Va Lamarile Kambe Va Bindzula
1 Loko u ri un’wana wa vo tala lava lamaleke, lava nga Timbhoni ta Yehovha, u nga swi kota ku va ni vutirheli lebyi vekaka mihandzu. Entiyisweni, swiyimo swa wena swi nga ku pfulela nkarhi lowunene wo nyikela vumbhoni ni ku khutaza van’wana.
2 Tindlela To Nyikela Vumbhoni: Vanhu vo tala lava lamaleke va swi kota ku hlanganyela entirhweni wo chumayela. Hi xikombiso, makwerhu un’wana wa xisati loyi swi n’wi tikelaka swinene ku famba ni ku vulavula hikwalaho ka vuhandzuri lebyi a endliweke byona, u kume leswaku wa swi kota ku endla ntirho wo fambisa timagazini loko nuna wa yena a yimise movha ekusuhi ni ndlela leyi ku hundzaka vanhu vo tala eka yona. Siku rin’wana u fambise timagazini to ringana 80 hi tiawara timbirhi ntsena! Swiyimo swa wena swo hlawuleka swi nga ha endla leswaku u hlangana ni vanhu lava swi nga oloviki ku va fikelela. Loko swi ri tano, va teke va ri nsimu ya wena yo hlawuleka.
3 Ku chumayela ka wena ku nga vuyerisa swinene! Loko van’wana va vona ku tiyimisela ka wena ni ndlela leyi ntiyiso wa Bibele wu ku pfuneke ha yona, va nga ha ri tsakela rungula ra Mfumo. Ku tlula kwalaho, loko u hlangana ni vanhu lava xanisekaka, ntokoto wa wena wu nga ku pfuna leswaku u va chavelela hi marito lama humaka eRitweni ra Xikwembu.—2 Kor. 1:4.
4 U Nga Khutaza Van’wana: Xana a yi ku khutazanga mhaka ya vutomi bya Laurel Nisbet, loyi a a heteke malembe ya 37 a ri karhi a hanya hi hawu ra nsimbi kambe a pfuneke vanhu va 17 leswaku va va ni vutivi lebyi kongomeke bya ntiyiso wa Bibele? Hilaha ku fanaka, xikombiso xa wena lexinene xi nga pfuna vapfumeri-kulobye leswaku va tinyiketela entirhweni wa Yehovha.—g93 1/22 matl. 18-21.
5 Hambiloko swiyimo swa wena swi nga ku pfumeleli leswaku u ya ensin’wini hilaha u navelaka ha kona, u nga swi kota ku khutaza van’wana. Makwerhu un’wana u te: “Ndzi xiye leswaku hambi ku ri munhu la lamaleke swinene a nga va pfuna van’wana. Mina ni nsati wa mina hi pfune vanhu vo hambana-hambana evandlheni. Swiyimo swa hina swi endla leswaku hi kumeka nkarhi hinkwawo.” Hambiswiritano, hikwalaho ka leswi u lamaleke, swa twisiseka leswaku a hi nkarhi hinkwawo laha u nga ta tirha hilaha u navelaka ku tirha ha kona. Kambe, hi ku pfuniwa hi van’wana u nga swi kota ku hoxa xandla entirhweni wo chumayela. Hikokwalaho, loko u lava mpfuno wo karhi, u nga kanakani ku tivisa vakulu kumbe van’wana evandlheni, lava va nga kotaka ku ku pfuna.
6 Yehovha u vona hinkwaswo leswi u swi endlaka leswaku u n’wi tirhela, naswona wa tsaka hileswi u n’wi tirhelaka hi mbilu hinkwayo. (Ps. 139:1-4) Loko u titshega ha yena, u ta ku nyika matimba leswaku vutirheli bya wena byi veka mihandzu byi tlhela byi tsakisa.—2 Kor. 12:7-10.