Tirhisa Bibele Hi Ndlela Leyi Vuyerisaka
1. Xana u nga endla yini loko u lunghiselela ku ya ensin’wini?
1 Ku nga khathariseki leswaku hi hlele ku fambisa buku yihi ensin’wini, swa pfuna ku hlawula tsalwa leri tlhontlhaka mianakanyo leri hi nga ta ri hlayela lava va nga ta rhiya ndleve. (Hev. 4:12) Loko u hlawula tsalwa leri tirhisiweke enkandziyisweni lowu u wu fambisaka swi ta endla leswaku swi olova ku fambisa buku. Etindhawini tin’wana, vahuweleri va swi vone swi tirha ku khoma Bibele hi voko loko va ya vulavula ni munhu wo karhi kumbe loko va famba hi yindlu ni yindlu.
2. (a) Xana hi nga xi sungula njhani xingheniso xa hina hi tsalwa? (b) Hi tihi timhaka ta le Bibeleni leti vanhu va le nsin’wini ya n’wina va ti rhandzaka?
2 Sungula Bulo Ra Wena Hi Tsalwa: Vahuweleri van’wana va sungula bulo ra vona hi ku vutisa n’wini wa muti xivutiso xo olova hi tsalwa ro karhi leswaku va twa mavonelo yakwe, ivi endzhaku ka sweswo va ri hlaya. Leswi swi yisa mianakanyo yakwe xikan’we-kan’we eRitweni ra Xikwembu. Xana swin’wana swa swingheniso leswi swi nga tirha ensin’wini ya n’wina?
◼ “Loko a wu ri ni matimba, xana a wu ta swi endla leswi?” Hlaya Nhlavutelo 21:4.
◼ “Ha yini hi hanya eminkarhini leyi ya mangava?” Hlaya 2 Timotiya 3:1-5.
◼ “Xana u ehleketa leswaku muganga lowu wa ka hina a wu ta va ndhawu leyinene loko un’wana ni un’wana a a landzela ndzayo leyi?” Hlaya Matewu 7:12.
◼ “Xana u ehleketa leswaku vana va wena va ta swi tsakela ku hanya eka swiyimo leswi hlamuseriweke laha?” Hlaya Pisalema 37:10, 11.
◼ “Xana u ehleketa leswaku wu ta kala wu fika nkarhi lowu marito lawa ma nga ta hetiseka ha wona?” Hlaya Esaya 33:24.
◼ “Xana wa yi tiva hulumendhe leyi nga ta fuma leyi hlamuseriweke laha?” Hlaya Daniyele 2:44.
◼ “Xana u tshama u navela ku vutisa Xikwembu xivutiso lexi?” Hlaya Yobo 21:7.
◼ “Xana swa koteka leswaku hi tlhela hi vona varhandziwa va hina lava feke?” Hlaya Yohane 5:28, 29.
◼ “Xana vafi va swi tiva leswi endliwaka hi lava hanyaka?” Hlaya Eklesiasta 9:5.
3. Xana hi nga va pfuna njhani vanhu leswaku va twisisa matsalwa ya Bibele lawa hi va hlayelaka wona?
3 Hlamusela, U Endla Xikombiso, U Tirhisa Ni Tsalwa: Loko munhu a swi tsakela ku bula na wena, u nga hatliseli ku heta bulo. Tinyike nkarhi wo n’wi hlamusela, u n’wi endlela xikombiso ni ku tirhisa tsalwa leri u ri hlayeke leswaku munhu yoloye a ta ri twisisa. (Neh. 8:8) Loko vanhu va twisisa ni ku amukela leswi Rito ra Xikwembu ri swi dyondzisaka, sweswo swi nga cinca vutomi bya vona hi ndlela leyi hlamarisaka.—1 Tes. 2:13.
4. Xana hi nga yi tirhisa njhani Bibele hi ndlela leyinene loko hi endla maendzo yo vuyela?
4 Hambeta u yi tirhisa kahle Bibele loko u ri karhi u hlakulela ku tsakela. U nga tirhisa ndlela leyi loko u endla maendzo yo vuyela: (1) Hlawula tsalwa leri faneleke. (2) Vutisa xivutiso xo olova leswaku u twa mavonelo yakwe hi tsalwa rero. Kutani u ri hlaya. (3) Hlamusela, u endla xikombiso, u tirhisa ni tsalwa. Nkarhi na nkarhi loko u n’wi endzerile tikarhatele ku n’wi dyondzisa swo karhi leswaku a engetela vutivi byakwe bya Rito ra Xikwembu. A swi nge hlweli leswaku u sungula ku dyondza na yena Bibele!