Xiyenge 3: Ku Tirhisa Matsalwa Hi Ndlela Leyinene
Ku Fambisa Tidyondzo Ta Bibele Leti Endlaka Nhluvuko
1. Ha yini hi fanele hi kandziyisa Matsalwa loko hi fambisa tidyondzo ta Bibele?
1 Xikongomelo xa hina xo fambisa tidyondzo ta Bibele i ku ‘endla vanhu vadyondzisiwa,’ hi ku va pfuna leswaku va twisisa va tlhela va amukela tidyondzo ta Rito ra Xikwembu kutani va ti tirhisa evuton’wini bya vona. (Mat. 28:19, 20; 1 Tes. 2:13) Hikwalaho, leswi hi swi dyondzisaka swi fanele swi sekeriwa eMatsalweni. Eku sunguleni swa antswa u komba swichudeni ndlela yo kuma matsalwa yo karhi eTibibeleni ta swona. Kambe, hi nga ma tirhisa njhani Matsalwa leswaku ma pfuna swichudeni swa hina swi endla nhluvuko wa moya?
2. Xana hi nga ma hlawula njhani matsalwa lawa hi nga ta ma hlaya hi tlhela hi bula ha wona?
2 Hlawula Matsalwa Lawa Mi Nga Ta Ma Hlaya: Loko u ri karhi u lunghiselela, kumisisa ndlela leyi tsalwa rin’wana ni rin’wana leri kombisiweke ri fambisanaka ha yona ni dyondzo yoleyo, kutani u hlawula lawa mi nga ta ma hlaya ni ku bula ha wona. Swa antswa ku hlaya Matsalwa lama seketelaka leswi hi swi dyondzisaka. Matsalwa lama hlamuseriweke endzimaneni ya buku a swi bohi ku ma hlaya. Anakanyela swilaveko ni swiyimo swa xichudeni xin’wana ni xin’wana.
3. Ku vutisa swivutiso swi pfuna yini, naswona hi nga swi vutisa njhani?
3 Tirhisa Swivutiso: Ematshan’weni ya leswaku u hlamusela xichudeni matsalwa, a ku ve xona xi ma hlamuselaka. U nga xi pfuna leswaku xi endla tano hi ku xi vutisa swivutiso hi vutlhari. Loko nhlamuselo ya tsalwa rero yi ri erivaleni, u nga ha xi vutisa ndlela leyi tsalwa rero ri swi seketelaka ha yona leswi nga endzimaneni yoleyo. Minkarhi yin’wana, swi nga ha lava leswaku u vutisa xivutiso lexi kongomeke kumbe swivutiso swo hlayanyana leswaku xichudeni xi kota ku endla xiboho lexi faneleke. Loko ku laveka leswaku u hlamusela swin’wana, u nga endla tano endzhaku ka loko xichudeni xi hlamurile.
4. Xana matsalwa lama hlayiweke ma fanele ma hlamuseriwa ku fika kwihi?
4 Olovisa: Hakanyingi mucopi wa miseve la nga ni vutshila u tirhisa nseve wun’we. Hilaha ku fanaka, mudyondzisi la nga ni vutshila a nga tati marito loko a kandziyisa yinhla. U hlamusela rungula hi ku olova, ri va erivaleni naswona u ba nhloko ya mhaka. Minkarhi yin’wana, u nga ha boheka ku endla ndzavisiso etibukwini ta nhlengeletano leswaku u ri twisisa kahle tsalwa, leswaku u ta ri hlamusela hi ndlela leyi faneleke. (2 Tim. 2:15) Kambe papalata ku ringeta ku hlamusela yinhla yin’wana ni yin’wana ya matsalwa lama nga edyondzweni yoleyo. Hlamusela ntsena leswi lavekaka leswaku u hlamusela yinhla leyi mi dyondzaka ha yona.
5, 6. Xana hi nga swi pfuna njhani swichudeni leswaku swi tirhisa Rito ra Xikwembu evuton’wini bya swona, kambe i yini lexi hi faneleke hi xi papalata?
5 Hlamusela Lomu Ma Tirhaka Kona: Loko swi fanela, pfuna xichudeni leswaku xi vona ndlela leyi Matsalwa ma xi khumbaka ha yona. Hi xikombiso, loko mi bula hi Vaheveru 10:24, 25 ni xichudeni lexi nga si sungulaka ku ya eminhlanganweni ya vandlha, u nga ha xi hlamusela wun’wana wa minhlangano kutani u xi rhamba enhlanganweni wa kona. Kambe papalata ku xi endla xi twa onge wa xi sindzisa. Endla leswaku Rito ra Xikwembu ku va rona ri xi susumetelaka ku teka goza leswaku xi ta tsakisa Yehovha.—Hev. 4:12.
6 Loko hi ri karhi hi endla ntirho wa hina wa ku endla vadyondzisiwa, a hi pfuneni vanhu hi ku tirhisa Matsalwa hi ndlela leyi faneleke, leswaku hi va ‘kondletela ku yingisa hi ripfumelo.’—Rhom. 16:26.