Ku Nyikela Vumbhoni Hi Mahanyelo Lamanene

¹ Emisaveni ya namuntlha leyi tilawulaka, vantshwa vo tala va tlanga hi vutomi bya vona hi vomu hi ku tirhisa swidzidzirisi, ku tikhoma loko biha, ku xandzuka ni madzolonga. Ku hambana ni sweswo, mahanyelo lama nga xikombiso lexinene ya vantshwa lavanene evandlheni ra Vukreste ma phyuphyisa loko u va languta naswona entiyisweni i nchumu wo xonga eka Yehovha. Ma tirha tanihi vumbhoni bya matimba lebyi nga kokelaka van’wana entiyisweni.—1 Pet. 2:12.

² Mintokoto yo tala yi kombisa leswaku mahanyelo lamanene ya vantshwa va Vakreste ma humese vuyelo lebyinene eka vahlaleri. Loko a vulavula hi Mbhoni leyitsongo leyi a yi ri xichudeni xakwe, mudyondzisi un’wana exikolweni u byele tlilasi hinkwayo leswaku Yehovha, Xikwembu xa nhwanyana loyi, i Xikwembu xa ntiyiso. U vule marito lawa hikwalaho ka leswi mahanyelo ya n’hwanyana loyi ma xiximekaka minkarhi hinkwayo. Mudyondzisi un’wana u tsalele Sosayiti, a ku: “Ndzi rhandza ku mi bumabumela hikwalaho ka vantshwa lavanene lava mi nga na vona evukhongerini bya n’wina. . . . Vantshwa va n’wina i xikombiso lexinene hakunene. Va xixima lavakulu eka vona, a va na miharihari naswona va ambala kahle. A ndza ha vuli ndlela leyi va tivaka Tibibele ta vona ha yona! Byolebyo i vukhongeri hakunene!”

³ Mudyondzisi un’wana u tsakisiwe hi mahanyelo lamanene ya Mbhoni ya malembe ya nkombo hi vukhale leyi nga etlilasini yakwe. U kokiwe hi ku rhula ka mufana loyi ni vumunhu byakwe lebyi tsakisaka, leswi n’wi endleke a nga fani ni vafana lavan’wana. U tsakisiwe hi langutelo rakwe ra vutswatsi emhakeni ya tidyondzo ta vukhongeri byakwe—a nga khomiwi hi tingana hikwalaho ka leswi a hambaneke ni van’wana hi mhaka ya vupfumeri bya yena. U kote ku vona leswaku ripfalo rakwe ri leteriwile ni leswaku u kota ku “hambanisa leswi lulameke ni leswi hoxeke.” (Hev. 5:14) Eku heteleleni, mana wa mufana loyi u endzele mudyondzisi loyi, naswona ku sunguriwe dyondzo ya Bibele. Hi ku famba ka nkarhi, mudyondzisi loyi u khuvuriwile ivi a va phayona ra nkarhi hinkwawo!

⁴ Jaha rin’wana ri kuceteriwe hi mahanyelo lamanene ya Mbhoni leyi va nga swin’we exikolweni. A a hambane ni van’wana hakunene—a a ri munhu la nga ni mahanyelo lamanene, a tinyiketele etidyondzweni takwe, naswona nkarhi hinkwawo a a ambala kahle; nakambe, ku hambana ni vanhwanyana lavan’wana, yena a nga ri na swigangu. U kote ku swi vona leswaku a a hanya hi misinya ya milawu ya Bibele. Jaha leri ri n’wi vutise swivutiso malunghana ni tidyondzo ta vukhongeri byakwe naswona ri tsakisiwe ngopfu hi leswi ri byeriweke swona. U sungule ku dyondza, ivi a khuvuriwa hi ku hatlisa naswona eku heteleleni u hlanganyele evutirhelini bya vuphayona ni le ntirhweni wa le Bethele.

⁵ Loko u ri Mukreste la ha riki muntshwa la navelaka ku nyikela vumbhoni lebyinene eka van’wana, xiyisisa mahanyelo ya wena etimhakeni hinkwato. U nga tshuki u lahlekeriwa hi ku tirindza ka wena hikwalaho ko navela malangutelo ya misava leyi yo tilawula, mavonelo kumbe tindlela ta yona ta vutomi. Veka xikombiso lexinene hi ku vulavula ka wena, maambalelo, ku tibombisa, ku nga ri loko u hlanganyela evutirhelini bya nsimu ni le minhlanganweni ya vandlha ntsena kambe niloko u ri exikolweni hambi u ri eku tihungaseni. (1 Tim. 4:12) U ta va ni ntsako lowukulu loko munhu un’wana a tsakela ntiyiso hikwalaho ka leswi ‘ku vonakala ka wena ku nga ta voninga’ hikwalaho ka mahanyelo ya wena lamanene.—Mat. 5:16.