Tirhela Yehovha Handle Ko Kavanyetiwa
1 “Ku katekile tiko le’ri Yehova a nga Šikwembu ša rona!” (Ps. 144:15) Xana marito lawa ya Hosi Davhida ma ha ri ntiyiso, hambi ku ri emasikwini lawa yo biha? (Ef. 5:16) Ina! Vakreste va ha kuma ntsako entirhweni wa Yehovha. Swilo a swi hi oloveli minkarhi yin’wana. Sathana wa hi tikisela ‘eminkarhini leyi yo nonon’hwa,’ hambi swi ri tano a hi heli matimba. (2 Tim. 3:1, 2) Swiyimo leswi yaka swi nonon’hwa ngopfu i vumbhoni byin’wana bya leswaku nkarhi wu tshinele wa leswaku Mfumo wa Xikwembu wu herisa misava ya khale leyi boleke ivi wu yi siva hi misava leyintshwa leyi baseke. (2 Pet. 3:13) Munyama wa misava leyi a wu tsanisi kumbe ku herisa ntshembo wa hina lowu tsakisaka; ematshan’wini ya sweswo, ntshembo wa hina wa Mfumo wu ya wu hatima ngopfu. Xana a wu tsaki leswi u tirhelaka Yehovha tanihi rivoningo emisaveni leyi ya munyama?—Flp. 2:15.
2 Hina hi hexe, hi fanele minkarhi hinkwayo hi kambisisa ndlela leyi hi tirhelaka Yehovha ha yona. Ha yini? Hikuva Sathana i Mukavanyeti lonkulu. Dikixinari yin’wana yi hlamusela “ku kavanyeta” tanihi “ku hambukisa,” “ku kokela kumbe ku kongomisa (tanihi mianakanyo ya munhu) eka xilo xin’wana kumbe ematlhelweni man’wana hi nkarhi lowu fanaka,” ni “ku tlhontlha kumbe ku pfilunganya hi mintlhaveko kumbe minsusumeto leyi hambaneke.” Ku sukela loko a cukumeteriwe emisaveni leyi, Sathana u humelerile eku ‘xiseni’ ka vanhu. U tirhise marhengu yo tala leswaku a hambukisa miehleketo ya vanhu etimhakeni ta ntiyiso ta siku ra hina. (Nhlav. 12:9) Hambi leswi Timbhoni ta Yehovha ti tinyiketeleke ku chumayela hi Mfumo eka dzana ra malembe lama hundzeke, xana i vangani vanhu lava tsakelaka timhaka hinkwato ta ku kwetsimisiwa ka vito ra Xikwembu ni ku lweriwa ka vuhosi bya xona hi ku tirhisa Mfumo wa Xikwembu? A hi vangani. (1 Yoh. 5:19) Loko Sathana a kota ku hambukisa tibiliyoni ta vanhu emisaveni leyi, khombo lera ha riki kona hi leswaku a nga hi hambukisa na hina kumbe a nga hi phasa leswaku hi siya vutirheli bya Yehovha. Lexi khomisaka gome, vamakwerhu va hina van’wana va pfilunganyiwile hi mano ya Sathana. Va pfumelele miehleketo ya vona yi hambukisiwa. Ku ni swikavanyeto swo hambana-hambana namuntlha. Xiya swi nga ri swingani swa swona ntsena.
3 Swiphiqo Swa Ikhonomi Ni Ku Rhandza Swilo Leswi Vonakaka: Ematikweni yo tala ya misava, ku pfumaleka ka mintirho ni ku durha ka swilo swi vanga ku karhateka. I ntiyiso, hi fanele hi tiwundla hina ni mindyangu ya hina hi swakudya, swiambalo ni ndhawu yo tshama. Kambe loko ho tipfumelela ku karhateka ngopfu hi swilaveko swa vutomi, swilo sweswo swi ta lawula miehleketo ya hina. Vutomi bya hina bya nyama byi ta va xilo xa nkoka evuton’wini bya hina ematshan’wini yo seketela mhaka ya Mfumo. Muapostola Pawulo u nyike xitsundzuxo emhakeni leyi eka Vaheveru 13:5, 6. Yesu Kreste u hi tiyisekisa leswaku lava va lavaka Mfumo ku sungula va fanele va nga karhateki; Yehovha u hi nyika leswi hi swi lavaka hakunene. (Mt. 6:25-34) Maphayona ni malandza man’wana ya nkarhi hinkwawo emisaveni hinkwayo ma nga tiyisekisa leswaku leswi i ntiyiso.
4 Misava ya Sathana yi hlohlotela ku rhandza swilo leswi vonakaka. Ku va ni swilo swo tala kumbe ku swi hlayisa i moya lowu lawulaka vutomi bya vanhu va timiliyoni. Swikavanyeto leswi fanaka swi humelerile esikwini ra Yesu. Jaha leri fuweke ri vutise Yesu leswaku i yini leswi a ri fanele ri swi endla leswaku ri ta va ni vutomi lebyi nga heriki. Yesu u hlamule a ku: “Loko u ranḍa ku va l’a hetisekeke [kumbe la heleleke], famba u ya šav̌isa leŝi u nga na ŝona, u av̌ela ŝisiwana, kwalaho u ta va ni šuma e tilweni; kutani u ta, u nḍi lanḍa.” (Mt. 19:16-23) Handle ko kanakana, swilo swo tala leswi vonakaka swa jaha leri swi ri kavanyete ku tirhela Xikwembu hi moya-xiviri wa rona hinkwawo. Mbilu ya rona a yi voyamele eka rifuwo ra rona. Yesu a a swi tiva leswaku jaha leri a ri ta pfuneka loko a ro tirhula swikavanyeto leswi. Swi ri sivele ku tinyiketela eka Xikwembu hi ku helela. Ku vuriwa yini hi wena? Xana u tikuma u tirha tiawara to tala entirhweni wo tihanyisa, u tirhela ntsena ku hlayisa ndlela yo hanya leyi u yi toloveleke? Xana leswi swi khumbe vutirheli bya wena eka Yehovha? Xana swilo swa wena leswi vonakaka swi teka nkarhi wa swilaveko swa Mfumo? (Mt. 6:24) Xana u nga olovisa vutomi bya wena hi ku tinyika nkarhi lowu engetelekeke wa swilaveko swa moya?
5 Timhaka Leti Tolovelekeke Ta Siku Na Siku: Loko hi nga xiyi, hi nga tikuma hi khomekile ngopfu hi timhaka leti tolovelekeke ta vutomi ivi hi sungula ku honisa ku lava swa moya. Tsundzuka vanhu va le sikwini ra Nowa. A va khomekile ngopfu hi timhaka to titsakisa, a va dya, va nwa, va tekana, va hlomisa ni vana va vona, lerova a va anakanyanga nchumu hi rungula ra xitsundzuxo ra Nowa mayelana ni Ndhambhi leyi a yi ta. Va nga si swi xiya, Ndhambhi yi fikile ivi yi va lovisa hinkwavo. Ku kavanyetiwa ka vona swi vule ku lovisiwa ka vona. Yesu u te: “Ŝi ta endlisa ŝeŝo e ku teni ka Ṅwana-wa-munhu.” (Mt. 24:37-39) Hakunene, vanhu vo tala namuntlha va khomeke ngopfu hi vutomi bya vona lerova a va yingisi rungula ra xitsundzuxo leri hi va tiselaka rona. A va swi tsakeli swilo swa moya.
6 Xana vutomi bya wena byi taleriwa ngopfu hi mintirho yo titsakisa lerova timhaka ta moya ti kuma nkhathalelo lowutsongo? Siku rin’wana, Yesu a rhambiwile ku va muendzi ekaya ra Marta na Mariya. Mariya a yingiserisisa leswi a a swi vula. Kasi hi tlhelo rin’wana, Marta “a khomiwile ngopfu hi mitiro le’yo tala.” Marta a khathalela ngopfu ku va muamukeri lonene. U tsandzeke ku vona xilaveko xo va ni nkarhi wo yingisela Yesu. U byele Marta hi musa leswaku swilo swo tala a swi nga ri swa nkoka; nkhathalelo lowukulu wu fanele wu nyikiwa timhaka ta moya. Xana u fanele ku tirhisa xitsundzuxo xexo? (Lk. 10:38-42) Yesu u tlhele a tsundzuxa leswaku hi fanele hi tivonela leswaku hi nga tikeriwi hi madyo ni ku nwa ngopfu, hi pfala mianakanyo ya hina. Eminkarhini leyi yo nonon’hwa ematin’wini ya munhu, hi fanele hi xalamuka swinene.—Lk. 21:34-36.
7 Ku Lava Ku Titsakisa: Ndlela yin’wana leyikulu yo hambukisa leyi Diyavulosi a yi tirhisaka ku hi susa emhakeni ya Mfumo i ku lava ku titsakisa. Timiliyoni ta vanhu va Vujagana ti hlawule ku titsakisa ematshan’wini ya Xikwembu. Va rhandza ku titsakisa hi swilo swin’wana ematshan’wini yo kombisa ku tsakela ka xiviri eRitweni ra Xikwembu. (2 Tim. 3:4) I ntiyiso, ku titsakisa ni vuhungasi lebyinene, a swi hoxanga. Kambe ku tirhisa nkarhi wo tala ngopfu vhiki rin’wana ni rin’wana eka swilo swo fana ni thelevhixini, tibayiskopo, tivhidiyo, mintlango, ku hlaya tibuku ta misava kumbe swihungaso swin’wana swi nga endla leswaku hi va ni mbilu ya mano ivi yi hi hambanisa na Yehovha. (Yer. 17:9; Hev. 3:12) Xana leswi swi nga humelerisa ku yini? Hi nkarhi wa minhlangano ya Vukreste, u nga kuma leswaku miehleketo ya wena ya pepetseka; u nga ha tsakela ni leswaku nhlangano wu hela leswaku u ta tlhelela eku titsakiseni. Hi xihatla, u nga ha tikuma u lava swivangelo leswi nga ta endla leswaku u tshama ekaya ematshan’wini ya ku ya eminhlanganweni kumbe ku hlanganyela evutirhelini bya nsimu. Sweswi i nkarhi wa ku ehleketa kahle loko swilo leswi swi sungula ku kavanyeta vutomi bya wena. (Lk. 8:14) Xana tiawara leti hundzeke leti tirhiseriweke ku titsakisa a ti nge tirhisiwi ku antswa leswaku u kula emoyeni?
8 Timhaka Tin’wana Leti Dyaka Nkarhi: Van’wana va tikume va phasiwile hi matshalatshala yo ringeta ku tlhantlha swiphiqo swa vanhu va manguva lawa. Vakreste va fanele va papalata minjhekanjhekisano ya misava leyi nga heriki ya timhaka ta ntshamisano kumbe matshalatshala ya yona lama nga pfuniki nchumu yo lulamisa vuhomboloki. (Yoh. 17:16) Hinkwaswo leswi i xiphemu xa matshalatshala ya Sathana ya leswaku a hi hambukisa exitsundzuxweni xa Bibele ni le mhakeni ya nkoka ya leswaku ku ni ntlhantlho wun’we lowu nga heriki—Mfumo wa Xikwembu. Loko hi tshama hi xaniseka kumbe hi endliwa nsele, hi fanele hi tivonela leswaku hi nga rihiseli kumbe ku karhateka swinene emintlhavekweni lerova hi rivala leswaku hi hina vamani—Timbhoni ta Yehovha. Eka hinkwaswo, i Yehovha la dyoheriweke naswona i vito rakwe leri faneleke ku kwetsimisiwa.—Esa. 43:10-12; Mt. 6:9.
9 Hambi loko un’wana ni un’wana a lava rihanyo lerinene, ku khathalela ngopfu mianakanyo leyi vonakaka yi nga heli ni vutshunguri lebyi tirhisiwaka swi nga endla munhu a anakanya ngopfu hi timhaka ta rihanyo. Ku ni vanhu vo tala ngopfu lava bumabumelaka swakudya swo hambana-hambana, matshungulelo ni vutshunguri bya swiphiqo swa miri ni swa mintlhaveko, lebyi byo tala byi lwisanaka ni byin’wana. Leswi munhu a swi endlaka etimhakeni ta rihanyo i xiboho xa munhu hi xiyexe, ntsena loko swi nga lwisani ni mimpimanyeto ya Bibele. A hi hambeteni hi hlayisa ntshembo wa hina lowu heleleke eMfun’weni wa Xikwembu tanihi murhi wa xiviri wa vuvabyi bya vanhu.—Esa. 33:24; Nhlav. 21:3, 4.
10 Tiya, U Nga Tsekatseki: Tanihi leswi makumu ma tshinelaka, Sathana u ta engetela matshalatshala yakwe ya ku ku kavanyeta eku tirheleni ka Yehovha. “Ṅwi ariseni hi ku tiya e ku pfumeleni.” (1 Pet. 5:9) Njhani? Hambani mi tiwundla hi dyondzo ya Xikwembu. (Mt. 4:4) Mi nga pfumeleli swikavanyeto swa misava swi dyela n’wina ni mindyangu ya n’wina nkarhi lowu mi wu lavaka wa ku ehleketisisa ni ku langutisisa khwatsi Rito ra Xikwembu. Hi nkarhi wa swakudya swa ndyangu, bulani hi mintokoto leyi akaka ni timhaka ta moya. Namarhelani xiyimiso xa nkarhi na nkarhi xa dyondzo ya munhu hi xiyexe ni xa ku lunghiselela minhlangano.
11 Loko swivilelo swi xungeta ku kavanyeta miehleketo ya wena, rhula ndzhwalo wa wena eka Yehovha hi xikhongelo. Tiyiseka leswaku wa ku khathalela. (1 Pet. 5:7) Pfumelela ku rhula ka Xikwembu ku hlayisa mbilu ya wena ni miehleketo ya wena. (Flp. 4:6, 7) U nga pfumeleli swikavanyeto swi kavanyeta langutelo ra wena ra moya. Hlayisa Yehovha a ri kusuhi na wena nkarhi na nkarhi, hi laha Yesu a endleke ha kona. (Mint. 2:25) Hlayisa mahlo ya wena ma langute pakani ya wena, tanihi laha Swivuriso 4:25-27 yi hi khutazaka ha kona: “Mahlo ya wena a ma langute ma lulamile, tinšiye ta wena a ti pfuleke hi ku lulama. Anakanya ndlela ya nenge wa wena, tindlela ta wena hikwato ti ta tiya. U nga ṭhuki u hambukela šineneni kumbe e šimaṭini.”
12 Hlanganyela minhlangano hinkwayo hi ku tshembeka ivi u titshinya hi wexe leswaku u yingisela xileriso xa Rito ra Xikwembu. (Hev. 2:1; 10:24, 25) Naswona ematshan’wini yo lava ntsako lowu nyikeriwaka hi misava leyi thyakeke, swi endle pakani ya wena ku hlayisa vutirheli lebyi nga ni mihandzu. Leswi hi swona leswi tisaka ntsako ni ku eneriseka loku nga heriki. (1 Tes. 2:19, 20) Xo hetelela, u nga pfumeleli nchumu kumbe hambi a ri mani a kavanyeta vutirheli bya wena lebyo kwetsima. “Tiyani ŝinene, mi nga ṭekaṭekeni, mi tirela Hosi hi masiku, mi ri kari mi ŝi tiv̌a leŝaku mitiro ya ṅwina yi nga ka yi nga hunḍuki ŝa hav̌a e Hosini.”—1 Kor. 15:58.