Ku Chumayela eMisaveni Leyi Tshamaka Yi Ri Karhi Yi Cinca
1 Hakunene swilo swi cinca hi ku hatlisa! Hi xitshuketa, mhangu ya ntumbuluko, ku wa ka ikhonomi, hasa-hasa ya swa tipolitiki kumbe khombo ro karhi, swi nga ha va mhaka leyi vanhu vo tala va vulavulaka ha yona. Hambiswiritano, vanhu va nga ha swi rivala hi ku hatlisa sweswo. (Mint. 17:21; 1 Kor. 7:31) Emisaveni leyi, leyi tshamaka yi ri karhi yi cinca, xana hi nga wu koka njhani nyingiso wa vanhu leswaku hi kota ku va byela rungula ra Mfumo?
2 Ku Xiya Leswi Vilerisaka Vanhu: Ndlela yin’wana leyi hi nga kokaka nyingiso wa vanhu ha yona i ku vulavula hi swiendlakalo swa sweswinyana. Loko a khutaza vayingiseri va yena leswaku va anakanyisisa hi xiyimo xa vona ni Xikwembu, siku rin’wana Yesu u boxe makhombo lawa a ma ha ku humelela, lawa a ma ha ri emianakanyweni ya vona. (Luka 13:1-5) Hilaha ku fanaka, loko hi chumayela mahungu lamanene, i swinene ku vulavula hi mhaka leyi ya ha ku endlekaka kumbe timhaka ta kwalaho leti khumbaka vanhu lava nga ensin’wini ya hina. Hambiswiritano, loko hi vulavula hi timhaka to fana ni leti, hi fanele hi va ni vuxiyaxiya leswaku hi nga seketeli tlhelo ro karhi eka tipolitiki kumbe timhaka leti khumbaka vanhu va ndhawu leyi hi nga eka yona.—Yoh. 17:16.
3 Xana hi nga swi tivisa ku yini leswi vanhu va swi anakanyaka sweswi? Kumbexana ndlela yo antswa i ku vutisa xivutiso, hi tlhela hi yingisela loko va vulavula. (Mat. 12:34) Loko vanhu hi va rhandza, hi ta xiya ndlela leyi va titwaka ha yona hi timhaka to karhi kutani hi vutlhari hi ringeta ku va xokola leswaku va tiphofula. Leswi n’wini wa muti a swi vulaka swi nga ku endla u tiva leswi swi vilerisaka vanhu vo tala endhawini ya ka n’wina naswona swi nga ku pfulela ndlela yo chumayela.
4 Ku Lunghiselela Xingheniso: Loko hi lunghiselela ku ya entirhweni wa nsimu emisaveni leyi leyi tshamelaka ku cinca, hi nga tirhisa buku leyi nge Ku Hlamulana. Swiringanyeto leswi tirhaka swa ndlela yo nghenisa swiendlakalo swa sweswinyana eka xingheniso xa hina, swi xaxametiwe eka matluka 13-14, ehansi ka xihloko lexi nge “Vugevenga/Vuhlayiseki” ni lexi nge “Swiendlakalo Swa Sweswinyana.” Rungula leri fanaka ra kumeka eka Vutirheli Bya Hina Bya Mfumo bya September 2000, tluka 3. Loko u lunghiselela xingheniso xa wena, tiyiseka leswaku u katsa ni tsalwa leri faneleke.
5 Loko hi ri karhi hi xiya swilo swo hambana-hambana leswi vilerisaka vanhu lava nga ensin’wini ya hina, hi fanele hi cinca swingheniso swa hina swo vulavula hi mahungu lamanene leswaku swi fambisana ni mivilelo ya vona. Hi ndlela yoleyo, hi ta va hi vulavula ni vanhu hi swilo leswi swi va khumbaka swinene. Xisweswo, hi ta pfuna vo tala leswaku va tiva Loyi timfanelo ni milawu ya yena swi nga cinciki.—Yak. 1:17.