Tirhisa Swiendlakalo Swa Sweswinyana Leswaku U Pfuxa Ku Tsakela

¹ Xana u nga tsakela ku tshama u ri ni timhaka letinene leti nga ta endla leswaku vutirheli bya wena byi tshama byi tsakisa ni leswaku vanhu va tsakela rungula ra Bibele? Loko swi ri tano, sungula mabulo hi ku tirhisa swiendlakalo swa misava ni swilo leswi endlekaka endhawini ya ka n’wina. U nga ha tirhisa swiendlakalo swa sweswinyana swa ndhawu ya ka n’wina ni leswi humelelaka etikweni kumbe mahungu lama khumbaka matiko hinkwawo. Swilo sweswo swi tshama swi ri karhi swi hundzuka. (1 Kor. 7:31) Anakanya hi swikombiso leswi landzelaka.

² Vanhu va karhatekile hi swiphiqo swa ikhonomi ni ku durha ka swilo. Xisweswo, u nga ha ku:

◼ “Xana u swi twile emahungwini leswaku nxavo wa [vula nchumu wa kona] wa tlakuka nakambe?” Kumbe u nga ha vulavula hi ku pfumaleka ka mintirho loko ku ri leswaku feme leyikulu ya ha ku hunguta vanhu vo tala. Swi titshege hi ndlela leyi u lavaka ku yisa bulo rero emahlweni ha yona, u nga ha vutisa u ku “Xana u tshama u tivutisa leswaku ha yini swi tika ku kuma swo tihanyisa ha swona?” kumbe “Xana u ehleketa leswaku swi ta tshama swi ri karhi swi tika ku kuma swo tihanyisa ha swona?”

³ Xin’wana lexi nga vekaka xisekelo xa bulo i swiviko swa madzolonga, swo fana ni makhombo emindyangwini kumbe eka swichudeni swa xikolo. U nga ha ku:

◼ “Xana u swi twile leswi vuriweke eka phepha-hungu leswaku [vula khombo ra kona ra ndhawu ya ka n’wina]?” Kutani u nga ha vutisa u ku “U ehleketa leswaku i yini lexi vangaka madzolonga yo tano emisaveni?” kumbe u ku “Xana u ehleketa leswaku wu ta fika nkarhi lowu hi nga ta titwa hi sirhelelekile?”

⁴ Timhaka tin’wana leti nga pfuxaka ku tsakela i mahungu ya tindhambhi leti onhaka, ku tsekatseka ka misava kumbe nkitsikitsi lowu nga kona etindhawini to hambana-hambana ta misava. Hi xikombiso, u nga ha vutisa u ku:

◼ “Xana Xikwembu hi xona xi nga vanga [vula mhangu ya ntumbuluko]?” Kumbe u nga ha vula mpfilumpfilu lowa ha ku humelelaka etikweni kutani u ku: “Loko vanhu hinkwavo va lava ku rhula, ha yini swi tika swonghasi ku ku fikelela?”

⁵ Tshama u xalamukele swiendlakalo swa sweswinyana leswi u nga swi tirhisaka swi va xingheniso xa wena. Swiringanyeto leswi pfunaka swi kumeka eka xihlokwana lexi nge “Swiendlakalo Swa Sweswinyana,” eka tluka 13 ra buku leyi nge Ku Hlamulana. Hambiswiritano, papalata ku hlawula ndluwu u siya hove etimhakeni ta tipolitiki kumbe ta vaaka-tiko. Ematshan’weni ya sweswo, yisa nyingiso eka Matsalwa ni le ka Mfumo wa Xikwembu tanihi swona ntsena leswi nga tisaka ntlhantlho wa hilaha ku nga heriki eka swiphiqo swa vanhu.