Ku Khutazana Hi Ndlela Yo Hlawuleka
1 Ripfumelo ra vanhu va Yehovha ra ringiwa siku rin’wana ni rin’wana. Leswi Diyavulosi a tivaka leswaku u saleriwe hi nkarhi wo koma, u lwa a lume ni meno enyimpini yo herisa vutshembeki bya hina eka Yehovha. (Nhlav. 12:12) I swa nkoka leswaku hi ‘hambeta hi kuma matimba eHosini ni le ka ntamu wa vukulu bya yona,’ leswaku hi ta kota ku ‘tserhama hi siku ro homboloka ni ku yima hi tiyile endzhaku ko endla swilo hinkwaswo hi rixaladza.’—Efe. 6:10, 13.
2 Ku hlangana ni vapfumeri-kulorhi i lunghiselelo leri Yehovha a hi pfunaka ha rona leswaku hi kuma matimba. Muapostola Pawulo u wu vonile nkoka wa kona. A a navela ku va exikarhi ka vamakwavo lava nga Vakreste leswaku va ta “khutazana” ni ku “tiyisiwa.” (Rhom. 1:11, 12) Leswaku hi tiyisiwa eku endleni ka ku rhandza ka Xikwembu, hi rirhandzu Huvo leyi Fumaka yi lunghiselele leswaku hi va ni nkarhi wa ku khutazana eka Ntsombano wa Muganga lowu taka wa “Vachumayeri Va Mfumo Lava Hisekaka.”
3 Vana Kona Leswaku U Ta Vuyeriwa: Tivekele pakani ya ku va kona masiku hinkwawo manharhu. Ha ‘pfuneka’ hi ku fika ku nga si yimbeleriwa risimu ni ku tshama kukondza hi ku “Amen” swi huma etimbilwini ta hina loko ku endliwa xikhongelo xo pfala. (Esa. 48:17, 18) Vo tala va fanele ku lulamisa swiyimiso swa vona ka ha ri ni nkarhi leswaku va kuma nkarhi wa ku va kona masiku hinkwawo manharhu. I ntiyiso leswaku a swi nge olovi ku kombela nkarhi wo ya entsombanweni eka muthori wa wena, kambe Yehovha wa hi tiyisekisa leswaku u ta hi pfuna hi endla ku rhandza ka yena. (1 Yoh. 5:14, 15) Loko hi nga si sungula ku endla malunghiselelo ya swo famba hi swona ni byetlelo, lowu i nkarhi wo tiyiseka leswaku hi ma endla, hi nga tshembi leswaku swilo swi to tiendlekela. Ha tiyiseka leswaku Yehovha u ta katekisa matshalatshala ya hina ya ku va kona masiku hinkwawo manharhu.—Swiv. 10:22.
4 Langutela Ku Khutaziwa: Xana u tshama u vuya entsombanweni wa muganga kutani u ku: “Lowu a wu tsakisa ku tlula hinkwayo!” I yini lexi endleke leswaku u titwisa sweswo? Hi leswaku leswi hi nga vanhu lava nga hetisekangiki, ha karhala hakatsongo-tsongo, hi tikuma hi lava ku khutaziwa hi tlhelo ra moya. (Esa. 40:30) Makwerhu un’wana wa xisati u te: “Mafambiselo lawa ya swilo ma ndzi heta matimba, kutani ntsombano wu ndzi pfuna ku tlhela ndzi va ni langutelo ra moya, wu ndzi nyika matimba ya moya lawa ndzi ma lavaka. Swi tikomba onge ndzi kuma xikhutazo hi nkarhi lowu faneleke.” Kumbexana na wena u titwe hi ndlela leyi fanaka.
5 A hi tinkulumo ni mimbulavurisano ntsena leswi hi kumaka xikhutazo ha swona kambe ni hi tindlela tin’wana leti mintsombano ya hina yi hi fuwisaka emoyeni ha tona. Makwerhu un’wana u te: “Nchumu lowu ndzi wu tlangelaka swinene i matirhiselo lama nga lo dlaa, erivaleni ni lama pfunaka ya misinya ya milawu ya Bibele. Ina, tidrama ta hi pfuna swinene eku kombiseni ndlela leyi hi nga vuyeriwaka ha yona eka swikombiso leswinene ni swo biha swa nkarhi lowu hundzeke. Nchumu wun’wana lowu ndzi wu langutelaka minkarhi hinkwayo i ku humesiwa ka minkandziyiso leyintshwa naswona endzhaku ka loko ntsombano wu herile, ndzi heta nkarhi wo leha ndza ha yi tsakela.”
6 Mintsombano i lunghiselelo ra Yehovha leri lavekaka eminkarhini leyi ya “mangava leyi swi nonon’hwaka ku langutana na yona.” (2 Tim. 3:1) Yi hi pfuna ku yingisa ndzayo leyi huhuteriweke leyi nge: “Tshamani mi hitekile, yimani mi tiyile eripfumelweni, yanani emahlweni tanihi vavanuna, vanani ni matimba.” (1 Kor. 16:13) Hikwalaho, a hi tiyimiseleni ku va kona eka xiyenge xin’wana ni xin’wana kutani hi khutazana swinene eNtsombanweni wa Muganga wa “Vachumayeri Va Mfumo Lava Hisekaka”!
[Bokisi leri nga eka tluka 3]
Kunguhata Ku Va Kona Masiku Hinkwawo Manharhu
■ Kombela masiku entirhweni.
■ Tikumele byetlelo endhawini leyi ntsombano wu nga ta khomeriwa eka yona.
■ Endla malunghiselelo ya xo famba hi xona entsombanweni.