Swakudya Swa Moya Hi Nkarhi Lowu Faneleke
1. Xana Ezekiyele 36:29 yi hetiseka njhani namuntlha?
1 Yehovha Hosi Leyi Lawulaka u te: “Ndzi ta . . . vitana mavele ndzi ma andzisa, ndzi nga ka ndzi nga mi tiseli ndlala.” (Ezek. 36:29) Marito wolawo ya vuprofeta ma tirha eka vanhu va Xikwembu namuntlha. Hi ndlela yo fanekisela, Yehovha u endle leswaku mavele lama xurhisaka ya mila hi xitalo leswaku vanhu va yena va kuma swakudya. Mhaka leyi yi kombisiwa kahle hi swakudya swa moya leswi hi phameriwaka swona hi nkarhi emintsombanweni ya hina ya muganga.
2. Xana Yehovha u yi tirhise njhani mintsombano ya muganga leswaku a phamela swakudya swa moya hi nkarhi lowu faneleke?
2 Entsombanweni lowu khomeriweke eColumbus, le Ohio, hi 1931, Yehovha u lerise vagandzeri vakwe leswaku va amukela vito lerintshwa leri nge Timbhoni ta Yehovha. (Esa. 43:10-12) Hi 1935 ntshungu lowukulu lowu boxiweke eka Nhlavutelo 7:9-17 wu hlamuseriwe kahle. Hi 1942, Makwerhu Knorr u nyikele nkulumo leyi nge “Ku Rhula—Xana Ku Ta Tshama Hi Masiku?” Nkulumo leyi yi khutaze leswaku ku chumayeriwa emisaveni hinkwayo kutani sweswo swi endle leswaku ku simekiwa Xikolo xa Bibele xa Giliyadi xa Watchtower. Hambileswi mintsombano yin’wana yi nga rivalekiki hakunene, wun’wana ni wun’wana wu ve tafula leri teleke hi swakudya swo xawula swa moya.—Ps. 23:5; Mat. 24:45.
3. Xana hi fanele hi endla yini leswaku hi vuyeriwa hi nkhuvo wa swakudya swa moya leswi hi phameriwaka swona entsombanweni wa hina wa muganga?
3 Xana U Dya Swakudya Leswi Akaka? Phela swi nga endleka leswaku loko hi nga dyi, hi sika hi ndlala kambe swakudya swi ri kwala nyongeni. (Swiv. 26:15) Swi tano ni hi tlhelo ra moya. Emintsombanweni yo hlayanyana, ku xiyiwe leswaku vo tala va famba-famba swi nga fanelanga kumbe va vulavula ni van’wana hi nkarhi wa nongonoko. Leswi vunakulobye lebyi akaka byi nga nchumu wa nkoka entsombanweni, byi nga tiyisiwa loko nongonoko wu nga si sungula ni loko wu herile. (Ekl. 3:1, 7) Loko hi nga tshamanga ehansi hi rhiya ndleve, hi nga ha lahlekeriwa hi tinhla ta nkoka. Valanguteri va tindzawulo ta ntsombano ni vamakwerhu lava nga ni swiavelo va nga ha kuma swi fanela leswaku minkarhi yin’wana va bula hi timhaka ta ntsombano loko nongonoko wu ri karhi wu ya emahlweni. Kambe loko swilo leswi va lavaka ku bula ha swona swi nga khumbi ntsombano, va fanele va va xikombiso hi ku rhiya ndleve loko nongonoko wu ri karhi wu ya emahlweni. Ku hava ni un’we eka hina la faneleke a lahlekeriwa hi swakudya swa moya leswi hi phameriwaka swona.—1 Kor. 10:12; Filp. 2:12.
4. Hi yihi ndlela leyi hi nga tikombisaka hi ri ni ku nkhensa ha yona eka swakudya swa moya leswi Yehovha a hi nyikaka swona?
4 Mawaku ndlela leyi hi tiphinaka ha yona hi ntiyiso wa moya lowu fuweke lowu Yehovha a hi phamelaka wona, loko wu pimanisiwa ni tidyondzo ta mavunwa ta Vujagana leti nga akiki! (Esa. 65:13, 14) Ndlela yin’wana leyi hi nga ‘tikombaka hi ri ni ku nkhensa’ ha yona i ku va hi teka ntsombano wu ri nkarhi lowu Yehovha a hi dyondzisaka ha wona. (Kol. 3:15) Mianakanyo ya wena a yi dzike eka leswi vuriwaka, ku nga ri eka xivulavuri, naswona u teka rungula rolero ri ri leri humaka eka “Muleteri wa [hina] Lonkulu.” (Esa. 30:20, 21; 54:13) Rhiya ndleve. Tsala tinhla-nkulu hi ku komisa. Pfuxeta tinhla ta nongonoko wa siku rero madyambu man’wana ni man’wana. Tirhisa leswi u swi dyondzeke.
5. I yini leswi mintsombano ya muganga yi hi tsakisa ha swona?
5 Ntsombano wun’wana ni wun’wana lowu vaka kona sweswi loko Armagedoni yi nga si fika, wu komba leswaku Sathana u hluriwile, hambiloko wu khomeriwe etikampeni ta vahlapfa, etikweni leri onhiweke hi nyimpi kumbe endhawini leyi rhuleke ngopfu! Tanihi vamakwerhu lava nga ni vun’we, ha yi tlangela minkarhi leyi hi yi kumaka yo va ntlhambi wun’we emintsombanweni ya muganga. (Ezek. 36:38) Ha tiyiseka leswaku Yehovha u ta tlhela a hi nyika “swakudya hi nkarhi lowu faneleke,” hi ndlela ya rirhandzu.—Luka 12:42.
[Bokisi leri nga eka tluka 4]
Kombisa Ku Tlangela Tafula Ra Yehovha
◼ Rhiya ndleve
◼ Tsala tinhla-nkulu
◼ Pfuxeta tinhla ta nongonoko madyambu man’wana ni man’wana
◼ Tirhisa leswi u swi dyondzeke