Eneriseka Hi Leswi U Nga Na Swona
1 Matsalwa ma hi khutaza ku wundla mindyangu ya hina hi swilo leswi vonakaka, kambe sweswo a swi fanelanga swi va xikongomelo lexikulu evuton’wini bya hina. Hi fanele hi rhangisa swilo swa moya. (Mat. 6:33; 1 Tim. 5:8) Ku va ni langutelo leri faneleke hi mhaka leyi a swi olovi “[eminkarhini leyi] ya mangava leyi swi nonon’hwaka ku langutana na yona.” (2 Tim. 3:1) I yini lexi nga ta hi pfuna leswaku hi va ni langutelo leri faneleke?
2 Amukela Leswi Bibele Yi Swi Vulaka: Rito ra Xikwembu ra hi lemukisa leswaku ku salana endzhaku ni rifuwo swi nga hi peta ekhombyeni ra moya. (Ekl. 5:10; Mat. 13:22; 1 Tim. 6:9, 10) Enkarhini lowu wa nkoka, un’wana ni un’wana wa hina a nga weriwa hi khombo loko a tinyiketela ku tlula mpimo entirhweni wa ku tihanyisa kumbe a hlongorisa mali lerova timhaka ta moya—ku nga minhlangano, dyondzo ni ntirho wa nsimu—swi nga ha vi swa nkoka ngopfu evuton’wini bya yena. (Luka 21:34-36) Ematshan’weni ya sweswo, Bibele ya hi tsundzuxa: “Loko hi ri ni swakudya ni swifunengeto, hi ta eneriseka hi swilo leswi.”—1 Tim. 6:7, 8.
3 Leswi a swi vuli swona leswaku Vakreste va fanele va hanya hi rikoko ra xilondza. Kambe swi hi pfuna ku vona leswi hakunene swi nga swona swilaveko swa hina swa nyama—ku nga swakudya, swiambalo ni vutshamo lebyinene. Loko hi ri ni swilaveko swa vutomi, a hi fanelanga hi ku kho, hi lava ku hanya vutomi bya vulovolovo. Loko hi lava ku xava xo karhi kumbe hi nyikiwa vutihlamuleri lebyi engetelekeke entirhweni wa ku tihanyisa, i swinene leswaku hi tivutisa xivutiso lexi nge, ‘Xana swa ndzi boha hakunene?’ Sweswo swi ta hi pfuna ku fambisana ni ndzayo leyi huhuteriweke leyi nge: “Mukhuva wa n’wina wa vutomi a wu pfumale rirhandzu ra mali, mi ri karhi mi eneriseka hi swilo leswi nga kona.”—Hev. 13:5.
4 Yehovha u ta hi katekisa loko hi n’wi tshemba. (Swiv. 3:5, 6) Hambi leswi hi faneleke hi tirha swi vava leswaku hi kuma swilaveko swa siku na siku, a hi fanelanga hi tinyiketela ku tlula mpimo eka swilo swo tano. Hi fanele hi tshemba Yehovha leswaku a enerisa swilaveko swa hina, hambi hi pfumala kumbe hi ri ni swo tala. (Filp. 4:11-13) Hikwalaho, hi ta eneriseka hi tlhela hi kuma mikateko yin’wana yo tala.
5 Tekelela Ripfumelo Ra Van’wana: Wansati la nga riki na nuna loyi a kurisaka n’wana wakwe wa nhwanyana endleleni ya ntiyiso, u olovise vutomi byakwe hakatsongo-tsongo. Hambileswi a a ri ni kaya lerinene, u rhurhele endlwini leyitsongo, endzhaku a tlhela a rhurhela efuleteni. Leswi swi endle leswaku a hunguta nkarhi wa ntirho wa ku tihanyisa leswaku a ta heta nkarhi wo tala ensin’wini. Loko n’wana wakwe wa xisati a kurile ivi a tekiwa, manana loyi u kombele ku nyikiwa mudende nkarhi wu nga si fika, hambileswi sweswo a swi ta endla leswaku muholo wakwe wu hungutiwa nakambe. Sweswi makwerhu loyi u ni malembe ya nkombo a ri phayona ra nkarhi hinkwawo naswona a nga tisoli hi swilo leswi vonakaka leswi a titsoneke swona leswaku a rhangisa timhaka ta Mfumo evuton’wini byakwe.
6 Nkulu un’wana ni nkatakwe va phayone malembe yo tala va ri karhi va kurisa vana vanharhu. Tanihi ndyangu, va tidyondzise ku eneriseka hi swilaveko swa vona ematshan’weni yo lava ku tikhorwisa hi vutomi bya vulovolovo. Makwerhu loyi u ri: “Hi boheke ku hanya vutomi byo olova. Hambileswi a hi pfa hi koka exilogweni, minkarhi hinkwayo Yehovha a a enerisa swilaveko swa hina. . . . Loko ndzi vona ndyangu wa mina wu rhangisa timhaka ta moya hi ndlela leyi, ndzi vona hi endle xiboho lexinene naswona swa ndzi tsakisa.” Nsati wakwe u teka bulo a ri yisa emahlweni a ku: “Loko ndzi vona [nuna wa mina] a khomekile hi timhaka ta moya, mbilu ya mina ya tsaka swinene.” Ni vana va kona va tsaka hileswi vatswari va vona va endleke xiboho xa ku tirhela Yehovha nkarhi hinkwawo.
7 Hinkwavo lava hlawulaka ku tinyiketela ku rhangisa timhaka ta moya ematshan’weni yo mukisana ni swilo swa nyama, Bibele yi va tshembisa mikateko leyi fuweke sweswi ni le ka vutomi lebyi taka.—1 Tim. 4:8.