Rito Ra Xikwembu I Ntiyiso
1. Hi rihi rungula ra nkoka leri tameriweke hi Bibele?
1 Mupisalema u tsarile: “Mongo wa rito ra wena i ntiyiso.” (Ps. 119:160) Hi ku tirhisa Rito ra yena leri huhuteriweke, Yehovha u nyika tinhlamulo leti enerisaka ta swivutiso swa nkoka swinene evuton’wini. U chavelela a tlhela a nyika ntshembo eka lava tshikilelekeke. Naswona u hi kombisa ndlela leyi hi nga tshinelaka eka yena ha yona. Wansati un’wana la tlangelaka u te: “Ku dyondza ntiyiso wa Bibele swi fana ni ku huma endlwini leyi nga lo dzwii, hi munyama u nghena eka leyi nga lo nghee!” Xana u tirhisa nkarhi wun’wana ni wun’wana lowu u wu kumaka leswaku u byela van’wana ntiyiso wa Rito ra Xikwembu?
2. Xana Bibele yi byi antswisa njhani vutomi bya vanhu?
2 Matimba Ya Yona Ya Ku Hundzula Ni Ku Rhandziwa Ka Yona eMisaveni Hinkwayo: Ntiyiso wa Bibele wu ni matimba lama kotaka ku khumba timbilu ni ku hundzula vutomi. (Hev. 4:12) Nhwanyana loyi a vuriwaka Rosa a a ri nghwavava naswona a a nwa byala ku tlula mpimo ni ku tirhisa swidzidzirisi. U ri: “Siku rin’wana loko ndzi tshikileleke swinene, mpatswa wun’wana wa Timbhoni wu ndzi byele ndlela leyi Bibele yi nga tlhantlhaka swiphiqo swa mina ha yona. Ndzi sungule ku dyondza Rito ra Xikwembu naswona ndzi ri kume ri tsakisa. Ku nga si hela na n’hweti se a ndzi tiyimisele ku cinca mahanyelo ya mina. Leswi se ndzi nga ni xikongomelo evuton’wini a ndza ha hanyi hi byala kumbe hi swidzidzirisi. Leswi a ndzi swi lava hi mbilu hinkwayo ku va munghana wa Yehovha, ndzi tiyimisele ku hanya hi nkongomiso wa yena. Loko a ku nga lo va vutlhari lebyi pfunaka bya Rito ra Xikwembu, ndza tshemba leswaku sweswi a ndzi ta va ndzi tisungile.”—Ps. 119:92.
3. Ha yini hi nga fanelanga hi tshika ku byela van’wana rungula ra Bibele?
3 Bibele yi hambanile ni tibuku to tala leti nga kona namuntlha hikuva yi ni rungula leri khumbaka vanhu va “matiko hinkwawo ni tinyimba hinkwato ni . . . tindzimi hinkwato.” (Nhlav. 7:9) Xikwembu xi lava “leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:4) Hikwalaho a hi fanelanga hi anakanya leswaku munhu a nge ma amukeli mahungu lamanene ntsena hileswi a nga wa ndhavuko wun’wana. Ku ri na sweswo, byela vanhu hinkwavo rungula ra Mfumo, loko swi koteka u tirhisa rungula leri humaka eBibeleni hi ku kongoma.
4. Xana hi nga yi tirhisa njhani Bibele loko hi ri eku chumayeleni?
4 Kandziyisa Matsalwa: Ku ni minkarhi yo tala leyi nga ku pfulekelaka leswaku u tirhisa Bibele evutirhelini. Loko u fambisa timagazini, ringeta ku tirhisa tsalwa leri nga eka xingheniso lexi ringanyetiweke. Loko va fambisa buku leyi fambisiwaka n’hweti yoleyo, van’wana va vone swi pfuna ku sungula bulo hi ku hlaya tsalwa leri va ri hlawuleke, leri faneleke. Minkarhi hinkwayo loko u endla maendzo yo vuyela, hlaya tsalwa rin’we ra Bibele kumbe yo hlayanyana leswaku n’wini wa muti a ta kota ku kuma vutivi lebyi kongomeke hakatsongo-tsongo. Loko u fambisa dyondzo ya Bibele, sekela bulo ra wena eka matsalwa-nkulu. Loko u nga ri ensin’wini, tshama u ri ni Bibele leswaku u ta yi tirhisa loko wo tshuka u kume nkarhi wo chumayela hi xitshuketa.—2 Tim. 2:15.
5. Ha yini hi fanele hi tikarhatela ku tirhisa Bibele evutirhelini bya hina?
5 Onge hi nga tirhisa Bibele rini na rini loko swi koteka evutirhelini, leswaku hi pfuna van’wana va vuyeriwa hi matimba lama susumetaka ya ntiyiso wa Rito ra Xikwembu.—1 Tes. 2:13.