Ku Chumayela Hi Swiendlo
1 Hambileswi ntumbuluko wa Yehovha wu nga vulavuliki, kambe wu hi byela swo tala hi timfanelo ta yena leti nga vonakiki. (Ps. 19:1-3; Rhom. 1:20) Hilaha ku fanaka, mahanyelo ya hina lamanene, timfanelo ta hina ta Vukreste, ni ku xiximeka ka hina, hinkwaswo swa chumayela hambiloko hi nga wu pfulanga nomu. (1 Pet. 2:12; 3:1-4) Un’wana ni un’wana wa hina u fanele a navela ku “sasekisa dyondzo ya Muponisi wa hina, Xikwembu, eka swilo hinkwaswo” hi mahanyelo yakwe.—Tito 2:10.
2 Xana swi tisa ku yini leswaku munhu la nga hetisekangiki a endla leswaku tidyondzo ta Bibele ti tsakisa? Munhu u kota ku endla tano hi ku kongomisiwa hi Rito ra Xikwembu ni hi moya lowo kwetsima. (Ps. 119:105; 143:10) Rito ra Xikwembu “ra hanya naswona ri ni matimba, ri kariha ku tlula banga rihi ni rihi leri tsemaka hi matlhelo mambirhi.” (Hev. 4:12) Ri tlhava ri ya fika emaaveni ya mbilu kutani ri hi pfuna leswaku swi hi olovela ku ambala vumunhu lebyintshwa. (Kol. 3:9, 10) Moya lowo kwetsima wu hi pfuna ku va ni timfanelo leti rhandzekaka, to tanihi musa, vunene, ku olova ni ku tikhoma. (Gal. 5:22, 23) Xana hina hi hexe ha ri pfumelela rito ra Xikwembu ni moya wa xona leswaku swi hi kongomisa evuton’wini?—Efe. 4:30; 1 Tes. 2:13.
3 Vanhu Va Ma Xiya Mahanyelo Ya Hina: Loko hi hanya hi nkongomiso wa Yehovha naswona hi lwela ku va ni timfanelo leti yelanaka ni ta yena, vanhu van’wana va ta swi vona. Hi xikombiso, ehleketa hi wanuna loyi a a hlekuriwa hi vatirhi-kulobye hikwalaho ka leswi a a komile. Kambe makwerhu wa xisati loyi a a tirha na yena a a n’wi xixima. Leswi swi endle leswaku wanuna loyi a n’wi vutisa leswaku ha yini yena a n’wi xixima. U n’wi hlamusele leswaku hileswi a hanyaka hi misinya ya milawu ya Bibele. U tlhele a n’wi byela hi ta ntshembo lowu tsakisaka wa rungula ra Mfumo. Wanuna yoloye u sungule ku dyondza Bibele ivi a hetelela a khuvuriwile. Loko a tlhelela eka rikwavo, maxaka yakwe ma tsakisiwe ngopfu hi mahanyelo yakwe lamanene, naswona yo tala ya wona ma amukele ntiyiso.
4 Hi nga vangamisa Xikwembu hi mahanyelo ya hina lamanene, ni hi mahungu lawa hi ma chumayelaka loko hi ri entirhweni, exikolweni, kumbe loko hi ri ni maxaka swin’we ni vaakelani va hina.—Mat. 5:16.