Ku Twisisa Nhlamuselo Ya Swiendlakalo Swa Sweswinyana

1 “Misava leyi ni swa yona hinkwaswo swa hundza.” (1 Vakor. 7:31) Leswi swi kombisiwa hi swiendlakalo swa sweswinyana leswi humelelaka hi ku hatlisa. Kun’we ni hinkwaswo leswi swi humelelaka exikarhi ka nhlengeletano ya Yehova, leswi swi vula yini eka wena hi wexe?—Luka 21:28.

2 Ku hetiseka ka vuprofeta bya Bibele eka lembe xidzana leri ra vu-20 ku tiyisekisa leswaku mafambiselo hinkwawo layo biha ya swilo ma le masikwini ya wona ya makumu. (Mat. 24:3-14; Luka 21:7-11) Yesu u vule leswaku “rixaka leri ri nga ka ri nga hundzi, ku nga si humelela swilo leswi hinkwaswo.” (Luka 21:32) Xana wa swi twisisa leswaku leswi swi vula yini eka vanhu lava nga si yimaka etlhelweni ra Yehova ensin’wini ya ka n’wina? Loko u swi twisisa, leswi swi na nkucetelo wihi evutirhelini bya wena bya nsimu?—Luka 21:34-36.

3 Pfuna Van’wana Loko Nkarhi Wa Ha Ri Kona: Yesu u khutaze vadyondzisiwa va yena ku tirhisa swiyimo leswinene kahle leswaku va twarisa mahungu lamanene. (Yoh. 9:4) Muapostola Pawulo u phindhe xitsundzuxo lexi fanaka loko a khutaze vamakwerhu eKolosa a ku “tirhisanani ni va le handle hi ku tlhariha, mi ri karhi mi londzovota nkarhi lowu mi nga na wona.”—Vakol. 4:5.

4 Van’wana va yingisele xitsundzuxo xa muapostola Pawulo xo londzovota nkarhi naswona va ve maphayona ya nkarhi hinkwawo. Vantshwa vo tala va nghenele ntirho wa vuphayona bya nkarhi hinkwawo va ha ri exikolweni naswona va humelele kahle hi ku endla tano. Vantshwa exikolweni va nga londzovota nkarhi lowu nga kona ku pfuna vadyondzi-kulobye va twisisa nhlamuselo ya leswi humelelaka namuntlha ni ntshembo lowu vangamaka wa vumundzuku ehansi ka Mfumo wa Xikwembu.—Ekl. 12:1.

5 Hi nga tirhisa nkarhi wa hina kahle evutirhelini bya nsimu hi October hi ku nyikela magazini wa Xihondzo xo Rindza nkarhi wun’wana ni wun’wana. Magazini lowu wu nyika ku twisisa lokunene ka nhlamuselo ya ntiyiso ya swiendlakalo swa sweswinyana. Wu nyike vanhu lava khathalaka lava u va kumaka loko u tirha hi yindlu na yindlu. Teka goza ro wu nyikela eka vadyondzi-kuloni kumbe eka vanhu laha u tirhaka kona. Kandziyisa tinhloko-mhaka leti ti nga ha tsakisaka vanhu lava u va tivaka hi ndlela yo karhi. Hi xikombiso, Xihondzo xo Rindza xa October 1, 1991, xi na swihloko swa mhaka leyi Xikwembu xi lehiseke mbilu swonghasi ha yona. Nhloko-mhaka leyi yi ta tsakisa vanhu vo tala.

6 Nhloko-mhaka ya Mbulavurisano ya sweswinyana yi nga tirhisiwa hi ndlela yihi? Endzhaku ko titivisa, u nga ha vutisa n’wini wa muti u ku: “Ha yini u ehleketa leswaku hi langutana ni swiyimo swo tala leswi karhataka namuntlha?” Endzhaku ka nhlamulo ya yena, u nga ha engetela u ku: “Bibele ya pfumela leswaku eka vanhu vo tala, vutomi a byi tshembisi naswona bya karhata. Xiya leswi vuriwaka laha eka Eklesiasta 2:17. [Hlaya.] Xana wa pfumelelana ni leswi tsariweke laha? [Yimela nhlamulo.] I yini lexi u nga ha vulaka leswaku hi xona xi nga ta chavelela munhu la langutanaka ni swiphiqo swo tala? [Yimela nhlamuselo.] Hi leri tsalwa leri hi nyikaka langutelo lerinene hi vutomi. [Hlaya Psalma 37:39, 40.] Hi yona mhaka leyi Timbhoni ta Yehova ti khutazaka dyondzo ya Bibele ha yona. Hi xikombiso, xiya nhloko-mhaka leyi kambisisiwaka eka magazini wa hina wa Xihondzo xo Rindza wa sweswinyana.” Kutani nyikela xikhokhelo. Loko xikhokhelo xi nga amukeriwi, nyikela timagazini to karhi kumbe u siya xiphephana.

7 A swi kanakanisi leswaku leyi i minkarhi leyi nyanyulaka yo tirhela Yehova. Onge yinhla leyi yi nga hi susumetela ku tirhisa minkarhi hi ndlela leyinene n’hweti leyi ku pfuna vanhu lavanene hi laha ku engetelekeke, va vona nhlamuselo ya ntiyiso ya swiendlakalo swa sweswinyana.