Tintsumi Ta Hi Pfuna
1 “Maswivo, ndzi na n’wina masiku hinkwawo ku fikela emakumu ka mafambiselo ya swilo.” Marito wolawo ma va khutaza hinkwavo lava yingisaka xileriso xa Yesu lexi nge: “Fambani mi ya endla . . . vadyondzisiwa”! (Mat. 28:18-20) Ndlela yin’wana leyi Yesu a swi vekaka erivaleni ha yona leswaku u ni Vakreste va ntiyiso, i ku tirhisa tintsumi takwe. (Mat. 13:36-43) Mawaku ndlela leyi swi tsakisaka ha yona ku khomisana ntirho lowu wa ku twarisa “mahungu lamanene lama nga heriki” ni swivumbiwa leswi swo tshembeka swa moya!—Nhlav. 14:6, 7.
2 Evutirhelini Bya Hina: Bibele yi boxa leswaku tintsumi ti rhumiwe “ku ya tirhela lava nga ta dya ndzhaka ya ku ponisiwa.” (Hev. 1:14) Eka lembe-xidzana ro sungula, tintsumi ti kongomise valandzeri va Yesu eka vanhu lava fanelekaka. (Mint. 8:26) Namuntlha, malandza ya Xikwembu na wona ma hambeta ma vona vumbhoni bya leswaku tintsumi ta ma kongomisa. Minkarhi yo tala, vini va miti va vule leswaku a va ri karhi va khongelela mpfuno loko ku fika Mbhoni ekaya ra vona. Kunene hina swin’we ni tintsumi ha tsaka loko hi vona vanhu vo tano va amukela rungula ra Mfumo!—Luka 15:10.
3 Loko Hi Langutane Ni Nxaniso: Daniyele, vanghana va yena vanharhu va Vaheveru, muapostola Petro ni van’wana vo tala lava hlangavetaneke ni miringo leyikulu, va vone ndlela leyi Yehovha a va pfuneke ha yona hi ku tirhisa tintsumi leti nga ni “matimba lamakulu.” (Ps. 103:20; Dan. 3:28; 6:21, 22; Mint. 12:11) Hambileswi minkarhi yin’wana hi titwaka hi ri hava ntamu wo langutana ni nkaneto, hi nga khutaziwa hi mhaka ya nandza wa Elixa loyi a swi voneke leswaku “va tele lava va nga na hina ku tlula lava va nga na vona.” (2 Tih. 6:15-17) Hambiloko hi sindzisiwa ku hambana ni Vakreste-kulorhi a hi fanelanga hi hela matimba. Rito ra Xikwembu ra hi tiyisekisa loko ri ku: “Ntsumi ya Yehovha yi aka nxaxa ku rhendzela hinkwavo lava n’wi chavaka.”—Ps. 34:7.
4 Ku nga ri khale mavuthu ya tintsumi ma ta gada tihanci ta wona leswaku ma ta kukula hinkwavo lava lwisanaka ni vuhosi bya Kreste. (Nhlav. 19:11, 14, 15) Loko ha ha yimele siku rero, a hi hambeteni hi dzunisa Yehovha hi xivindzi, hi wu tshembe hi mbilu hinkwayo nseketelo wa yena wa matimba wa mavuthu ya le tilweni lama rhangeriwaka hi Kreste.—1 Pet. 3:22.