Vantshwa Lava Voningaka Kukota Mavoningo
1. Xana Bibele yi kombisa njhani leswaku Vakreste va ta voniwa hi mani na mani naswona marito wolawo ma tirha njhani namuntlha eka vantshwa lava nga Vakreste?
1 Yesu u byele vadyondzisiwa va yena a ku: “N’wina mi ku vonakala ka misava.” (Mat. 5:14, 16) Vadyondzisiwa va Yesu a va ta vonaka ku fana ni muti lowu akiweke entshaveni, lowu voniwaka hi mani na mani. Namuntlha, vantshwa vo tala lava nga Vakreste ‘va voninga kukota mavoningo emisaveni’ hi mahanyelo ya vona lamanene ni hi ku hisekela ku chumayela.—Filp. 2:15; Mal. 3:18.
2. Hi tihi tindlela tin’wana leti mi nga chumayelaka vadyondzisi ni vadyondzi-kuloni ha tona?
2 Exikolweni: Xana mi nga chumayela njhani exikolweni? Vantshwa van’wana va tirhise nkarhi wa mabulo lowu wu pfaka wu va kona etlilasini, man’wana ya mabulo lawa ma vulavula hi swidzidzirisi, hundzuluko ni ku rhandza tiko. Makwerhu un’wana wa xisati la ha nghenaka xikolo, u tirhise xitsalwana lexi vulavulaka hi vutherorisi leswaku a chumayela hi Mfumo wa Xikwembu leswaku hi wona ntlhantlho wa xiviri wa swiphiqo swa vanhu. Mudyondzisi wa yena u tsakisiwe hi xitsalwana lexi, lexi dyeriweke marhambu ya nhloko kutani sweswo swi n’wi pfulele ndlela ya leswaku a hambeta a chumayela.
3. Xana u nga endla njhani leswaku u voninga hi mahanyelo ya wena exikolweni?
3 Ndlela yin’wana leyi mi nga voningaka ha yona kukota mavoningo i mahanyelo ya n’wina lamanene ni ndlela leyi mi tilunghisaka ni ku ambala ha yona. (1 Kor. 4:9; 1 Tim. 2:9) Loko swichudeni ni vadyondzisi va xiya leswaku mahanyelo ya n’wina ma hambanile ni ya vana lavan’wana, van’wana va nga ha navela ku tiva ntiyiso hikwalaho ka ndlela leyi mi tikhomaka kahle ha yona, kutani va mi pfulela ndlela yo va byela ntiyiso wa Bibele. (1 Pet. 2:12; 3:1, 2) A swi nge olovi ku hanya hi ndlela leyi kombisaka ku chava Yehovha, kambe Yena u ta mi katekisa hilaha ku fuweke. (1 Pet. 3:16, 17; 4:14) Leswaku vanhu va navela ku twa mahungu lamanene, u nga ha hlaya minkandziyiso leyi sekeriweke eBibeleni hi nkarhi wo wisa kumbe u yi veka laha van’wana va nga ta yi vona.
4. Hi byihi vuyelo byin’wana bya ku chumayela exikolweni?
4 Ku endla leswaku u voninga exikolweni swi tiyisa ripfumelo ra wena swi tlhela swi ku pfuna leswaku u tinyungubyisa hi ku tirhela Yehovha. (Yer. 9:24) Kasi nakambe i xisirhelelo. Makwerhu un’wana wa xisati u te, “Vuyelo byin’wana lebyi ndzi byi kumaka hi ku vulavula hi leswi ndzi swi pfumelaka hi leswaku swichudeni a swi vi na xivindzi xo ringeta ku ndzi sindzisa ku endla swilo leswi lwisanaka ni leswi Bibele yi swi vulaka.”
5. (a) Xana vantshwa van’wana va wu ndlandlamuxa njhani ntirho wa vona wo chumayela? (b) Hi tihi tipakani ta wena ta moya?
5 Ku Ndlandlamuxa Ntirho Wa Wena: Ndlela yin’wana leyi vantshwa va voningaka ha yona kukota mavoningo i ku ndlandlamuxa ntirho wa vona wo chumayela. Loko makwerhu un’wana a heta xikolo xa le henhla, u rhurhele laha ku nga ni xilaveko lexikulu xa vahuweleri va Mfumo. A a ri evandlheni leritsongo, leri a ro va ni nkulu un’we ntsena. U tsalele munghana wa yena a ku: “Ndzi le ku tiphineni laha. Ntirho wo chumayela wa phyuphyisa! Hi vulavula timinete ta 20 emutini ha wun’we hikuva vanhu va lava ku twa hinkwaswo leswi u nga tela ku va byela swona.” U engetele a ku: “Ndzi navela onge muntshwa un’wana ni un’wana a nga endla leswi ndzi swi endleke, naswona a titwa hi ndlela leyi ndzi titwaka ha yona. A xi kona lexi antswaka ku tlula ku tirhela Yehovha hi hinkwaswo leswi hi nga na swona.”
6. I yini lexi u xi rhandzaka hi vantshwa va vandlha ra ka n’wina?
6 Ha tinyungubyisa swinene hi n’wina vantshwa lava voningaka kukota mavoningo emisaveni! (1 Tes. 2:20) Loko mi ri karhi mi tirhela Yehovha hi mbilu ya n’wina hinkwayo, moya-xiviri wa n’wina hinkwawo, mianakanyo ya n’wina hinkwayo ni matimba ya n’wina hinkwawo, mi ta tshovela ‘hilaha ku phindhiweke ka 100 enkarhini lowu kutani emafambiselweni lama taka ya swilo mi kuma vutomi lebyi nga heriki.’—Mar. 10:29, 30; 12:30.