tsariweke ha kona eka Vaheveru 5:12-14, muapostola Pawulo u kandziyise xilaveko xa ku tiwundla hi swakudya leswi tiyeke, ku nga ri hi “ntswamba” wa rito ntsena. Hi fanele ku dya swakudya leswi tiyeke swa moya swo fana ni leswi hi swi kumaka loko hi ri karhi hi dyondza vuprofeta bya Esaya eka Dyondzo ya Buku ya Vandlha. Kutani hi fanele ku hatla hi swi tirhisa leswi hi swi dyondzaka. Loko hi endla tano hi kombisa leswaku ha tiyiseka hi ku lulama ka milawu ni swileriso swa Yehovha. Sweswo swi letela matimba ya hina ya ku twisisa leswaku hi kota ku swi hambanisa kahle leswinene ni swo biha.

⁸ Khombo ra kona van’wana va horile emoyeni. Ha yini? Va tsandzeke ku namarhela leswinene ni leswi lulameke ematihlweni ya Yehovha. Hikwalaho ka sweswo, va phasiwe hi ku yingisa ni ku hlalela mabulo ya xiya-ni-moya ni ya thelevhixini, lama nga vuyerisiki nchumu evutivini bya Matsalwa, va ve mahlonga ya vuyimbeleri lebyi thyakeke kumbe va va mahlonga ya ku vulavurisana hi khompyuta. Hi nga papalata ku kuceteriwa hi vanhu va mahanyelo yo biha, lava hungukeke kumbe vo homboloka hi ku va lava tlhariheke.—Swiv. 13:20; Gal. 5:7; 1 Tim. 6:20, 21.

⁹ Vantshwa Va Fanele Ku Va “Swihlangi Evubihini”: Nongonoko lowu wu ve ni tinkulumo timbirhi leti hi ku kongoma ti khutazeke vantshwa leswaku va kurisa matimba ya vona ya ku twisisa. Xivulavuri xi kombise leswaku ku va swihlangi evubihini swi vula ku tshama hi pfumala ntokoto, hi leswaku hi pfumala vutivi ku fana ni swihlangi loko swi ta eka swilo leswi thyakeke ematihlweni ya Yehovha. (1 Kor. 14:20) Hinkwerhu hi khutaziwe ku xalamukela ndlela leyi hi tirhisaka nkarhi wa hina ha yona, leswaku hi tshama hi sirhelelekile eka mixaka hinkwayo ya vubihi ni ku papalata ku tluleriwa hi yona. (Efe. 5:15-17) Hi khutaziwe ku hlayela nkarhi lowu hi wu hetaka hi hlaya tibuku leti nga hi pfuniki hi ku kongoma leswaku hi kula ni ku twisisa swilo swa moya. Xana u endle tano? Xana vuyelo bya kona byi paluxe yini? Ku engetela eka ku hlaya Bibele siku ni siku, tiyimisele ku hlaya minkandziyiso leyi nhlengeletano yi yi kandziyisaka. Ku endla tano swi ta hi pfuna hinkwerhu ku katsa ni vantshwa leswaku hi “kuma ku twisisa.”—Swiv. 4:7-9.

¹⁰ “Vuyeriwa Hi Ku Tirhisa Misinya Ya Milawu Ya Bibele Hi Ku Twisisa”: Yoleyo a ku ri nhloko-mhaka ya nkulumo yo gimeta ya siku ra nhlengeletano yo hlawuleka. Xivulavuri lexi endzeke xi hlamusele leswaku Yehovha i xihlovo xa ku twisisa loku nyikaka vutomi, loku tlakukeke ngopfu eka bya vanhu hinkwavo. Tivone u ri ni lunghelo ra ku kuma ku twisisa ko tano eka Yehovha! Lava va ku lavaka hi mbilu hinkwayo va tlhela va ku kombela hi ripfumelo, u va nyika kona hi xandla lexi pfulekeke. (Swiv. 2:3-5, 9; 28:5) Xana wa swi lwela leswaku u yi kuma nyiko leyi?

¹¹ Hi khutaziwe ku dyondza ku vona misinya ya milawu loko hi ri karhi hi hlaya Bibele. (2 Tim. 3:16, 17) Yi dyondze hi vukheta leswaku u ta swi twisisa hi ku kongoma leswi Yehovha a swi vulaka. Tinyike nkarhi wa ku anakanyisisa hi misinya leyi ya milawu naswona u yi hlayisa emianakanyweni ni le mbilwini ya wena. Sweswo swi ta letela matimba ya wena ya ku twisisa leswaku u humelela loko u endla swiboho evuton’wini. (Yox. 1:8) A hi kambeleni swiyimo swi nga ri swingani leswi vo tala va langutanaka na swona kutani hi vona ndlela leyi ku tirhisa misinya ya milawu ya Bibele swi nga va pfunaka ha yona leswaku va humelela.

¹² ‘Xana ndzi fanele ku tekelela mukhuva wo karhi wa maambalelo ni ku tilunghisa?’ Hakanyingi mimboyamelo ya tifexeni ta maambalelo ni ku tilunghisa ka misava leyi yaka yi hohloka, yi kombisa moya wa ku xandzuka. Moya wo tano wu kucetela vanhu leswaku va ambala hi ndlela ya vudlakuta ni leyi nyenyetsaka kumbe va navetisa rimbewu. Hi yihi misinya ya milawu ya Bibele leyi nga lo dlaa, erivaleni, leyi nga hi pfunaka leswaku hi lwa ni mimboyamelo yo tano? Loko hi letele matimba ya hina ya ku twisisa, hi ta wu tekela enhlokweni nsinya lowu wa nawu, lowu kumekaka eka 1 Timotiya 2:9, 10, wa leswaku hi ambala hi “xichavo ni [hi] mianakanyo yo hluteka, . . . hi ndlela leyi fanelaka [vanhu] lava vulaka leswaku va chava Xikwembu.” Misinya yin’wana ya milawu leyi tirhaka yi katsa leyi boxiweke eka 2 Vakorinto 6:3, 20 na Vakolosa 3:18, 20.

¹³ ‘I yini lexi ndzi nga xi endlaka leswaku vun’we bya ndyangu wa mina byi tshama byi tiyile?’ I swa nkoka leswaku swirho swa ndyangu swi vulavurisana kahle. Yakobo 1:19 yi ri: “Munhu un’wana ni un’wana u fanele a hatlisa emhakeni yo twa, a nonoka emhakeni yo vulavula, a nonoka emhakeni ya vukarhi.” Swirho swa ndyangu swi fanele ku yingisana ni ku vulavurisana kahle, hikuva bulo endyangwini i xandla famba xandla vuya. Hambiloko leswi hi swi vulaka swi ri ntiyiso, kambe loko hi swi vula hi ndlela ya tihanyi, ya ku tikukumuxa kumbe leyi nga kombisiki ku anakanyela, swi nga onha ku ri ni ku lunghisa. Hikwalaho ku nga khathariseki leswaku u wanuna kumbe u wansati, u mutswari kumbe u n’wana, mavulavulelo ya hina ma fanele “ma [va] ni nsovo nkarhi hinkwawo, ma lungiwe hi munyu.”—Kol. 4:6.

¹⁴ ‘Xana ndzi kokiwa mahlo hi swilo leswi vonakaka?’ Swilo leswi vonakaka i ntshikilelo wa misava lowu pfilunganyaka vutomi bya munhu. A swi n’wi pfuni munhu leswaku a kuma ntsako wa xiviri. (Ekl. 5:10; Luka 12:15; 1 Tim. 6:9, 10) Leswaku hi pfuneka ku papalata ntlhamu wa swilo leswi vonakaka, Yesu u hi dyondzise nsinya wa nkoka wa nawu lowu nge: Tihlo ra wena a ri olove. Ku hanya vutomi lebyi ringaniseriweke, lebyi nga rharhanganangiki, swi lava leswaku mahlo ya hina ma yisa nyingiso eka swilaveko swa Mfumo, kutani swilo leswin’wana hinkwaswo swi ta endzhaku.—Mat. 6:22, 23, 33.

¹⁵ Leswi Xikongomelo Xa Hina Xi Faneleke Ku Va Xona: Rito ra Xikwembu ri hi khomele xihlovo lexi tshembekaka xa misinya ya milawu yo lulama leswaku yi hi kongomisa ku endla swiboho leswinene. Hi fanele ku yi dyondza misinya leyi ya milawu, hi anakanyisisa ha yona hi tlhela hi twisisa ndlela leyi hi nga yi tirhisaka ha yona evuton’wini bya hina. Hikwalaho, loko hi ‘letela matimba ya hina ya ku twisisa leswaku hi kota ku hambanisa leswinene ni leswo biha,’ hi ta vuyeriwa hi tlhela hi dzunisa Yehovha.—Hev. 5:14.