“Tinyiko Leti Nga Vanhu” Ti Hisekela Ku Risa Ntlhambi Wa Xikwembu
1 Mawaku lunghiselelo ra rirhandzu leri Yehovha a ri endleke hi N’wana wa yena leswaku ku va ni “tinyiko leti nga vanhu”! (Ef. 4:8, 11, 12) Ti ni vutihlamuleri byo tala, lebyi katsaka ku risa ntlhambi wa Xikwembu hi ku hiseka lokukulu. (1 Pet. 5:2, 3) Hinkwerhu ha vuyeriwa hi lunghiselelo leri hi ri lavaka hi mahlo-ngati. Tinyiko leti ti karhatekile swinene hi vuhlayiseki bya hina hinkwerhu bya moya, ku nga khathariseki leswaku van’wana va langutana ni ku nonon’hweriwa, va ha ku sungula ku hlanganyela, va ni ku tsana ko karhi kumbe va hambuke endleleni.—Filp. 2:4; 1 Tes. 5:12-14.
2 Loko swiendlakalo swa misava leswi nga dyisiki byi rhelela swi tisa ku chava ko karhi, varisi lava va va “ndhawu ya ku tifihla emhehweni ni vutumbelo exidzedzeni.” Loko hi karhele kumbe loko hi tikeriwa kutani hi lava ku chaveleriwa, va hi phyuphyisa ku “fana ni swinambyana swa mati etikweni leri nga riki na mati” kumbe “ndzhuti wa ribye lerikulu etikweni leri omeke.”—Esa. 32:2.
3 Ku Khutaza Lava Holeke: Vakulu va endla matshalatshala yo hlawuleka ya ku khutaza lava humaka nsimu hi xiwelo ni lava holeke, va va pfuna leswaku va tlhela va hlanganyela minkarhi hinkwayo emintirhweni hinkwayo ya vandlha. Maendzo ya vurisi ya rirhandzu ma pfune vo tala leswaku va va kona eminhlanganweni ya vandlha minkarhi hinkwayo kutani va akeka emoyeni ku fikela laha va tlheleke va hlanganyela ensin’wini. Matshalatshala wolawo hinkwawo ya vakulu ma kombisa nkhathalelo wa Yehovha wa rirhandzu ni vurhangeri lebyinene bya Yesu Kreste. U siye xikombiso xa leswaku wa khathala hi yin’wana ni yin’wana ya tinyimpfu ta yena leyi lahlekeke.—Mat. 18:12-14; Yoh. 10:16, 27-29.
4 Varisi lava va lava ku vona loko munhu a ri ni swikombiso swa ku tsana emoyeni. Un’wana ni un’wana la kombisaka ku hela matimba, la nga hlanganyeliki minkarhi hinkwayo eminhlanganweni kumbe la nga ha wu hisekeliki ntirho wa nsimu, swi nga ha endleka leswaku u lava ku pfuniwa emoyeni. Vakulu va tshama va lunghekile ku pfuna un’wana ni un’wana la kombisaka ku tsana hi maambalelo ni ku tilunghisa ka misava kumbe la hlakulelaka langutelo ro biha hi vandlha. Hi ku n’wi tsakela ka xiviri ni xinakulobye xa rirhandzu, valanguteri lava karhatekeke va ‘nyiketela mimoya-xiviri ya vona’ hi ku tirhandzela, ku ri matshalatshala ya ku pfuna vanhu vo tano leswaku va pfuxeta rirhandzu ra vona eka Yehovha.—1 Tes. 2:8.
5 Enkarhini lowu hundzeke, Vakreste van’wana lava tinyiketeleke va tshike ku hlanganyela ni vandlha, va hola emoyeni hikwalaho ko tikeriwa hi swiphiqo swa rihanyo, swa ikhonomi kumbe mintshikilelo ya le ndyangwini. Handle ko va lava xopaxopaka, vakulu va va tiyisekisa hi musa leswaku Yehovha u khathalela tinyimpfu ta yena hinkwato naswona u ta ti seketela loko ti langutane ni maxangu. (Ps. 55:22; 1 Pet. 5:7) Varisi va ntlhambi lava xalamukeke va nga wu pfuna wu xiya leswaku loko wu ‘tshinela eka Xikwembu, na xona xi ta tshinela eka wona,’ xi wu chavelela ni ku wu phyuphyisa.—Yak. 4:8; Ps 23:3, 4.
6 Ku Teka Lava Tsaneke Va Ri Va Risima: Varisi lava nga ni rirhandzu va khathalela ni vanhu lava va nga ha honisiwaka. Vandlha rin’wana ni rin’wana ri ni vanhu lava tsaneke, lava tshamaka evuhlayiselweni bya vadyuhari kumbe lava nga kotiki ku endla nchumu hikwalaho ka swivangelo swo karhi. Swa twisiseka leswaku a va nge swi koti ku chumayela rungula ra Mfumo hi xitalo hikwalaho ka swiyimo swa vona. Kumbexana va nga kuma nkarhi wa ku chumayela hi ku vulavula ni vaendzi, vavabyi van’wana kumbe lava va va khathalelaka. Nilokoswiritano, xin’wana ni xin’wana lexi va kotaka ku xi endla xi tekiwa tanihi nseketelo wa risima entirhweni hinkwawo wa ku chumayela. (Mat. 25:15) Hambiloko va chumayele timinete ta 15 ntsena, ti fanele ku vikiwa naswona va ta hambeta va katsiwa eka nhlayo ya vahuweleri va Mfumo lava chumayelaka minkarhi hinkwayo.
7 “Tinyiko leti nga vanhu” ti swi xalamukerile swinene swilaveko swa moya swa vamakwavo enkarhini lowu wa lembe—ku nga nkarhi wa Xitsundzuxo. Kunene i nkarhi lowunene wa leswaku vakulu va endla matshalatshala yo hlawuleka ya ku pfuna lava dukeke, leswaku va tlhela va kuma ntsako ni ku rhula ka mianakanyo leswi tisiwaka hi vunakulobye bya rirhandzu bya vandlha! Ha tsaka loko hi vona vanhu vo tano “lava nga swin’we na hina eripfumelweni,” va ri kona eminhlanganweni ya vandlha naswona va ya ensin’wini, va tiyisekisa ripfumelo ra vona exitlhavelweni xa nkutsulo.—Gal. 6:10; Luka 15:4-7; Yoh. 10:11, 14.