Xiyenge 9: Pfuna Xichudeni Leswaku Xi Lunghekela Ku Chumayela Hi Xitshuketa
Ku Fambisa Tidyondzo Ta Bibele Leti Endlaka Nhluvuko
1 Loko Andriya na Filipi va twe leswaku Yesu a a ri Mesiya la tshembisiweke, a va swi kotanga ku tshama hi yona mhaka leyi yo tsakisa, va yi rungulele van’wana. (Yoh. 1:40-45) Hilaha ku fanaka ninamuntlha, loko swichudeni swa Bibele swi sungula ku va ni ripfumelo eka leswi swi swi dyondzaka, swi titwa swi lava ku vulavula ha swona. (2 Kor. 4:13) Xana hi nga swi khutaza njhani leswaku swi chumayela hi xitshuketa, naswona hi nga swi pfunisa ku yini leswaku swi kota ku humelela loko swi ri karhi swi chumayela tano?
2 U nga ha vutisa xichudeni loko va ri kona lava se xi vulavuleke na vona hi leswi xi swi dyondzeke eBibeleni. Kumbexana xi ni vanghana kumbe vandyangu lava xi nga va kombelaka leswaku va va kona loko mi ri karhi mi dyondza. Xi vutise loko va ri kona lava tsakelaka mahungu lamanene entirhweni, exikolweni kumbe van’wana lava xi va toloveleke. Loko va ri kona xi nga ha sungula ku va chumayela. Xi pfune leswaku xi twisisa nkoka wa ku va ni vuxiyaxiya ni ku va ni xichavo ni musa loko xi vulavula ni van’wana hi Yehovha Xikwembu ni hi swikongomelo swa yena.—Kol. 4:6; 2 Tim. 2:24, 25.
3 Ku Byela Van’wana Hi Ta Ripfumelo Ra Swona: I swa nkoka ngopfu ku letela swichudeni swa Bibele leswaku swi tirhisa Rito ra Xikwembu loko swi byela van’wana hi ta ripfumelo ra swona. Minkarhi yin’wana loko mi ri eku dyondzeni, vutisa xichudeni u ku: “Xana u nga yi tirhisa njhani Bibele loko u hlamusela vandyangu wa wena ntiyiso lowu?” kumbe “Xana u nga tirhisa tsalwa rihi ku komba munghana wa wena leswaku lowu i ntiyiso?” Xiya ndlela leyi xi yi hlamuselaka ha yona mhaka yoleyo, kutani u xi komba ndlela leyi xi nga yi seketelaka ha yona hi Matsalwa. (2 Tim. 2:15) Hi ku endla tano, u ta va u lunghiselela xichudeni xa wena leswaku xi kota ku chumayela hi xitshuketa, ni ku chumayela ni vandlha loko se xi faneleka.
4 I swinene ku letela swichudeni swa hina swa Bibele leswaku swi kota ku langutana ni nkaneto. (Mat. 10:36; Luka 8:13; 2 Tim. 3:12) Loko van’wana va tlakusa swivutiso kumbe va vula swo karhi hi Timbhoni ta Yehovha, sweswo swi nga ha pfulela swichudeni ndlela yo chumayela. Broxara leyi nge Timbhoni Ta Yehovha—I Vamani Xana? Ti Pfumela Yini Ke? yi nga swi hlomisela ku tshama ‘swi lunghekele ku tihlamulela emahlweni ka mani na mani.’ (1 Pet. 3:15) Yi ni rungula leri vanhu lavantshwa entiyisweni va nga ri tirhiselaka ku pfuna vanghana ni swirho swa ndyangu wa vona leswaku swi twisisa ntirho wa hina swin’we ni tidyondzo ta hina leti sekeriweke eBibeleni.