Xana Wa Swi Tlangela Swilo Swo Kwetsima?

¹ Loko ho vutisiwa leswaku ha swi tlangela swilo swo kwetsima, handle ko kanakana hi nga hlamula hi ku hatlisa hi ku ina! Hi wahi man’wana ya malunghiselelo ya Xikwembu yo kwetsima lawa hi ma tlangelaka?

² Hi byi tlangela swinene vuxaka lebyi hi nga na byona ni Tata wa hina wa le tilweni! Wa hi tiyisekisa leswaku loko hi ‘tshinela eka yena, u ta tshinela eka hina.’ (Yak. 4:8) Loko a ku nga ri hi gandzelo ra nkutsulo ra Yesu Kreste, ku hava munhu loyi a a ta kuma vutomi lebyi nga heriki. (Yoh. 3:16) Hikwalaho ka leswi hi ri tlangelaka hi mbilu hinkwayo lunghiselelo leri ra risima leri humaka eka Xikwembu, hi phofula ku tlangela ka hina lokukulu eswikhongelweni swa hina swa siku ni siku.

³ Rito ra Xikwembu leri huhuteriweke, ku nga Bibele yo Kwetsima na rona ra kwetsima eka hina, swi tano ni hi nhlengeletano ya Yehovha ya laha misaveni. Loko hi hanya hi ku landza misinya ya milawu ya Bibele, hi tiyisa swiboho swa rirhandzu ra vumakwerhu, hi namarhela fambiselo ra swa le tilweni hi vukheta ni ku tirhisana ni lava rhangelaka, hi ta va hi kombisa ndlela leyinene ya ku tlangela malunghiselelo lawa, lama humaka eka Yehovha.—1 Pet. 1:22.

⁴ Hi kuma swakudya swo tala swa moya hi hlonga ro tshembeka ni ro tlhariha. Swi ta tlhela swi va tano nan’waka eka Ntsombano wa Muganga wa “Vaendli Va Rito Ra Xikwembu.” Eka wona hi ta kuma ndzetelo wa nkoka ni ku tsakela vunakulobye lebyinene lebyi hi byi lavaka hi mahlo-ngati. Hi nga kombisa njhani leswaku lunghiselelo leri ro kwetsima hi ri tlangela hi mbilu hinkwayo?

⁵ U Nga Honisi Yindlu Ya Yehovha: Nehemiya u tsundzuxe vanhu lava tirheke hi matimba va pfuxa marhangu ya Yerusalema leswaku va nga ‘honisi yindlu ya Xikwembu xa vona.’ (Neh. 10:39) Namuntlha, “yindlu” ya Yehovha i lunghiselelo rakwe ra vugandzeri. Mintsombano ya hina ya muganga i xiphemu xa lunghiselelo rero. Leswaku hi nga ri honisi lunghiselelo leri, hi fanele ku va kona hi tlhela hi yingisa hi vukheta lebyikulu, hi kombisa Yehovha leswaku hi ma teka ma ri ya risima swinene malunghiselelo yakwe. (Hev. 10:24, 25) Hi wahi malunghiselelo lawa hi faneleke hi ma endla sweswi ku kombisa leswaku hi xi tlangela hi mbilu hinkwayo xiendlakalo lexi xo kwetsima?

⁶ Vana Kona Masiku Hinkwawo Ka Wona Manharhu: Un’wana ni un’wana wa hina u fanele a hlela ku va kona eka masiku hinkwawo lawa manharhu ya ntsombano. Xana u hlela ku fika ka ha ri ni nkarhi siku ha rin’we ni ku va kona ku fikela loko ku pfariwa hi xikhongelo hi Sonto? Loko swi ri tano, u ta kuma mikateko leyi fuweke. A hi minkarhi hinkwayo swi olovaka ku va kona entsombanweni. Ku kuma nkarhi entirhweni wa wena wa ku tihanyisa swi nga ha lava leswaku u teka goza leri tiyeke. A hi minkarhi hinkwayo swi nga ta olova ku kuma swo famba. Kambe u nga pfumeleli swilo leswi swi ku sivela ku va kona entsombanweni.

⁷ Anakanya Hi Xikombiso Lexi Lexinene: Loko ntlawa wa vamakwerhu etikweni rin’wana ra le Afrika leri nga ni nyimpi ya xin’wana-manana, wu khome ndlela yo ya entsombanweni wa muganga n’wexemu, wu hlangane ni masocha. Vamakwerhu va vutisiwile: “Mi vamani naswona mi ya kwihi?” Va hlamule va ku: “Hi Timbhoni ta Yehovha naswona hi ya entsombanweni wa muganga.” Rin’wana ra masocha ri te: “N’wina Timbhoni ta Yehovha mi ni xivindzi xa nghala. Tifambeleni mi ya khoma ntsombano wa n’wina, a mi nge karhatiwi hi nchumu. Kambe, tivani leswaku mi ta hlangana ni masocha man’wana yo tala. Minkarhi hinkwayo fambani exikarhi ka pato! Loko mi vona vanhu vo tala va hlengeletanile, n’wina yanani emahlweni mi famba exikarhi ka pato!” Va endle tano kutani va fika entsombanweni va hlayisekile. Vamakwerhu lava va vuyeriwile, hikuva va kombise leswaku va swi tlangela swilo swo kwetsima.

⁸ Ku fana ni vamakwerhu lava va le Afrika, na hina hi langutana ni mintlhontlho. Kambe handle ko kanakana hi nga tekelela ripfumelo ra vona kutani hi tiyimisela ku va kona enongonokweni hinkwawo wa ntsombano wa hina wa muganga. Loko swi lava leswaku hi endla mindzulamiso yo karhi, a hi kombeleni Yehovha a hi kongomisa, hi tiva leswaku u ta katekisa matshalatshala ya hina ya ku va kona eka nongonoko hinkwawo.

⁹ Tiphine Hi Mikateko Ya Kona: Ha ri rhandza Rito ra Xikwembu, hikuva ha swi tiva leswaku ri nga hi pfuna leswaku hi ponisiwa. (1 Pet. 2:2) Ku va kona ka hina entsombanweni wa muganga ni ku yingisela nongonoko swi ta pfuna un’wana ni un’wana wa hina leswaku a va ni ripfumelo leri tiyeke eka Rito leri, xisweswo hi kota ku yimelana ni minhlaselo ya Sathana. Loko hi endla tano, hi ta kombisa Yehovha ni vahlaleri hinkwavo leswaku hi swi tlangela hi xitalo swilo swo kwetsima naswona “a hi muxaka wa vanhu lava tlhelelaka endzhaku . . . kambe hi muxaka lowu nga ni ripfumelo eku londzovotiweni ka moya-xiviri wu hanya.”—Hev. 10:39; 12:16; Swiv. 27:11.

¹⁰ Hi nga langutela leswaku Yehovha Xikwembu a hi pfulela tinyangwa ta ndhambi ya matilo kutani a hi chululela ndzalo ya mikateko ya moya. (Mal. 3:10) Tivekele pakani ya ku va kona eNtsombanweni wa Muganga wa “Vaendli Va Rito Ra Xikwembu” ku sukela loko nongonoko wu sungula hi Ravuntlhanu nimixo ku fikela eka xikhongelo xo pfala na “Amen!” hi Sonto nindzhenga. A wu nge tisoli!