Tinyiketele Evutirhelini Bya Nsimu Xiyenge 4: Ku Hleleriwa Ku Hetisisa Vutirheli Bya Hina Hi Laha Ku Humelelaka

1 Vutirheli bya le rivaleni bya ku tinyiketela byi lava ku hleleka lokunene ka munhu hi xiyexe. Yesu u boxe ntila lowu xiyekaka wa ntirho wa hina wa vutirheli namuntlha. (Luka 10:1, 2; Mintirho 1:8) Nakambe hi nga dyondza eka ndlela leyi vadyondzisiwa va yena va lembe xidzana ro sungula va hetisiseke vutirheli bya vona ha yona. (Mintirho 5:42; 2 Tim. 4:5) Xana u nga hleleka njhani hi laha ku antswaka kutani u tiphina hi mimbuyelo leyinene leyi fanaka namuntlha?

2 Hlela Nkarhi Wa Ntirho Wa Nsimu: Vutirheli bya hina a hi xivumbeko xa vutomi xa ntolovelo kumbe xa xitshuketa. Nkarhi lowu hi wu nyikelaka leswaku hi hetisisa vutirheli bya hina wu fanele wu hleriwa. Leswaku hi hlela vutirheli bya hina hi laha ku humelelaka, hi fanele hi veka nkarhi etlhelo wa swivumbeko swa byona swo hambana-hambana. (Vaef. 5:15, 16) Vahuweleri vo tala va swi kuma swi pfuna ku veka pakani ya mpimo wa tiawara leti va nga ta ti heta evutirhelini bya nsimu n’hweti yin’wana ni yin’wana. Leswi hakanyingi swi lava ku hlela swiyimo swa vona ni leswaku va hlanganyela ensin’wini vhiki rin’wana ni rin’wana. Vatswari va Vakriste va fanele va pfuna vana va vona ku veka nkarhi wa ku hlanganyela nkarhi na nkarhi eka swivumbeko swo hambana-hambana swa vutirheli bya nsimu.—Deut. 6:7; Swiv. 22:6.

3 Veka Tipakani Leti Nga Ni Xikongomelo: Tipakani ta xiviri ti ta ku nyika xo karhi lexi u nga ta kongoma eka xona. Loko u fikelela pakani ya wena, u ta kuma ntsako wo hetisisa. (Swiv. 13:12) Muapostola Pawulo u khutazile: “Ntsena a hi khomeni hi tiya eka leswi hi nga fika eka swona.” (Vafil. 3:16) Tanihi swivumbeko hinkwaswo swa nhluvuko wa wena wa moya, ntirho wa wena wa nsimu wu fanele wu nyika vumbhoni bya ndlela leyi hlelekeke.

4 Hi xikombiso, xana u na mphakelo lowu eneleke wa swiphephana? Xana u tshama u ri na mphakelo lowu eneleke wa timagazini ta sweswinyana, naswona xana ti le xiyin’weni lexinene? Xana u tirhisa tirhekhodo ta yindlu na yindlu hi ndlela leyinene, u tirhisa yin’we ku rhekhoda lava tsakeleke naswona yin’wana ya lava nga riki kona ekaya?

5 U nga si hlanganyela evutirhelini, tinyike nkarhi wo pfuxeta Nhloko-mhaka Ya Mbulavurisano ya sweswinyana. Hlawula tinhla to vulavurisana eka buku leyi nyikeriwaka, naswona u lunghekela ku ti tirhisa hi laha ku humelelaka leswaku u pfuxa ku tsakela. Nakambe, lunghekela ku tirhisa buku-mpfuno ya ntirho wa nsimu leyi nge Reasoning From the Scriptures. Hambi ku ri exikarhi ka maendzo, u nga endla nkambisiso wa xihatla eka swiringanyeto swin’wana swa yona swo tala. Ku tirhisa tinhla leti ti tirhaka swi ta antswisa ku humelela ka vutirheli bya wena.

6 Ku va ni xiphemu lexikulu ‘entirhweni wo kwetsima wa mahungu lamanene’ emasikwini lawa ya makumu i lunghelo leri katekisiweke. (Varhoma 15:16) Hi fanele hi lwela ku hetisisa vutirheli bya hina hi ku nyikela vumbhoni lebyinene lebyi kotekaka, ‘mihandzu ya milomu.’ (Vahev. 13:15; ringanisa Hosea 14:2.) Leswaku hi endla leswi, a hi vekeni nkarhi wa ku hlanganyela nkarhi na nkarhi ensin’wini ni ku simeka tipakani letinene leti nga ta hi pfuna ku hetisisa vutirheli bya hina leswaku hi dzunisa Yehova.