Tsundzuka Vanhu Vo Tshembeka Lava Kuleke
1 Hambileswi a a ri noni naswona a dyuharile, Ana wa malembe ya 84 hi vukhale “a a nga kali etempeleni.” Ku tshembeka ka yena ku susumetele Yehovha leswaku a n’wi katekisa hi ndlela yo hlawuleka. (Luka 2:36-38) Namuntlha ku ni vamakwerhu vo tala lava kombisaka moya wo fana ni wa Ana hambiloko va langutane ni swiyimo swo tika. Vamakwerhu volavo vo tshembeka va pfa va hela matimba loko va ringeta ku kamana ni swiphiqo swa rihanyo kumbe swihinga leswi tisiwaka hi vudyuhari. A hi kambisiseni tindlela tin’wana leti hi nga va khutazaka ha tona ni ku va pfuna leswaku va namarhela xiyimiso lexinene xa timhaka ta moya.
2 Minhlangano Ni Vutirheli: Vadyuhari vo tala lava tshembekaka va nga kota ku ya eminhlanganweni ya Vukreste nkarhi na nkarhi loko van’wana va va pfuna hi swo famba. Sweswo swi aka vumoya bya malandza lawa yo tshembeka ya khale, swi tlhela swi vuyerisa vandlha. Xana wena wa wu endla ntirho lowu lowunene?—Hev. 13:16.
3 Ku hlanganyela nkarhi na nkarhi ensin’wini swi tisa ntsako ni ku eneriseka eka Vakreste va ntiyiso. Kambe ku endla sweswo ku nga va ntlhontlho eka vadyuhari ni lava tsaneke emirini. Xana swi nga koteka leswaku un’wana wa vamakwerhu lava va rhandzekaka a famba na wena tanihi ‘mutirhi-kuloni’ loko u ya ensin’wini? (Rhom. 16:3, 9, 21) Kumbexana u nga n’wi kombela leswaku a hlanganyela na wena eku chumayeleni hi riqingho kumbe a famba na wena eka riendzo ro vuyela kumbe edyondzweni ya Bibele. Loko mudyuhari a nga swi koti ku huma ekaya, xana swi nga koteka leswaku xichudeni xa Bibele xi ta ekaya ra yena mi ta dyondzela kona?
4 Ku Dyondza Ni Ku Tihlanganisa Ni Van’wana: Van’wana va tala ku rhamba makwerhu la dyuhaleke kumbe la tsaneke emirini leswaku a hlanganyela na vona edyondzweni ya ndyangu, hambi ku ri ku khomela dyondzo ya kona ekaya ra yena. Manana un’wana u fambe ni vana va yena vambirhi ekaya ra makwerhu wa xisati la dyuhaleke va ya dyondza Buku Yanga Ya Timhaka Ta Bibele, naswona hinkwavo va khutaziwe hi ku hlangana swin’we edyondzweni leyi. Nakambe vanhu vo tano va tsaka loko va rhamberiwa eswakudyeni kumbe loko ku endliwa swin’wana. Loko xiyimo xa lava tsaneke emirini xi nga va pfumeleli ku ya laha va rhambiwaka kona, kumbexana u nga hundza hi le ka vona nkarhinyana u va hlayela mhaka yo karhi, u khongela na vona kumbe u va hlamusela ntokoto lowu akaka.—Rhom. 1:11, 12.
5 Yehovha wa tinyungubyisa hi vadyuhari lava tshembekaka. (Hev. 6:10, 11) Hi nga n’wi tekelela hi ku kombisa leswaku ha tinyungubyisa ha vona ni hi ku va pfuna leswaku va namarhela xiyimiso lexinene xa timhaka ta moya.