“Tshamani Mi Lunghekile”

¹ Eka vuprofeta bya yena lebyi xiyekaka malunghana ni makumu ya mafambiselo lawa ya swilo, Yesu u nyikele xitsundzuxo malunghana ni ntlhamu wa ku khomeka ngopfu hi timhaka ta siku na siku. (Mat. 24:36-39; Luka 21:34, 35) Tanihi leswi nhlomulo lowukulu wu nga tlhekekaka nkarhi wun’wana ni wun’wana, swa boha leswaku hi yingisa ndzayo ya Yesu leyi nge: “Tshamani mi lunghekile, hikuva N’wana wa munhu u ta ta hi nkarhi lowu mi nga wu ehleketiki.” (Mat. 24:44) I yini lexi nga hi pfunaka emhakeni leyi?

² Ku Lwisana Ni Mivilelo Ni Swikavanyeto: Nchumu wun’wana lowu hi faneleke hi tivonela eka wona i “ku vilela hi vutomi.” (Luka 21:34, nhlamuselo ya le hansi ya NW.) Ematikweni man’wana, vusweti, ku pfumaleka ka mintirho ni ku durha ka swilo swi endla leswaku ku kuma swilaveko swa vutomi swi tika. Ematikweni man’wana, ku hlongorisa swilo leswi vonakaka i mhaka leyi tolovelekeke. Loko hi tshamela ku anakanya hi swilo leswi vonakaka, hi ta tikuma se hi tivekele etlhelo timhaka ta Mfumo. (Mat. 6:19-24, 31-33) Minhlangano ya Vukreste yi hi pfuna ku tshama hi xalamukile. Xana u swi endla pakani ya wena ku va kona eka nhlangano wun’wana ni wun’wana?—Hev. 10:24, 25.

³ Namuntlha misava yi tele hi swikavanyeti leswi nga hi dyelaka nkarhi wa hina wa risima. Ku tirhisa khompyuta swi nga va ntlhamu loko munhu a heta nkarhi wo tala a ri karhi a valanga Internet, a hlaya ni ku rhumela E-mail, kumbe ku tlanga mintlango eka khompyuta. Tiawara to tala ti nga dyiwa hi ku hlalela thelevhixini, tifilimi, xintirhwana xa ku tihungasa, ku hlaya tibuku ta misava, ni mintlangu naswona swi nga hi dyela nkarhi ni ku hi karharisa lerova hi nga ha swi koti ku endla swilo swa moya. Hambileswi ku tlanga ni ku wisa swi nga hi phyuphyisaka swa xinkarhana, kambe dyondzo ya Bibele ya munhu hi xiyexe ni ya ndyangu yi pfuna hi laha ku nga heriki. (1 Tim. 4:7, 8) Xana siku ni siku wa ti nyika nkarhi wo anakanyisisa hi Rito ra Xikwembu?—Efe. 5:15-17.

⁴ Ha tsaka hileswi nhlengeletano ya Yehovha yi nga ni nongonoko wa ku hi dyondzisa swilo swa moya leswaku yi hi pfuna ku “humelela loko [hi] balekela swilo leswi hinkwaswo leswi nga ta humelela, ni ku yima emahlweni ka N’wana wa munhu”! (Luka 21:36) Onge hi nga ma tirhisa swinene malunghiselelo lawa naswona hi ‘tshama hi lunghekile’ leswaku ripfumelo ra hina ri ta “kumeka [ri] ri xivangelo xa ku vongiwa, ku vangamisiwa ni ku xiximiwa eku hlavuteriweni ka Yesu Kreste.”—1 Pet. 1:7.