Siku Ra Yehovha Ri Le Kusuhi
1 Vakreste va ri langutele hi mahlo-ngati siku ra Yehovha, leri ha rona a nga ta lovisa mafambiselo lawa ya swilo ivi a endla misava leyintshwa ya ku lulama. (2 Pet. 3:12, 13, nhlamuselo ya le hansi ya NW) Leswi hi nga swi tiviki leswaku siku rero ri ta fika rini, hi fanele hi tshama hi rindzile naswona hi pfuna van’wana leswaku na vona va endla tano. (Ezek. 33:7-9; Mat. 24:42-44) Loko hi anakanyisisa hi Rito ra Xikwembu ra vuprofeta hi ta hambeta hi tiyiseka leswaku “siku lerikulu ra Yehovha ri le kusuhi.”—Sof. 1:14.
2 Ku Tlhandlamana Ka Mimfumo Ya Misava: Hilaha swi tsariweke hakona eka Nhlavutelo 17:9-11, muapostola Yohane u vulavule hi “tihosi ta nkombo” leti yimelaka mimfumo ya misava ya nkombo leyi tlhandlamanaka. Nakambe Yohane u vulavule hi “hosi ya vunhungu” leyi sweswi yi yimelaka Nhlangano wa Matiko. Xana hi nga ha langutela leswaku ku landzela mfumo wun’wana wa misava? Doo, vuprofeta byi vula leswaku hosi ya vunhungu yi “ya eku lovisiweni,” naswona endzhaku ka yona a ka ha vanga na tihosi tin’wana ta misava leti boxiweke. Xana vuprofeta lebyi bya ku pfuna leswaku u vona nkarhi lowu hi hanyaka eka wona sweswi?
3 Daniyele 2:31-45 yi hi pfuna leswaku hi twisisa ku ta ka siku ra Yehovha. Eka vuprofeta byebyo, xifaniso lexikulu lexi Nebukadnetsara a xi voneke enorhweni xi yimela mimfumo ya misava leyi tlhandlamanaka. Mfumo wun’wana ni wun’wana se wu fumile. Xana sweswi hi hanya enkarhini wa mfumo wihi? Hi le nkarhini lowu fanekiseriwaka hi milenge ya xifaniso xexo. Vuprofeta byi swi veka erivaleni leswi nga ta endleka endzhaku ka mfumo lowu. Mimfumo ya vanhu yi ta lovisiwa hilaha ku heleleke, ivi yi siviwa hi “mfumo lowu wu nga ta ka wu nga lovisiwi.” Xana wa swi vona leswaku leswi swi swi kombisa njhani leswaku siku ra Yehovha ri le kusuhi?
4 Vumbhoni Lebyi Engetelekeke: Vumbhoni lebyi engetelekeke bya leswaku hakunene siku ra Yehovha ri le kusuhi byi lo dlaa, erivaleni. Hi vona ku hetiseka ka leswi muapostola Pawulo a swi vuleke hi ta mahanyelo ya vanhu va le ‘masikwini yo hetelela.’ (2 Tim. 3:1-5) Naswona hi le ku chumayeleni ka vumbhoni lebyi faneleke byi twarisiwa makumu ma nga si fika. (Mat. 24:14) Onge hi nga hambeta hi chumayela hi xihatla hilaha ntsumi yi twariseke ha kona loko yi ku: “Chavani Xikwembu mi xi vangamisa, hikuva nkarhi wa ku avanyisiwa hi xona wu fikile.”—Nhlav. 14:6, 7.