“Rito Ra Xikwembu . . . Ri Ni Matimba”

¹ Muapostola Pawulo u tsale a ku: “Rito ra Xikwembu ra hanya naswona ri ni matimba.” (Hev. 4:12) Xana a a vula yini hi marito wolawo? Rito ra Xikwembu, kumbe rungula leri kumekaka eBibeleni ri nga va ni nsusumeto lowukulu eka vanhu. Vutlhari lebyi tameriweke hi Bibele byi ni matimba ya ku hundzula vutomi bya munhu byi va lebyi antswaka. Nchavelelo ni ntshembo lowu yi wu nyikaka wu kokela vanhu eka Yehovha Xikwembu, Munyiki wa Vutomi. Rungula ra yona ri nga endla leswaku vanhu va timbilu to tshembeka va famba endleleni leyi yisaka evuton’wini lebyi nga heriki. Hambiswiritano, leswaku hi vona sweswo, hi fanele ku tirhisa Bibele loko hi chumayela vanhu.

² Hlaya Tsalwa Nkarhi Wun’wana Ni Wun’wana Lowu Pfulekaka: Swi vonaka onge vahuweleri vo tala va tshike mukhuva wa ku tirhisa Bibele loko va vulavula ni n’wini wa muti. Xana swi tano hi wena? Hikwalaho ka leswi vanhu va vonakaka va nga tsakeli ku bula nkarhi wo leha, kumbexana u titolovete mukhuva wa ku fambisa nkandziyiso wo karhi kumbe u hlamusela tsalwa hi marito ya wena ntsena. Hi khutaza vahuweleri hinkwavo leswaku va endla matshalatshala lamakulu ya ku hlaya hambi ko va tsalwa rin’we ntsena eBibeleni loko va chumayela mahungu lamanene, xisweswo va pfuna munhu yoloye ku vona leswaku hakunene rungula ra hina ri kumeka eRitweni ra Xikwembu.

³ Hambileswi va nga ha talangiki vanhu lava titoloveteke ku hlaya Bibele, yona ya ha xiximiwa ni sweswi. Hambi ku ri vanhu lava tshamaka va khomekile, hakanyingi va tinyika nkarhi wa ku yingisela rungula leri hlayiwaka hi ku kongoma eRitweni ra Xikwembu. Loko tsalwa leri fanelekaka ri hlayiwa hi ku hiseka kutani ri hlamuseriwa hi ku komisa, matimba ya rito ra Yehovha ma nga va ni vuyelo lebyinene eka vayingiseri. Kambe u nga endlisa ku yini leswaku u hatla u hlaya ndzimana ya Bibele endzhaku ka xingheniso xa wena?

⁴ Ringeta Ku Endla Tano eNtirhweni Wa Ku Fambisa Timagazini: Mulanguteri un’wana la famba-fambaka u ma tirhisa kahle Matsalwa loko a ri eku fambiseni ka timagazini. Ebegeni ya yena u tshama a ri ni Bibele leyitsongo. Endzhaku ko fambisa timagazini ni ku hlamusela xihloko hi ku komisa, u pfula Bibele hi ku hatlisa kutani a hlaya ndzimana leyi fambisanaka ni xihloko xexo. Leswi swi nga endliwa hi ku vutisa u ku, “Xana u ehleketa yini hi xitshembiso lexi lexinene?” kutani u hlaya tsalwa leri u ri hlawuleke.

⁵ Tivekele pakani ya ku hlayela muyingiseri un’wana ni un’wana ndzimana yin’we kumbe timbirhi eBibeleni. Matimba ya yona lama susumetaka ma nga pfulela vanhu lava engetelekeke ndlela ya ku rhandza Xikwembu.—Yoh. 6:44.