Xana Hi Tshama Hi Xalamukile—Hi Papalata Swihinga?
1 Yesu u tsundzuxile: “Hitekani ke, . . . leswaku mi kuma matimba ya ku pona” makhombo lama nga ta ta. (Lk. 21:36) Hi hanya enkarhini wa khombo swinene ematin’wini ya munhu. Khombo ri rindzele lava khudzehelaka hi tlhelo ra moya. Leswi swi vanga khombo eka un’wana ni un’wana wa hina. Yesu u vulavule hi ku dya, ku nwa ni swivilelo swa vutomi bya siku rin’wana ni rin’wana. Ha yini? Hikuva hambi ku ri swilo leswi swi nga hi khomeleta, swi va swihinga, ivi swi vanga vurhongo bya moya lebyi nga ni khombo.
2 Swihinga Leswi Tolovelekeke: Van’wana va khomekile hi ku tihungasa loku tlulaka mpimo kumbe loku kanakanisaka hambi ku ri ku godzomberiwa hi TV. Kavula, ku rhanga hi lava Mfumo ku sungula a swi vuli swona leswaku hi fanele hi papalata swivumbeko hinkwaswo swa ku tihungasa. Loko hi hlawula kahle ni ku ringanisela, ku tihungasa ku nga pfuna. (Ringanisa 1 Timotiya 4:8.) Kambe ku va xihinga loko se ku endliwa mhaka leyikulu evuton’wini bya hina, ku dya nkarhi wa hina wo tala, xuma xa hina, kumbe ku hlanganyela entirhweni wo chumayela hi Mfumo.
3 Xihinga xin’wana lexi tolovelekeke lexi vangaka vurhongo bya moya i ku navela swilo leswi vonakaka leswi nga riki swa nkoka. Leswi swi lava leswaku munhu a tirha nkarhi wo leha entirhweni wo tihanyisa ivi swi endla leswaku mintirho ya swa moya yi tlhengusiwa. Van’wana a va ha ri na tipakani ta swa moya hikwalaho ko khomeka hi ku hlengeleta swilo leswi vonakaka leswaku va hanya vutomi bya mafehlefehle. Hambi loko hi lava “swakudya ni tinguvu,” hi fanele hi tilangutela eka ku rhandza ngopfu mali, loku nga hi hambukisaka eripfumelweni. (1 Tim. 6:8-10) Loko hi tsandzeka ku hlayisa mahlo ya hina ma langute etimhakeni ta Mfumo, hi nga ha honisa swilaveko swa moya swa ndyangu wa hina ni ku tsandzeka ku hetisisa vutirheli bya hina.—1 Tim. 5:8; 2 Tim. 4:5.
4 Hambi swi ri tano, van’wana va pfumelela ‘timbilu ta vona ti tikeriwa hi ku vilela hi swa vutomi’ ku fikela laha va etlelaka hi tlhelo ra moya. (Lk. 21:34) Minkarhi yin’wana, ku vilela ku va kona hikwalaho ka swiphiqo swa rihanyo kumbe swiyimo swa ndyangu leswi khomisaka gome. Kambe timhaka to tano ta munhu hi xiyexe a ti fanelanga ti pfumeleriwa ku herisa ku xalamukela ka hina makumu lama hatlisaka ya mafambiselo lawa ya swilo.—Mar. 13:33.
5 A xi kona lexi nga ta tsakisa Diyavulosi ku tlula ku va a kote ku hi veka exiyin’weni xo lorha, hi hlongorisa ku titsakisa ka misava. Hi fanele hi lwa leswaku hi tshama hi xalamukile emoyeni. Ha swi tiva leswaku “Siku ra Hosi ri ta fika kukota khamba” naswona i swa nkoka leswaku hi “hitek[a], hi tikhoma.” (1 Tes. 5:2, 6) Loko hi tivona hi ri na swikombiso swa ku khudzehela, i swa xihatla leswaku hi “cukumet[a] mintirho ya munyama.”—Rhom. 13:11-13.
6 Swipfuneto Swo Hi Pfuna Ku Tshama Hi Xalamukile: Hi swihi swipfuneto swo tano? Xikhongelo i xa nkoka. Hi fanele ku khongela nkarhi hinkwawo. (1 Tes. 5:17) Ku va kusuhi ni vandlha ra Vukreste swi ta hi ‘pfuxa ni ku hi komba rirhandzu ni mintirho leyinene.’ (Hev. 10:24) Loko nkarhi na nkarhi, hi tikambisisa hi ku tshembeka swi nga hi pfuna ku tshama hi xalamukele xilaveko xa hina xo lwisana ni ku tsana. (2 Kor. 13:5) Mikhuva leyinene ya dyondzo ya munhu hi xiyexe yi ta hi pfuna ku hi “wundla hi marito ya ripfumelo.” (1 Tim. 4:6, NW) Loko hi gingiriteka, hi nga tiyiseka leswaku hi ta swi kota ku papalata swihinga, hi ‘hiteka, ni ku tiya swinene eku pfumeleni.’—1 Kor. 16:13.
Yi ya emahlweni eka tluka 2
Swihinga (yi sukela eka tluka 1)