Mpfuno Lowu Fikeke Hi Nkarhi

¹ Loko muapostola Petro a xiye xilaveko xo tiyisa vapfumeri-kulobye, ku khathala ka yena hi vona ku n’wi susumetele ku va nyika switsundzuxo swa rirhandzu ni xikhutazo. (2 Pet. 1:12, 13; 3:1) U khutaze “lava kumeke ripfumelo” leswaku va ya emahlweni va antswisa timfanelo ta vona ta moya leswaku va nga vi “lava tsaneke kumbe lava nga vekiki mihandzu malunghana ni vutivi lebyi kongomeke lebyi khumbaka Hosi ya hina Yesu Kreste.” (2 Pet. 1:1, 5-8) Xikongomelo xa Petro a ku ri ku va pfuna leswaku va tiyiseka hi ku vitaniwa ni ku hlawuriwa ka vona hi Yehovha, leswaku ‘emakumu va ta kumiwa va ri lava pfumalaka xivati, lava nga solekiki ni lava nga ni ku rhula.’ (2 Pet. 1:10, 11; 3:14) Eka vo tala, xikhutazo xa yena xi vonake xi ri mpfuno lowu fikeke hi nkarhi.

² Namuntlha valanguteri lava nga Vakreste va khumbeka hi ndlela leyi fanaka hi vanhu va Xikwembu. ‘Eminkarhini leyi ya mangava leyi swi nonon’hwaka ku langutana na yona,’ malandza yo tala ya Yehovha ma boheka ku tiyisela swiyimo leswi tikaka. (2 Tim. 3:1) Hikwalaho ka swiphiqo leswi yaka emahlweni swa timali, swa ndyangu kumbe swa munhu hi xiyexe, van’wana va nga titwa hilaha Davhida a a titwa hakona loko a ku: “Ndzi rhendzeriwe hi makhombo kukondza ma nga ha hlayeki. Swidyoho swa mina swo tala swi ndzi talele ngopfu, ndzi nga ha koti ku vona; swi tele ku tlula misisi ya nhloko ya mina, ni mbilu ya mina yi ndzi siyile.” (Ps. 40:12) Mintshikilelo ya vanhu vo tano yi nga kula swinene lerova va honisa vutihlamuleri bya timhaka ta moya kutani va tshika ku hlanganyela evutirhelini bya Vukreste. Kambe, ku nga khathariseki ntshikilelo wa vona ‘a va swi rivali swileriso swa Yehovha.’ (Ps. 119:176) Sweswi i nkarhi lowunene wa leswaku vakulu va nyika vanhu vo tano mpfuno lowu lavekaka.—Esa. 32:1, 2.

³ Leswaku va fikelela xilaveko lexi, vakulu va khutaziwe leswaku va endla matshalatshala yo hlawuleka yo pfuna lava tshikeke ku ya entirhweni wa nsimu. Matshalatshala lamakulu yo hetisisa sweswo ma ta endliwa ku sukela n’hweti leyi taka ku kondza ku hela n’hweti ya May. Valanguteri va dyondzo ya buku va komberiwa ku endzela lava holeke leswaku va va pfuna hi timhaka ta moya hi xikongomelo xo va khutaza leswaku va tlhela va hlanganyela ni vandlha hi ku chivirika. Laha ku nga ni xilaveko, ku nga hleriwa dyondzo ya Bibele. Vahuweleri van’wana va nga komberiwa leswaku va pfuna. Loko u komberiwe ku endla tano, matshalatshala ya wena ma nga vuyerisa swinene, ngopfu-ngopfu loko u khutaza hi ndlela ya musa ni yo anakanyela.

⁴ Swa fanela leswaku hinkwerhu hi tsaka loko un’wana a tlhela a hlanganyela ni vandlha emintirhweni ya rona. (Luka 15:6) Kunene, matshalatshala ya hina yo khutaza lava holeke ma nga endla leswaku ku humesiwa “rito leri vuriweke hi nkarhi wa kona.”—Swiv. 25:11.