Nyimpi Leyi Na Wena U Katsekaka Eka Yona
1, 2. Xana malandza ya Xikwembu ma katseka njhani eku hetisiseni ka xivono xa vuprofeta lexi kumekaka eka Nhlavutelo 9:13-19?
1 “Ntsumi ya vutsevu yi yimba mhalamhala ya yona.” Endzhaku ka sweswo ku twala ku dzindza loku endliwaka hi “mavuthu ya vagadi va tihanci” yo ringana “timiriyadi timbirhi ta timiriyadi.” Leri a hi vuthu leri tolovelekeke ra nyimpi. ‘Tinhloko ta tihanci ti fana ni tinhloko ta tinghala.’ Emilon’wini ya tona ku huma ndzilo, musi ni xivavula naswona “micila ya tona yi fana ni tinyoka.” Vuthu leri ro fanekisela ra onha laha ri hundzaka kona. (Nhlav. 9:13-19) Xana wa swi tiva leswaku u katseka njhani eku hetisiseni ka xivono lexi xa vuprofeta lexi hlamarisaka?
2 Masalela lama totiweke ni vanghana va wona ku nga tinyimpfu tin’wana, hi vun’we va twarisa marito ya Xikwembu ya ku avanyisa. Leswi swi endla Vujagana byi vonaka kahle leswaku byi file hi tlhelo ra moya. A hi kambisiseni swilo swimbirhi eka xivono lexi xa vuprofeta leswi kombisaka matimba ya ntirho lowu endliwaka hi malandza ya Xikwembu.
3. Hi wihi ndzetelo lowu u wu kumeke leswaku u vula rungula ra Xikwembu hi ndlela leyi humelelaka?
3 Ku Leteriwa Ni Ku Hlomiseriwa Ku Vula Rungula Ra Xikwembu: Hi ku tirhisa Xikolo Xa Vutirheli Bya Le Tilweni ni minhlangano yin’wana ya vandlha, vatirheli va Xikwembu va leteriwe ku vula rungula ra Xikwembu hi vurhena. Hi ku tekelela Yesu ni vadyondzisiwa va yena, va ya emahlweni va lavisisa lava swi va fanelaka, va chumayela kun’wana ni kun’wana laha ku nga ni vanhu. (Mat. 10:11; Mar. 1:16; Luka 4:15; Mint. 20:18-20) Ndlela leyi yo chumayela leyi sekeriweke eBibeleni ya tirha hakunene!
4. Hi yihi minkandziyiso leyi vahuweleri vo tala va nga yi tirhisaka leswaku va kota ku endla ntirho wa vona?
4 Magidi ya timiliyoni ta Tibibele, tibuku, tibroxara ni timagazini swi hangalasiwile hi vatirheli lava nga Vakreste leswaku va hetisisa xileriso xa Xikwembu xa leswaku va chumayela. Minkandziyiso leyi yi kumeka hi tindzimi ta kwalomu ka 400 naswona yi ni tinhloko-mhaka to hambana-hambana naswona yi tirhisa tindlela leti fikelelaka timbilu ta vanhu vo hambana-hambana. Xana switirho leswi u swi tirhisa hi ndlela leyi humelelaka?
5, 6. Hi swi tivisa ku yini leswaku vanhu va Yehovha va ni nseketelo lowu humaka etilweni?
5 Nkongomiso Ni Nseketelo Wa Le Tilweni: Xivono xa vuprofeta xi tlhela xi swi veka erivaleni leswaku ntirho lowu endliwaka hi vuthu ro fanekisela wu seketeriwa hi Xikwembu. (Nhlav. 9:13-15) Ntirho wo chumayela emisaveni hinkwayo a wu endliwi hi vutlhari kumbe matimba ya munhu kambe hi moya wa Xikwembu. (Zak. 4:6) Yehovha u tirhisa tintsumi leswaku ti kongomisa ntirho lowu. (Nhlav. 14:6) Xisweswo, ehenhla ka matshalatshala lama endliwaka hi Timbhoni ta yena leti nga vanhu va nyama, Yehovha u tlhela a nyikela nseketelo lowu humaka etilweni leswaku a kokela vanhu va timbilu letinene eka yena.—Yoh. 6:45, 65.
6 Leswi vanhu va Yehovha va leteriweke ni ku hlomiseriwa ku vula rungula ra Xikwembu, naswona va tirhaka ehansi ka nkongomiso wa tintsumi, a xi kona lexi nga yimaka endleleni ya vona. Onge hi nga hambeta hi hetisisa xiphemu xa hina eku hetisekeni ka xivono lexi xa vuprofeta lexi tsakisaka.