Bokisi Ra Swivutiso

◼ Xana tikopi ta Xihondzo xo Rindza ni Xalamuka! ti fanele ti kumiwa njhani?

Leswi se ku hundzeke nkarhinyana lunghiselelo ra xikhokhelo xa timagazini ni tikhasete ta Xihondzo xo Rindza ni Xalamuka! ri dlayiwile, hikwalaho, timagazini ni tikhasete, vahuweleri hinkwavo va fanele va tikumela tona evandlheni. Ku ta rhumeriwa ntsena swikhokhelo swa magazini wa Braille ni tikhasete, leswi rhumeriwaka mahala eka lava va fanelekaka. Hi kombela mi xiya leswaku mavandlha ma nga ha endla xikombelo xa tikhasete ta timagazini hi fomo ya Congregation Requests (M-202). Minkandziyiso ya tindzimi timbe ni ya tinhlanga letikulu na yona yi fanele yi komberiwa hi yona fomo leyi.

Loko un’wana ensin’wini ya n’wina a kombela ku tiseriwa timagazini nkarhi na nkarhi, hi kombela mi tiyiseka leswaku mi n’wi yisela tona loko ti fika leswaku a nga hundziwi hi nkandziyiso ni wun’we. Vanhu lava susiweke va nga ha tikumela timagazini kumbe tibuku tin’wana ta vona vini endhawini ya tibuku eHolweni ya Mfumo. Vahuweleri a va fanelanga va yisela lava susiweke timagazini.

Swikhokhelo leswi rhavi ri nga ta hambeta ri swi rhumela i swa vanhu lava swi nga kotekiki ku va yisela timagazini. Loko Komiti ya Ntirho ya Vandlha yi rhumela xikombelo xa swikhokhelo swa munhu loyi swi nga kotekiki ku n’wi fikelela, matsalana u fanele a tsala ni papila a hlamusela leswaku xikombelo xa swikhokhelo sweswo xi kambisisiwile naswona Komiti ya Ntirho ya Vandlha yi pfumerile leswaku swi rhumeriwa.

Leswi swi vula leswaku vahuweleri a va fanelanga va tsalela hofisi ya rhavi va tikombelela swikhokhelo swa vona vini. Swikombelo swa swikhokhelo leswi endliweke hi vahuweleri kumbe hi vanhu lava tsakelaka swi ta tlheriseriwa evandlheni.

◼ Xana mubohiwa a nga ti kuma njhani tikopi ta timagazini?

Loko vandlha leri langutelaka ntirho wo chumayela ekhotsweni ri swi kota ku yisa timagazini eka vabohiwa lava nga kwalaho, mubohiwa u fanele a tikumela tikopi ta timagazini ta Xihondzo xo Rindza ni Xalamuka! eka vahuweleri lava va endzelaka khotso rero. Loko sweswo swi nga koteki, mubohiwa a nga tsalela hofisi ya rhavi a tikombelela swikhokhelo. Hi kombela mi xiya leswaku vabohiwa lava susiweke na vona va nga kuma tikopi ta timagazini hi ndlela leyi andlariweke endzimaneni leyi.