Kombisa Moya Wa Vuphayona
1. Xana u nga wu hlamusela njhani moya wa vuphayona?
1 Vahuweleri va Mfumo hinkwavo va nga kombisa moya wa vuphayona, hambiloko va ta swi kota ku va maphayona sweswi kumbe va nga ta swi kota. Va swi lava hi mbilu hinkwayo ku endla ntirho lowu va lerisiweke wona wa ku chumayela ni ku endla vadyondzisiwa. (Mat. 28:19, 20; Mint. 18:5) Va khathala hi vanhu van’wana naswona va titsona swo tala leswaku va ya chumayela. (Mat. 9:36; Mint. 20:24) Malandza ya Yehovha ma swi tsakela ku endla xin’wana ni xin’wana lexi lavekaka leswaku ma dyondzisa van’wana ntiyiso. (1 Kor. 9:19-23) A hi voneni xikombiso xa un’wana la kombiseke moya wa vuphayona, ku nga Filipi lowa muvuri wa evhangeli.
2. Vakulu ni malandza ya vutirheli va nga wu tekelela njhani moya wa Filipi wa ku hisekela nsimu?
2 Ku Chumayela Ni Ku Dyondzisa: Filipi a a ri ni vutihlamuleri lebyikulu evandlheni ra lembe-xidzana ro sungula. (Mint. 6:1-6) Kambe a a ri muchumayeri wa mahungu lamanene la hisekaka swinene. (Mint. 8:40) Ninamuntlha, vakulu ni malandza ya vutirheli hambiloko va ri karhi va endla mintirho leyi va averiweke yona na vona va nga wu kombisa moya wa vuphayona hi ku va lava hisekelaka nsimu. Moya wolowo wu khutaza vandlha swinene!—Rhom. 12:11.
3. Hi nga wu kombisa njhani moya wa vuphayona loko hi ri eku ringiweni?
3 Endzhaku ka rifu ra Stefano, ku ve ni nxaniso lowukulu lowu pfilunganyeke vadyondzisiwa. Hambiswiritano, Filipi u hambete a chumayela, naswona a a endla ntirho wa nkoka swinene hikuva u sungule ntirho wo chumayela Vasamariya. (Mint. 8:1, 4-6, 12, 14-17) Hi nga tekelela xikombiso xakwe hi ku hambeta hi twarisa mahungu lamanene loko hi langutane ni miringo ni hi ku chumayela vanhu hinkwavo lava hi hlanganaka na vona hi nga yi hi nghohe.—Yoh. 4:9.
4. Hi xihi xikombiso lexi Filipi a hi vekeleke xona tanihi mudyondzisi?
4 Vutshila bya Filipi byo dyondzisa Rito ra Xikwembu byi nga voniwa eka bulo ra yena ni mutsheniwa wa Muetiyopiya. (Mint. 8:26-38) Ndlela yin’wana yo kombisa moya wa vuphayona i ku ndlandlamuxa vuswikoti byo tirhisa Bibele ni byo ‘hlamulana ni vanhu hi Matsalwa.’ (Mint. 17:2, 3) Ku fana na Filipi, na hina hi lava ku chumayela mahungu lamanene kun’wana ni kun’wana laha ku nga ni vanhu naswona hi nkarhi wun’wana ni wun’wana lowu faneleke.
5. I yini leswi nga pfunaka vatswari leswaku va khutaza vana va vona leswaku va va ni moya wa vuphayona?
5 Ndyangu Ni Vandlha: A swi kanakanisi leswaku langutelo ra Filipi ni xikombiso xa yena swi va khumbile vana va yena va xisati. (Mint. 21:9) Hilaha ku fanaka vatswari lava nga Vakreste lava rhangisaka Mfumo va khutaza vana va vona leswaku na vona va endla leswi fanaka. Hambileswi vatswari va vaka va karhele loko vhiki ri hela, kambe mutswari la hisekelaka ku chumayela, ku hiseka ka yena ka dzika embilwini ya n’wana wa yena.—Swiv. 22:6.
6. Hi nga swi kombisa njhani leswaku ha ma rhandza maphayona ya le vandlheni ra hina?
6 Filipi u ve ni malwandla eka Pawulo na Luka ni le ka Vakreste lava a va tirha hi matimba entirhweni wa Yehovha. (Mint. 21:8, 10) Namuntlha, lava hisekaka xana hi nga va kombisa njhani leswaku ha va seketela naswona ha va rhandza? Kumbexana hi nga ha hlawula ku tirha ni maphayona nimixo kumbe nindzhenga, hi masiku lawa va nga talangiki lava humaka nsimu. (Filp. 2:4) Nakambe hi nga rhamba maphayona emakaya ya hina leswaku hi ta tiphina na wona hi vuhungasi lebyi akaka. Ku nga khathariseki leswaku swiyimo swa hina swi njhani, onge hinkwerhu hi nga tikarhatela ku kombisa moya wa vuphayona.