‘Ku Voninga Ku Kota Mavoningo’
1 Exikarhi ka munyama wa moya ni wa mahanyelo wa mafambiselo lawa ya swilo, vagandzeri va ntiyiso va Yehovha Xikwembu, va kwalomu ka tsevu wa timiliyoni va karhi va ‘voninga kukota mavoningo’ ematikweni ya 234 emisaveni hinkwayo. (Filp. 2:15) Leswi swi hi endla leswaku hi hlawuleka eka vanhu van’wana. Xana hi ku kombisa njhani ku vonakala ka ntiyiso wa risima, loku humaka eka Yehovha?—2 Kor. 3:18.
2 Swiendlo Swa Hina: Vanhu va hatla va yi xiya ndlela leyi hi tikhomaka ha yona. (1 Pet. 2:12) Wansati un’wana u xiye leswaku Mbhoni yin’wana leyi a yi ri mutirhi-kulobye a yi ri ni musa ni ntirhisano naswona a yi nga vulavuli nhlambha naswona a yi nga hleki loko van’wana va vulavula nhlambha. Loko van’wana va ringeta ku tlhontlha Mbhoni leyi, hi ku vulavula nhlambha loko yi ri kona, a yi va honisa kambe yi tshama yi tiyimisele ku endla leswi lulameke. Xana leswi swi n’wi khumbe njhani wansati loyi? U ri: “Ndzi hlamarisiwe swinene hi ndlela leyi a tikhomaka ha yona lerova ndzi sungula ku vutisa swivutiso malunghana ni Bibele. Ndzi sungule ku dyondza Rito ra Xikwembu naswona endzhakunyana ndzi khuvuriwile.” U ya emahlweni a ku: “A ku ri ku tikhoma ka yena loku ku ndzi susumeteleke ku kambisisa tidyondzo ta Timbhoni ta Yehovha.”
3 Ndlela leyi hi byi langutaka ha yona vulawuri, ndlela leyi hi swi langutaka ha yona swiendlo swo biha swin’we ni ririmi ra hina leri baseke, swi endla leswaku Timbhoni ta Yehovha ti hlawuleka tanihi vanhu lava hanyaka hi misinya ya milawu ya Bibele leyi tlakukeke. Mintirho yo tano leyinene yi nga endla leswaku Yehovha a dzunisiwa yi tlhela yi kokela van’wana evugandzerini bya yena.
4 Ku Vulavula Ka Hina: Ina, lava vonaka mahanyelo ya hina lamanene, a va nge swi tivi leswaku ha yini hi nga fani ni vanhu van’wana, handle ka loko ho va byela hi ripfumelo ra hina. Xana lava u tirhaka na vona kumbe u nghenaka na vona xikolo va swi tiva leswaku u wun’wana wa Timbhoni ta Yehovha? Xana wa ringeta ku kuma tindlela to chumayela loko u ri karhi u bula ni van’wana? Xana u tiyimiserile ku endla leswaku ku ‘voninga ka wena ku vonakala emahlweni ka vanhu’ hi nkarhi wun’wana ni wun’wana lowu faneleke?—Mat. 5:14-16.
5 Leswaku hi hetisisa ntirho wa hina tanihi vabyarhi va ku vonakala, hi fanele hi va ni moya wa ku tinyikela. Moya wa ku tinyikela wu ta hi susumetela ku tshika ku endla swilo leswi nga riki swa nkoka, leswaku hi ta kuma nkarhi wo tirha hi matimba entirhweni wa ku chumayela ni wa ku endla vadyondzisiwa, lowu ponisaka vutomi.—2 Kor. 12:15.
6 Onge hi nga hambeta hi voninga ku kota mavoningo, hi swiendlo ni hi mavulavulelo ya hina. Loko hi endla tano, van’wana va nga ha susumeteleka ku ta va ta dzunisa Yehovha swin’we na hina.