Yehovha U Pfuna Lava N’wi Tshembaka
1 Vanhu vo tala va ehleketa leswaku loko munhu a ri ni mali, vulawuri ni vuswikoti byo karhi, vutomi byi n’wi fambela kahle. (Ps. 12:4; 33:16, 17; 49:6) Hambiswiritano, lava chavaka Yehovha naswona va n’wi tshembaka, Bibele ya va tiyisekisa leswaku hi yena “mupfuni wa vona ni xitlhangu xa vona.” (Ps. 115:11) A hi languteni tindlela timbirhi leti eka tona hi faneleke hi kombisa leswaku hi tshemba Yehovha.
2 Tanihi Vatirheli Lava Nga Vakreste: Rini na rini loko hi nyikela tinkulumo evandlheni kumbe loko hi dyondzisa van’wana ensin’wini, hi fanele hi tshemba Xikwembu xa hina. Xiya xikombiso xa Yesu. Hambileswi a a ri N’wana wa Xikwembu, a nga tshembanga vutlhari kumbe vuswikoti bya yena n’wini kambe u tshembele eka Tata wakwe wa le tilweni hilaha ku heleleke. (Yoh. 12:49; 14:10) Kunene, na hina hi fanele hi n’wi tshemba hilaha ku heleleke Tata wa hina la nge matilweni! (Swiv. 3:5-7) Hi ta kota ku dzunisa Yehovha hi tlhela hi pfuna van’wana ntsena loko matshalatshala ya hina ma seketeriwa hi yena.—Ps. 127:1, 2.
3 Hi kombisa leswaku hi tshembele eka Yehovha loko hi khongela eka yena hi kombela ku kongomisiwa ni ku pfuniwa hi moya wakwe wo kwetsima. (Ps. 105:4; Luka 11:13) Hi tlhela hi kombisa leswaku hi tshembele eka Xikwembu loko hi sekela leswi hi swi dyondzisaka eRitweni ra xona, ku nga Bibele. Rungula ra yona ri ni matimba yo fikelela timbilu ni ku cinca vutomi bya vanhu. (Hev. 4:12) Yehovha wa dzunisiwa loko hi ‘tirhela van’wana, hi titshege hi ntamu lowu Xikwembu xi hi nyikaka wona.’—1 Pet. 4:11.
4 Ku Tlhantlha Swiphiqo: Nakambe hi fanele hi lava mpfuno wa Yehovha loko hi langutane ni mintshikilelo niloko hi ri ni swiphiqo. (Ps. 46:1) Hi xikombiso, muthori wa hina a nga ha kanakana ku hi nyika masiku yo ya enhlengeletanweni, kumbe hi nga ha langutana ni xiyimo xo tika endyangwini wa hina. Hi kombisa leswaku hi tshemba Yehovha loko hi khongela eka yena hi mbilu hinkwayo naswona hi landzela nkongomiso lowu a hi nyikaka wona hi ku tirhisa Rito ra yena swin’we ni nhlengeletano ya yena. (Ps. 62:8; 119:143, 173) Loko malandza ya Yehovha ma endla tano, wa ma pfuna.—Ps. 37:5; 118:13, 16.
5 Yehovha wa hi tiyisekisa hi byakwe a ku: “U katekile munhu la tiyeke emirini loyi a tshembaka Yehovha ni loyi ntshembo wakwe ku nga Yehovha.” (Yer. 17:7) Onge hinkwaswo leswi hi swi endlaka swi nga kombisa leswaku hi tshembele eka yena!—Ps. 146:5.