Ku Hetisisa Xihlambanyo Xa Ku Tinyiketela Ka Hina

¹ Ku nga khathariseki leswaku wa ha ku khuvuriwa kumbe u khuvuriwe khale, handle ko kanakana a wu xi rivali xiendlakalo xexo xa nkoka evuton’wini bya wena. Ku khuvuriwa ka hina a hi makumu ya timhaka kambe i masungulo ya ntirho wa ku tinyiketela vutomi hinkwabyo. (1 Yoh. 2:17) Ku hetisisa xihlambanyo xa ku tinyiketela ka hina swi katsa yini?

² Landzela Xikombiso Xa Kreste: Loko a heta ku khuvuriwa, Yesu u ‘sungule ntirho wa yena,’ a twarisa “mahungu lamanene ya mfumo wa Xikwembu.” (Luka 3:23; 4:43) Hilaha ku fanaka, loko hi kombise ku tinyiketela ka hina eka Yehovha hi ku khuvuriwa, hi ve vatirheli lava hlawuleriweke ku chumayela mahungu lamanene. Hambileswi hi nga bohekaka ku heta nkarhi wo tala hi ringeta ku kuma swilaveko swa vutomi, ntirho wa hina lowukulu i vutirheli bya Vukreste. (Mat. 6:33) Ematshan’weni yo lwela ku kuma rifuwo kumbe xikhundlha, lava va tinyiketeleke eka Xikwembu va lava ku ‘vangamisa vutirheli bya vona,’ hilaha muapostola Pawulo a endleke hakona. (Rhom. 11:13) Xana wa ri tlangela lunghelo leri u nga na rona ra ku tirhela Yehovha, naswona xana u ri tirhisa swinene ke?

³ Ku fana na Yesu, hi fanele hi “kaneta Diyavulosi.” (Yak. 4:7) Loko Yesu a heta ku khuvuriwa Sathana u sungule ku N’wi ringa, naswona u endla tano ni le ka malandza lama tinyiketeleke eka Yehovha namuntlha. (Luka 4:1-13) Tanihi leswi hi hanyaka exikarhi ka misava ya Sathana, hi fanele hi titshinya, hi papalata nchumu wihi ni wihi lowu nga thyakisaka mianakanyo kumbe timbilu ta hina. (Swiv. 4:23; Mat. 5:29, 30) Vakreste va tsundzuxiwa leswaku ‘va nga dyi “etafuleni ra Yehovha” swin’we ni le tafuleni ra madimona.’ (1 Kor. 10:21) Sweswo swi lava leswaku hi tivonela eka vuhungasi lebyi nga tengangiki, vanghana vo biha ni makhombo ya Internet. Nakambe swi lava leswaku hi papalata swilo swa vagwinehi. Ku xalamukela swilo sweswo ni marhengu man’wana ya Sathana swi ta hi pfuna ku hetisisa xihlambanyo xa ku tinyiketela ka hina.

⁴ Tirhisa Malunghiselelo Ya Xikwembu: Leswaku a hi pfuna ku hetisisa xihlambanyo xa ku tinyiketela ka hina, Yehovha u hi lunghiselele Rito ra yena ni vandlha ra Vukreste. Endla leswaku ku hlaya ka Bibele ni ku khongela eka Yehovha ku va xiphemu xa xiyimiso xa wena xa siku ni siku. (Yox. 1:8; 1 Tes. 5:17) Tsakela minhlangano ya vandlha. (Ps. 122:1) Tihlanganise ni lava chavaka Yehovha va tlhela va hlayisa swileriso swa yena.—Ps. 119:63.

⁵ Hi mpfuno wa Xikwembu, u nga swi kota ku hetisisa xihlambanyo xa ku tinyiketela ka wena eka Yehovha kutani u tsakela ku n’wi tirhela hi masiku.—Ps. 22:26, 27; Filp. 4:13.