Leswi Hi Swi Kolotaka Van’wana
1 Muapostola Pawulo u vone swi n’wi boha ku ya chumayela vanhu. A a swi tiva leswaku Yehovha u endle leswaku vanhu va mixaka hinkwayo va ponisiwa hi ngati ya risima ya N’wana wa Yena. (1 Tim. 2:3-6) Hikwalaho, Pawulo u te: “Eka Magriki swin’we ni le ka Vabarbara, eka lavo tlhariha swin’we ni le ka swihunguki ndzi ni nandzu.” U hisekele ku hakela xikweleti xa yena eka vanhu-kulobye hi ku va byela mahungu lamanene a nga karhali.—Rhom. 1:14, 15.
2 Ninamuntlha, Vakreste va lava ku byela vaakelani va vona mahungu lamanene nkarhi wun’wana ni wun’wana ku fana na Pawulo. Tanihi leswi “nhlomulo lowukulu” wu tshinelaka hi ku hatlisa, ntirho wa hina wo lavisisa lava nga ni timbilu letinene i wa xihatla. Onge rirhandzu ra hina ra xiviri ri nga hi susumetela ku gingiritekela ntirho lowu wo ponisa vutomi.—Mat. 24:21; Ezek. 33:8.
3 Ku Hakela Xikweleti Xa Hina: Ndlela yin’wana leyinene ngopfu yo fikelela vanhu i ku chumayela hi yindlu ni yindlu. Emasin’wini lawa hi kumaka tindlu to tala ti nga ri na vanhu, swa antswa hi tsala tindlu toleto kutani hi vuyela eka tona nkarhi wun’wana, hi ndlela yoleyo hi ta kota ku chumayela vanhu vo tala. (1 Kor. 10:33) Vanhu van’wana hi nga va kuma loko hi chumayela ensin’wini ya mabindzu, emagondzweni, etindhawini to wisela eka tona ni lomu ku pakiwaka kona timovha, niloko hi tirhisa riqingho. Hi nga ha tivutisa leswi, ‘Xana ndzi endla leswi nga ematimbeni ya mina leswaku ndzi tirhisa tindlela hinkwato to chumayela leswaku ndzi kota ku byela van’wana rungula ra vutomi?’—Mat. 10:11.
4 Phayona rin’wana ra xisati ri titwe ri boheka ku chumayela vanhu hinkwavo va le nsin’wini ya rona. Eka yindlu yin’wana a ku tshama ku khiyiwile. Hambiswiritano, siku rin’wana loko phayona leri ri hundza kwalaho kambe ri nga ri ensin’wini, ri vone movha emahlweni ka yindlu yoleyo. A ri lavanga ku tlanga hi nkarhi wolowo, kutani ri gongondzile. Hiloko ku pfula wanuna un’wana, naswona bulo leri va veke na rona ri endle leswaku phayona ri tlhela ri endla maendzo yo vuyela ko tala swin’we ni nuna wa rona. Eku heteleleni, wanuna yoloye u amukele dyondzo ya Bibele, sweswi hi vulavulaka i makwerhu la khuvuriweke. U ba mandla a vuyelela hi leswi makwerhu loyi wa xisati a titweke a ri ni xikweleti xo chumayela van’wana.
5 Leswi makumu ma tshinelaka hi xihatla, lowu hi wona nkarhi wa leswaku hi hakela xikweleti lexi hi xi kolotaka vanhu-kulorhi hi ku va hi tikarhata swinene entirhweni lowu wo chumayela.—2 Kor. 6:1, 2.